MÜSAVAT MƏCLİSİ SENTYABRIN 4-də TOPLANACAQ

	12 fevral 2012


Onlayn ictimai-siyasi qəzet

Siyasət

MÜSAVAT MƏCLİSİ SENTYABRIN 4-də TOPLANACAQ

2010-08-31

Divan bununla bağlı qərar qəbul etdi

Dünən Müsavat Partiyası Divanının iclası keçirilib. Partiyanın mətbuat xidmətindən verilən məlumata görə, iclasda qərarların icra vəziyyəti və görülən işlərə baxıldıqdan sonra partiyadaxili məsələlər barədə fikir mübadiləsi aparılıb.

İclasda parlament seçkilərində müxalifətin birgə iştirakı çərçivəsində dairələr üzrə vahid namizədlərin müəyyənləşdirilməsi yönündə müzakirələr davam etdirilib.
Gündəliyin ictimai-siyasi vəziyyətə dair bölümündə məlumat verilib ki, məhkəmələrdə hüquqları pozulmuş 10-dək vətəndaş partiya başqanı ilə görüşərək ondan yardım istəyiblər. Müsavat Partiyası həmin qadınlara üzləşdikləri haqsızlıqlarla bağlı mətbuat konfransı keçirməyə imkan yaradacağını və onlara siyasi dəstək verəcəyini bildirib.
Divanın iclasında həmçinin sentyabrın 4-də Müsavat Məclisinin keçirilməsi barədə qərar qəbul edilib. Müsavat Məclisinin sədri Sülhəddin Əkbər “Media forum” saytına açıqlamasında deyib ki, iclasda əsasən parlament seçkisi ilə bağlı məsələlər müzakirə olunacaq: “Məclis parlament seçkisi, deputatlığa namizədlər və Müsavat-AXCP seçki blokunun yaradılması ilə bağlı siyasi qərarlar qəbul edəcək. Düzdür, bəzi dairələrdə vahid namizədlərin razılaşdırılması ilə bağlı çətinliklər var. Amma Müsavatla AXCP arasında müzakirələr davam edir. Hər iki partiya blokun yaradılması üçün səylərini davam etdirəcək. Müsavat Məclisi AXCP ilə seçki blokunun yaradılmasına tam dəstək verəcək”.
Müsavat Məclisi həmçinin Cənubi Qafqazda və Azərbaycan ətrafında yaranmış hərbi-siyasi vəziyyəti, həmçinin Dağlıq Qarabağ münaqişəsini də müzakirə edəcək, bununla bağlı sənəd qəbul olunacaq. S.Əkbər deyib ki, həmin sənəd Müsavat Divanında müzakirə olunub və təsdiqlənib.

Etibar SEYİDAĞA

414 dəfə baxılıb