MÜSAVATIN SƏDRLƏR ŞURASI DİVANIN QƏRARINA ETİRAZ ETDİ

	13 fevral 2012


Onlayn ictimai-siyasi qəzet

Siyasət

MÜSAVATIN SƏDRLƏR ŞURASI DİVANIN QƏRARINA ETİRAZ ETDİ

2010-07-28

Tapdıq Abbasla bağlı məsələ yenidən müzakirə olunacaq

Dünən Müsavat Partiyasının Sədrlər Şurasının növbəti ənənəvi toplantısında partiya Məclisinin üzvü, “Paralel” qəzetinin baş redaktoru Tapdıq Abbasın Mətbuat Günündə mərhum prezident Heydər Əliyevin məzarına baş əyməsi və bundan sonra baş verən proseslər əsas müzakirə mövzusu olub.

Bu barədə qəzetimizə Sədrlər Şurasının üzvü, Müsavatın Sabunçu Rayon Təşkilatının sədri Rafiq İsmayıl məlumat verdi. Onun sözlərinə görə, Sədrlər Şurasının üzvləri - partiyanın rayon təşkilatlarının rəhbərləri T.Abbasın bu hərəkətə yol verdikdən sonra Müsavat Partiyasının sıralarında qalmasının mümkünsüzlüyünü bildiriblər. Sədrlər Şurasının üzvləri T.Abbasın partiyada saxlanılması, ona yalnız xəbərdarlıq edilməsi barədə Müsavat Divanının çıxardığı qərara etiraz ediblər. Şurada gedən müzakirələrin sonunda qurum adından partiya rəhbərliyi qarşısında tələb qoyulub. Sədrlər Şurası Tapdıq Abbasın məsələsinə Divanda yenidən baxılmasını və onun Müsavat Məclisindən kənarlaşdırılmasını tələb edirlər. Əks təqdirdə, RT sədrləri özləri istefa verəcəklərini və ya digər radikal addımlar atacaqlarını partiya rəhbərliyinə ünvanladıqları müraciətdə qeyd ediblər.
Bu müraciətə partiya rəhbərliyinin reaksiyasını öyrənmək üçün Müsavatın Mərkəzi İcra Aparatının rəhbəri Arif Hacılı ilə əlaqə saxladıq. A.Hacılı dedi ki, Sədrlər Şurasının üzvləri Tapdıq Abbas barədə qəbul olunan qərarın çox yumşaq olduğunu bildiriblər: “Bu barədə Divana məlumat çatdırılması ilə bağlı ümumi razılıq əldə olundu. Düşünürəm ki, vəziyyətin daha da kəskinləşməməsi üçün Müsavat Partiyasının Divanının növbəti toplantısında bu məsələnin müzakirə olunması zəruridir”.
Yaranmış vəziyyətlə bağlı Tapdıq Abbasın da mövqeyini öyrənməyə çalışdıq. Baş redaktor dedi ki, Sədrlər Şurasının müraciətindən dəqiq məlumatı olmadığına görə bu məsələyə münasibət bildirmək istəmir: “Məsələ ilə tanış olduqdan sonra buna dair mövqeyimi açıqlayaram”.
Fürsətdən istifadə edib T.Abbasdan Müsavat Divanının yaydığı məlumata münasibət öyrəndik. Həmin məlumatda göstərilirdi ki, Tapdıq Abbas baş verənlərə görə səmimi etiraf edib və peşmançılıq keçirib. Doğrudanmı T.Abbas atdığı addımdan peşman olub? Buna dair sualımıza onun cavabı belə oldu: “Bəli, mən Divanın verdiyi bəyanatla razıyam”.
T.Abbasdan həmçinin, “Paralel” qəzetinin ötən sayında “Yeni Müsavat” qəzetinin kollektivi haqqında xoşagəlməz yazının dərc olunması ilə bağlı da danışdıq. O, həmin yazının müəllifi Akif Nəsirlinin cəzalandırıldığını bildirdi: “Həmçinin, həmin düzgün olmayan məlumatları ona vermiş adamların kimliyini də araşdırırıq, onların da cəzasını verəcəyik. Bununla bağlı əlavə üzrxahlıq yazısı dərc ediləcək”.