SEÇKİ BLOKLARI PUL PROBLEMİNİ HƏLL ETMƏYƏ ÇALIŞIRLAR

	13 fevral 2012


Onlayn ictimai-siyasi qəzet

Siyasət

SEÇKİ BLOKLARI PUL PROBLEMİNİ HƏLL ETMƏYƏ ÇALIŞIRLAR

2010-08-31

Kampaniyanın başlanmasına 8 gün qalır, partiyalar maliyyə sıxıntısı yaşayır

Ölkə Konstitusiyasının 84-cü maddəsinin II hissəsinə və 109-cu maddəsinin 1-ci bəndinə uyğun olaraq parlament seçkiləri gününü prezident təyin edir. Növbəti parlament seçkilərinin noyabrın 7-də keçiriləcəyini nəzərə alsaq, seçki kampaniyası səsvermə gününə ən azı 60 gün qalmış, sentyabrın 8-dək elan olunmalıdır.

Namizədlərin irəli sürülməsi, onların müdafiəsi üçün seçici imzalarının toplanması səsvermə gününə ən azı 30 gün qalmış bitməlidir. Bu, oktyabrın 8-nə düşür.
Seçkiqabağı təşviqat səsvermə gününə 23 gün qalmış - oktyabrın 15-də başlayır və səsvermənin başlanmasına 24 saat qalmış -noyabrın 6-da dayandırılır.
Siyasi qüvvələrin öz namizədlərini müəyyən etməsi üçün qarşıda cəmi 9 gün qalıb. Müxalifət düşərgəsində müşahidə olunan proses budəfəki seçkilərdə tanınmış partiyalardan ibarət bir neçə seçki blokunun iştirak edəcəyini söyləməyə əsas verir. Artıq ilk seçki bloku rəsmən elan olunub. Üç partiya bir araya gələrək “Qarabağ” seçki blokunu rəsmən elan ediblər. Müsavat Partiyası ilə AXCP-nin də seçki bloku yaradacağı gözlənilir. KXCP və daha 4 partiya isə Demokratiya Uğrunda İttifaq olaraq seçkiyə gedəcəklərini bəyan ediblər. Araşdırmamız nəticəsində məlum oldu ki, adıçəkilən qurumların seçkilərlə bağlı maliyyə vəziyyəti o qədər də yaxşı deyil. Partiyalar maliyyə sıxıntısı çəkirlər. Buna baxmayaraq, bütün qüvvələri səfərbər edib blokun seçki fondunu yaratmağı planlaşdırıblar.
Müsavat Partiyası seçkilər departamentinin rəhbəri Gülağa Aslanlı bildirdi ki, yaradılması gözlənilən Müsavat-AXCP seçki blokunun vahid seçki blokunun yaradılması haqqında düşünürlər. Amma vahid seçki fondu yaradılsa da, hər bir namizədin özünün də seçki fondunun olmasına icazə verilir. G.Aslanlı qeyd etdi ki, bütün real müxalifət partiyalarında olduğu kimi, Müsavatda da maliyyə problemi var. Müsavat rəsmisi problemin AXCP də mövcudluğunu güman etdiyini söylədi: “Seçkidə iştirak edən qüvvələrə dövlət büdcəsindən vəsait ayrılması məsələsi də aradan götürüləndən sonra problem daha da artıb. Hər halda, partiya və bloklara verilən vəsait müəyyən qədər də olsa, təbliğat işlərinin aparılmasında rol oynayırdı. Amma bütün bunlara baxmayaraq, mövcud imkanlardan istifadə edərək qanunvericiliyin tələbinə əməl eləməklə müəyyən vəsait toplamaq haqqında düşünürük”.
“Qarabağ” seçki blokundakı Ümid Partiyasının İcra Aparatının rəhbəri Nəsimi Məmmədli blokun işçi qrupunun toplantısında seçki fondu məsələsinin də müzakirə edildiyini bildirdi: “Təbii ki, seçki fondu yaradılmalıdır. Bu olmadan seçki keçirilməsi mümkün deyil. Maliyyə məsələləri ilə bağlı ilkin addımların nə olması müzakirə edilib. Lakin hələ qərar qəbul edilməyib. Ümumi seçki fonduna həm namizədlərin şəxsi vəsaiti, həm partiyaların ayırdığı vəsaitlər olacaq”.
DUİ-dəki KXCP-nin seçki qərargahının rəhbəri Bəybala Əbil isə bildirdi ki, maliyyə problemi onların qarşısındakı ən ciddi bir neçə problemdən biridir: “Həm KXCP, həm də DUİ-dəki digər partiyalar çox ciddi maliyyə problemi yaşayırlar. Ancaq sözsüz ki, seçki fondumuz yaradılacaq. Partiyaların və fərdi olaraq namizədlərin imkanlarından istifadə edilməklə seçki fondunu yaradacağıq”.
B.Əbil maliyyə məsələsinin əsasən namizədlərin özlərinin üzərinə düşəcəyini vurğuladı.

Etibar SEYİDAĞA

475 dəfə baxılıb