ASƏF KƏRİMOV AXCP-dən NİYƏ GEDİB | Siyasət

	12 fevral 2012


Onlayn ictimai-siyasi qəzet

Siyasət

ASƏF KƏRİMOV AXCP-dən NİYƏ GEDİB?

2010-07-29

Fuad Qəhrəmanlı: “O, səhhəti və yaşı ilə bağlı may ayında istefa verib”

Müsavat Partiyası ilə AXCP-nin birləşməsi məsələsi ortaya çıxandan buna dair müəyyən söz-söhbətlər də ortaya çıxıb. Belə ki, hər iki partiya daxilində bəzi şəxslərin bu birliyə qarşı olduqlarına dair müxtəlif məlumatlar yayılır. İlkin vaxtlarda Müsavat Partiyasının daxilində belə etirazların olduğu deyilirdisə, bu dəfə AXCP-də bəzi şəxslərin birliyin tərəfdarı olmadığına dair məlumatlar yayılıb.

Onu da nəzərə çatdıraq ki, AXCP Rəyasət Heyətinin üzvü Xaliq Bahadır də birləşməyə qarşı çıxıb və bununla bağlı geniş müsahibə vermişdi.
İndi isə bir çox redaksiyalara, o cümlədən “Yeni Müsavat”a belə bir məlumat ötürülüb ki, AXCP Rəyasət Heyətinin üzvü Asəf Kərimov Müsavatla birləşməyə qarşı çıxıb və partiyadan istefa verib. Bu xəbərin doğru olub-olmadığını dəqiqləşdirmək üçün AXCP sədrinin müavini Fuad Qəhrəmanlı ilə əlaqə saxladıq.
F.Qəhrəmanlı partiya daxilində Müsavatla birləşməyə dair yekdil rəy olduğunu dedi: “Bununla bağlı heç bir problem yoxdur. Asəf Kərimov Rəyasət Heyəti üzvlüyündən səhhətinə və yaşına görə may ayında istefa verib. Bunun AXCP-Müsavat birliyinə heç bir aidiyyəti yoxdur. Onun istefası mayda olubsa, bu necə birləşmə ilə bağlı ola bilərdi. Çünki may ayında belə bir söhbət yox idi. Sadəcə, görünür, indi kimlərsə may ayında baş vermiş bir hadisədən öz məqsədləri üçün istifadə edib, Asəf Kərimovun guya Müsavatla birləşməyə görə partiyadan getməsinə dair yalan məlumatlar yayır”.
F.Qəhrəmanlı bildirdi ki, Müsavatla birləşmə yönündə müzakirələr davam edir və bunun uğurlu nəticəsi olacaq.

Maqsud MAHRIZLI

819 dəfə baxılıb