TAPDIQ ABBAS MÜSAVATDAN ÇIXARILMADI | Siyasət

	12 fevral 2012


Onlayn ictimai-siyasi qəzet

Siyasət

TAPDIQ ABBAS MÜSAVATDAN ÇIXARILMADI

2010-07-27

Müsavat Divanı: “Onun ifadə etdiyi səmimi etiraf və dərin peşmançılığı nəzərə alındı...”

Müsavat Məclisinin üzvü, “Paralel” qəzetinin baş redaktoru Tapdıq Abbasın mərhum prezident Heydər Əliyevin məzarı önünə gül qoyması və baş əyməsi məsələsi mətbuatda müxtəlif aspektlərdən müzakirə olunmaqdadır.

Maraqlı budur ki, T.Abbas onun bu hərəkətini pisləyən partiya yoldaşlarına qarşı da cəbhə açıb. O, xüsusilə Mərkəzi İcra Aparatının rəhbəri Arif Hacılının və “Yeni Müsavat” qəzetinin baş redaktorunun üzərinə gedir. Bildirir ki, partiyanın son qurultayında Sülhəddin Əkbəri dəstəklədiyinə görə ona qarşı belə kampaniya aparılır. Onun “Bakı-Xəbər” qəzetinə verdiyi müsahibəsindən sitat: “Vaxtilə mən Sülhəddin Əkbəri müdafiə edəndə Arif Hacılı ilə hətta qarşı-qarşıya olmuşuq. İndi onun əlinə fürsət düşüb. Bu çox ciddi məsələdir və dərin kökləri var... Mən türk oğluyam və türk oğluna qarşı etniklərin mübarizə aparması təbiidir”. Rauf Arifoğlu və “Yeni Müsavat”la bağlı “Paralel” qəzetində yazılanlarla, eləcə də Tapdıq Abbasın ifasında qəzetlərdə dərc olunanlarla bağlı isə maraqlı yekunlar var. Belə ki, dünən Tapdıq bəy bütün bunlarla bağlı qəzetimizin baş redaktoruna üzrxahlıqlarını bildirib. Onun deməsinə görə, yanlış məlumatlandırma əsasında bu cür yazılar və qeydlər ortaya çıxıb...
Maraqlıdır ki, dünən Müsavat Partiyasının Divanı Tapdıq Abbasın Məclis üzvlüyündən çıxarılması barədə tələbləri yerinə yetirməyib. Divan yalnız ona xəbərdarlıq edib. Bununla bağlı Müsavat Partiyasının yaydığı məlumatda bildirilir ki, Tapdıq Abbasın Azərbaycan Milli Mətbuatının yaranmasının 135 illik yubileyi münasibətilə keçirilən tədbirlərdə Heydər Əliyevin Fəxri Xiyabandakı məzarına əklil qoyma mərasimində iştirakı Divanda geniş müzakirə edilib: “Çıxışlarda bu addımın yanlışlığı, onun Müsavat Partiyasının üzvü olmaqla bir araya sığmadığı dönə-dönə vurğulanıb, müxtəlif təkliflər səslənib. Yekunda bütövlükdə Azərbaycanı, o cümlədən mətbuatı bərbad vəziyyətə salan bir siyasətçinin məzarını ziyarət törənində iştirakın yolverilməzliyi qeyd edilib. Divan Tapdıq Abbasın iclasdakı çıxışında bu hadisə ilə bağlı ifadə etdiyi səmimi etiraf və dərin peşmançılığı nəzərə alaraq ona xəbərdarlıq edilməsi ilə kifayətlənmişdir. Divan eyni zamanda inandığını bildirmişdir ki, Tapdıq Abbasa verilmiş bu partiya cəzası bütün müsavatçılara və demokratik düşərgənin üzvlərinə bir dərs olacaq. Tapdıq Abbas partiya Divanının verdiyi bu qərarla razılaşdığını, gələcək fəaliyyətində bütün bunları ciddi surətdə nəzərə alacağını bildirib”.
T.Abbas həmçinin uyğun vaxtda Mətbuat Şurası rəhbərliyindən gedəcəyinə söz verib.

Maqsud MAHRIZLI

701 dəfə baxılıb