İLTİZAM ƏKBƏRLİ AXCP-yə MESAJ VERDİ

	12 fevral 2012


Onlayn ictimai-siyasi qəzet

Siyasət

İLTİZAM ƏKBƏRLİ AXCP-yə MESAJ VERDİ

2010-08-31

“Namizədliyimi kiminsə xeyrinə geri götürməyi düşünmürəm”

Parlament seçkilərində vahid namizədlərin müəyyənləşdirilməsi ilə bağlı AXCP-Müsavat danışıqları hələ də davam edir. Xəbər verildiyi ki, AXCP rəhbərliyi Müsavat rəhbərliyinə daxil olan, o cümlədən 2005-ci ildən bəri müxalifəti parlamentdə layiqincə təmsil etmiş Müsavat deputat qrupunun üzvlərinin dairələrinə də alternativ irəli sürüb.

Ötən saylarımızda AXCP-nin bu mövqeyindən narazılıq ifadə edən tanınmış simaların fikirləri dərc olunub. Dünən isə 79 saylı İmişli seçki dairəsinin deputatı İltizam Əkbərli redaksiyamızla əlaqə saxlayıb AXCP-nin ona qarşı da haqsızlıq etdiyini bildirdi. Millət vəkilinin sözlərinə görə, AXCP rayonda heç bir dəstəyə malik olmayan bir şəxsin namizədliyini irəli sürüb: “Mən 2005-ci ildə ”Azadlıq" blokunun namizədi ola bilmədim. Müsavat partiyası məni, bloka daxil olan digər partiyalar isə başqa bir namizədi müdafiə etdilər. Yadıma gəlir, seçkiyə bir neçə gün qalmış bloka daxil olan partiyaların rəhbərlərini daha şanslı namizəd olduğuma inandırmağa çalışsam da, buna nail ola bilmədim və nəticədə sərbəst şəkildə namizədliyimi verdim. Apardığım uğurlu seçki kampaniyası nəticəsində həm hakimiyyət nümayəndəsinə, həm də çoxsaylı digər namizədlərə qalib gələrək deputat seçildim. Təbii ki, “Azadlıq” blokunun vahid namizədi olmadığımdan mandatdan imtina etmək haqqında tərtib olunan sənədə də imza atmadım". İ.Əkbərli dedi ki, keçən 5 il müddətində seçicilərindən uzaq düşməyib və daim onların problemlərinin həllinə çalışıb: “Mən bu illərdə rayonda yaşadım, onların problemlərini öz problemim kimi qəbul etdim, bu problemlərin həlli üçün mümkün olan bütün vasitələrdən istifadə etdim. İndi də seçicilərimin içərisindəyəm. Apardığım rəy sorğusuna əsaslanaraq, yenə də 79 saylı İmişli seçki dairəsindən namizədliyimi vermək qərarına gəlmişəm. Bu dairədən təkcə AXCP deyil, digər partiya və bloklar da artıq öz namizədlərini açıqlayıblar. Kifayət qədər rəqiblərim olacaq. Mən bunu yenə də normal hesab edirəm və təbii ki, namizədliyimi kiminsə xeyrinə geri götürməyi düşünmürəm”.
Qeyd edək ki, AXC hakimiyyəti zamanı İmişli rayonunun icra başçısı işləyən və bu dönəmdə əhalinin böyük rəğbətini qazanan İ.Əkbərli halal mandat qazanandan sonra da rayonun problemlərinin həlli üçün bütün qüvvəsi ilə çalışıb. Elə onun daşqınlar zamanı gecəli-gündüzlü camaatın yanında olması, problemlərin həllinə çalışmasını xatırlatmaq kifayətdir. Hər halda, ədalət hissini unutmaq düzgün deyil.

ELŞAD

775 dəfə baxılıb