YAP-da ƏNƏNƏVİ “TƏZƏ-KÖHNƏ” DAVASI BAŞLAYIB

	13 fevral 2012


Onlayn ictimai-siyasi qəzet

Siyasət

YAP-da ƏNƏNƏVİ “TƏZƏ-KÖHNƏ” DAVASI BAŞLAYIB

2010-07-25

Aydın Mirzəzadə deputatlığa namizədlərin siyahısı ilə bağlı sürpriz vəd edir

Parlament seçkiləri yaxınlaşdıqca hakimiyyət düşərgəsində gərginlik artıq və iqtidar mənsubları öz açıqlamalarında buna dair öz təmsil olunduqları qruplaşmaların mövqeyini açıq şəkildə müdafiə etməyə başlayıblar. İqtidarda seçkilərlə bağlı ziddiyyətlə o qədər dərinləşib ki, hətta YAP-ın namizədlər siyahısını açıqlamaq məsələsini həll edə bilmirlər.

Ötən saylarımızda da yazmışdıq ki, bu ilki parlament seçkilərində hakimiyyətin namizədləri birbaşa Prezident Aparatında müəyyənləşdiriləcək və buna məmur-oliqarxların müdaxilə etməsinə imkan verilməyəcək. Əslində iqtidarın namizədlər siyahısı çoxdan hazırdır, sadəcə siyahıda adları yer almayanların müqavimətlərinin ciddi olacağı proqnozlaşdırıldığından ilk növbədə onları neytrallaşdırmağa çalışırlar. Məsələ ondadır ki, artıq vahid siyahıda adlarının olmayacağını ehtimal edən şəxslər hərəkətə keçiblər.
YAP funksioneri olan deputat Eldar İbrahimovun açıqlaması bunun bir nümunəsidir. E.İbrahimov deyib ki, indidən kimlərin hansı dairədən namizəd olmasını açıqlamaq vacib deyil: “Bizim partiyanın buna ehtiyacı yoxdur. YAP hər hansı dairədən namizəd irəli sürürsə və ora hər hansı başqa bir üzv gəlib namizədliyini irəli sürsə, bu, düzgün olmaz. O zaman həmin adam çağırılır və ona deyilir ki, namizədliyini geri götür. Götürmürsə, partiyadan çıxarılır, seçilmir və biabır olur”.
Namizədlər siyahısına gəlincə, E.İbrahimov bildirib ki, hakim partiyadan olan deputatların hamısının yenidən namizədliyini irəli sürmək daha yaxşı olar.
Deməli, hakimiyyət düşərgəsində yenə də ənənəvi “köhnələr-təzələr” davası başlayıb. Hələ xeyli öncədən deyilirdi ki, 2010-cu ilin parlament seçkilərində YAP-çı deputatların təxminən yarısı mandat ala bilməyəcək, onları digər, indiyədək kölgədə qalmış şəxslər əvəzləyəcək. Görünür, “köhnə qvardiya” artıq bundan duyuq düşərək, “yaddan çıxarılmaması” barədə mesajlar verməyə başlayıblar.
Maraqlıdır, Eldar İbrahimovun açıqlamasını digər YAP funksionerləri necə qarşılayırlar?
YAP-dan olan millət vəkili Aydın Mirzəzadə “mənim fikirlərimlə Eldar müəllimin fikirləri arasında fərq, ziddiyyət” axtarmayın deyə qeyd etdi: “Eldar İbrahimov mənim çox böyük hörmət etdiyim, dost olduğum insandır. Mən şəxsən Eldar müəllimin yenidən deputat olmasını istəyərdim. Onun fikirlərinə şərh vermək istəmirəm. Hesab edirəm ki, o, həmişəki kimi məsələlər çox aktuallıqla və yüksək səviyyədə yanaşır. Yeni Azərbaycan bu gün dairələr üzrə özünün seçki siyahısını hazırlamaqdadır. Zamanı gələndə siyahı cəmiyyətə təqdim ediləcək və əvvəlki dövrlərdə olduğu kimi, bu dəfə də marağa səbəb olacaq. Yenə də həm parlamentdəki deputat korpusundan, həm bu gün parlamentdən kənarda olsa da, ictimaiyyətdə kifayət qədər nüfuz qazanan, deputat seçilməsi cəmiyyətə faydalı olan ziyalılarımız, qadınlarımız, gənclərimizdən geniş istifadə olunacaq. Bu gün konkret olaraq ad-soyad çəkmək düzgün olmazdı, amma hər halda siyahıda həm köhnə korpusdan, həm də partiyanın indiki fəallarından xeyli maraqlı simalara rast gəlinəcək”.

Elşad MƏMMƏDLİ

556 dəfə baxılıb