17 SAYLI YASAMAL DAİRƏSİNDƏ GƏRGİN MÜBARİZƏ BAŞLAYIB

	13 fevral 2012


Onlayn ictimai-siyasi qəzet

Siyasət

17 SAYLI YASAMAL DAİRƏSİNDƏ GƏRGİN MÜBARİZƏ BAŞLAYIB

2010-08-31

Qənimət Zahid: “Qərarımı dəyişməkdə çətinlik çəkirəm”
Nüşabə Sadıxlı: “Heç kəsə ”geri çəkil" deyə bilmərəm"
Araz Əlizadə: “Rəhbərlik etdiyim partiyanın Yasamal təşkilatı güclüdür”

AXCP Müsavat Partiyasının razılaşdırmadığı dairələrdən biri də 17 saylı Yasamal üçüncü seçki dairəsidir. Həmin dairədən Müsavat Partiyasının namizədi partiyanın Divan üzvü Nüşabə Sadıxlı, AXCP-nin namizədi isə “Azadlıq”qəzetinin baş redaktoru Qənimət Zahiddir. Sözügedən dairədən Azərbaycan Sosial Demokrat Partiyasının sədri Araz Əlizadə, Vətəndaş və İnkişaf Partiyasının sədri Əli Əliyev də namizədliyini irəli sürəcək. Qeyd edək ki, ötən parlament seçkilərində həmin dairədən ALP sədri Lalə Şövkət deputat seçilmişdi. Lakin o, mandatından imtina etdi.

Dünən həm Q.Zahid, həm də N.Sadıxlı və A.Əlizadə ilə əlaqə saxlayıb sözügedən dairədən namizədliklərini vermələrinin səbəblərinə aydınlıq gətirdik.
Qənimət Zahid Q.Zahid seçimini bu cür izah etdi: “Bir neçə dairə ilə bağlı fikirlərim var idi. Sonda belə qərara gəldim ki, 17 saylı Yasamal üçüncü seçki dairəsi daha yaxşıdı. Bu ərazi həm iş yerimə yaxındır, həm də şəhərin içidir. Dost -tanışlarım burda daha çoxdur. Bu cür qərar verməyimə həm də onlar təkid etdilər. Xatırlayırsınızsa, bu qərarı verənə qədər bütün qəzetlərə tərəddüdlərim var deyirdim. Nəhayət, bu tərəddüdlərə son qoydum”.
Q.Zahidin sözlərinə görə, qəti qərar verəndən sonra ona məlum olub ki, eyni dairədən N.Sadıxlı da namizədliyini irəli sürüb: “Nüşabə xanım mənə Bakı Dövlət Universitetində dərs deyib. O vaxtdan bizim yaxın və sevimli müəllim -tələbə münasibətlərimiz var. Açığı, bir az pis vəziyyətdə qaldım. Amma mən də bəlli bir çevrənin qarşısında qərar vermişəm. Ona görə qərarımı dəyişməkdə çətinlik çəkirəm”.
Baş redaktor çıxış yolu tapacaqlarını dedi: “Kampaniya hələ başlamayıb. Kampaniya zamanı biz imkanlarımızı müzakirə edə bilərik. Mən eyni zamanda istəyirəm göstərək ki, ölkədə normal opponent münasibətləri necə olur. Nüşabə xanımla isti münasibətlərimizin yüksək səviyyədə qalacağına şübhə etmirəm. Mədəni və bir -birimizə güvənli şəkildə alternativ münasibətimiz olacaq. Biz ikimiz də bir-birimizi başa düşən və qiymətləndirən adamlarıq”.
Nüşabə Sadıxlı N.Sadıxlı isə bildirdi ki, Q.Zahid sözünün ağası olan, hərəkətlərinə fikir verən, çox dəyərli kişilərdən biridir: “O mənim tələbəm olub. Tələbələrimə öz övladıma bəslədiyim qədər məhəbbətim var. İş elə gətirdi ki, eyni seçki dairəsindən namizədliyimizi verəsi olduq. Baxmayaraq ki, 17-ci seçki dairəsindən namizədliyimi verəcəyim barədə qərarı Qənimət bəydən öncə elan etmişdim. Düşünürdüm ki, Qənimət bəy həm bir centlmen, həm müəllimi kimi, həm də hərəkatda müəyyən qədər xidməti olan bir insan kimi bu seçki dairəsindən iddialı olmaz. İş elə gətirib ki, o da eyni seçki dairəsindən namizədliyini verdi. Bilirsiniz, bu onun da haqqıdır. Mən ona heç nə deyə bilmərəm”.
Sözügedən dairədən israrlı olmasına gəlincə, N.Sadıxlı bildirdi ki, o, həmin ərazidə dünyaya gəlib və insanların əksəriyyətini tanıyır: “Gücüm daxilində orda yaşayan insanların problemlərinin həllində mühüm rolum olub. İstərdim ki, parlamentdə səlahiyyətli şəxs kimi onların problemlərinə daha yaxından kömək etmək imkanı əldə edim. Bu səbəbdən 17-ci seçki dairəsindən israrlıyam. Qənimət bəy qərarı özü verməlidir. Mən heç kəsə geri çəkil deyə bilmərəm. Düşünürəm ki, Qənimət bəy ictimaiyyət arasında tanınan şəxsdir. Namizədliyini hansı seçki dairəsindən verməyi onun üçün fərq eləmir. Bu seçki dairəsindən verməyimin səbəblərini izah elədim. Seçim onun olacaq”.
N.Sadıxlı bildirdi ki, nəinki Müsavat Partiyasının, eləcə də AXCP-nin namizədləri arasında qadınların sayı çox azdır: “Bunların hamısı nəzərə alınmalıdır. 125 dairə var. AXCP ilə Müsavat parlament seçkilərinə 4-5 qadınla gedəcək? ATƏT-də builki seçkilərdə qadın namizədlərin sayının artırılmasının tərəfdarıdır. 2005-ci ilin parlament seçkilərində də eyni dairədən namizədliyimi irəli sürmüşdüm. Həmin il Lalə Şövkət də bu dairədən namizədliyini vermişdi. Ona görə mən geri çəkildim”.
Eyni dairədən namizədliyini irəli sürən Araz Əlizadə öncə alternativləri olacaq namizədlərə uğurlar arzuladı. Partiya sədri bildirdi ki, rəhbərlik etdiyi partiyanın Yasamal rayon təşkilatı güclüdür: “Bu səbəbdən namizədliyimi bu dairədən verirəm. Bundan başqa Yasamalda doğulub boya-başa çatmışam. Həm də orda mənim çoxlu dostlarım yaşayır”.