İSA QƏMBƏRLƏ ƏLİ KƏRİMLİ ARASINDA FİKİR AYRILIĞI

	13 fevral 2012


Onlayn ictimai-siyasi qəzet

Siyasət

İSA QƏMBƏRLƏ ƏLİ KƏRİMLİ ARASINDA FİKİR AYRILIĞI?

2010-07-26

Müsavat başqanı ilə AXCP sədri superpartiya yaratmağı seçkidən sonraya saxlayıb

Müsavat Partiyası ilə AXCP-nin vahid partiyada birləşməsi təklifi irəli sürüləndən indiyə qədər adıçəkilən qurumların birinci şəxsləri İsa Qəmbərlə Əli Kərimli arasında mətbuata bəlli üç görüş olub. Hər görüşdən sonra tərəflər mediaya açıqlamalarında seçkilərdə vahid namizədlərlə çıxış etmək, seçki bloku yaratmaq və partiyaların birləşdirilməsi məsələləri ilə bağlı müzakirə apardıqlarını bildiriblər.

Dünən əldə etdiyimiz məlumatda isə deyilir ki, İsa Qəmbərlə Əli Kərimlinin görüşlərində əsas müzakirə mövzusu hələ ki, seçkilərdə birgə iştirak məsələsidir. Liderlər bu məsələni həll etdikdən sonra partiyaların birləşməsini ciddi müzakirəyə çıxarmağı qərara alıblar. Məlumatda həmçinin bildirilir ki, İsa Qəmbərlə Əli Kərimlinin müzakirələrdə bir məsələdə fikirlərinin üst-üstə düşmədiyi ortaya çıxıb.
Belə ki, Müsavat başqanı öncə dairələr üzrə vahid namizədləri müəyyənləşdirib sonra seçki blokunu rəsmi elan etməyin uğurlu variant olduğunu düşünür. AXCP sədri isə əvvəl seçki blokunun yaranmasını, ardınca dairələr üzrə vahid namizədləri təyin eləməyi məqsədəuyğun sayır. Bizə çatan xəbərlərdə o da deyilir ki, sonuncu görüşdə bu məsələ ciddi müzakirə edilib, lakin qəti qərara gəlmək mümkün olmayıb.
Bu mövzuda söhbət etdiyimiz AXCP sədrinin müavini Fuad Qəhrəmanlı isə İsa Qəmbərlə Əli Kərimlinin keçirdiyi görüşlərdə heç bir fikir ayrılığının olmadığını bildirdi. F.Qəhrəmanlının dediyinə görə, tərəflər artıq müəyyən sayda namizədlərin razılaşdırılması məsələsini həll ediblər: “Proses bu şəkildə pozitiv gedir. Bizcə, dairələr üzrə namizədlərin formalaşmasında və seçki blokunun yaradılmasında problem ola bilməz. Hansı məsələnin öncə reallaşması məsələsinə gəlincə isə bu, müzakirələr zamanı həll olunacaq. Hansı addımın birinci atılmasının daha uğurlu olacağı qənaəti güclü olacaqsa, həmin addım da atılacaq. Liderlərin kifayət qədər təcrübəsi var ki, bu məsələni ən uğurlu formada həll etsinlər. Hesab edirəm ki, ən uğurlu variant qısa müddət ərzində seçki blokunu yaradıb digər texniki məsələləri sürətlə həll etməkdir. Seçki kampaniyasının başlanmasına az qalıb. Seçki blokunun elan olunması Müsavat-AXCP birliyinin rəsmi yarandığı effektini yaradar və cəmiyyətdə fəallığa səbəb ola bilər. Ona görə də seçki blokunu mümkün qədər tez yaratmaq lazımdır. Bu prosesdə geriyə dönüş yoxdur”.
Göründüyü kimi, F.Qəhrəmanlı da öncə seçki blokunun yaradılmasının uğurlu olduğunu bəyan edir. Onun bu cür mövqedə olması isə təbiidir. Çünki bir partiya funksioneri kimi öz liderinin mövqeyində olmalıdır. Əslində F.Qəhrəmanlının həmin açıqlaması bizim əldə etdiyimiz məlumatın əsaslı olduğunu dolayısı ilə təsdiqləyir.

Etibar SEYİDAĞA

1098 dəfə baxılıb