ZİYA MƏMMƏDOVUN MALİYYƏLƏŞDİRDİYİ BLOK HANSIDIR

	13 fevral 2012


Onlayn ictimai-siyasi qəzet

Siyasət

ZİYA MƏMMƏDOVUN MALİYYƏLƏŞDİRDİYİ BLOK HANSIDIR?

2010-09-01

Yayılan bu xəbər siyasi mühitdə zəlzələ yaratdı

Hökumət AXCP və Müsvata qarşı blok yaradıb. Bu haqda məlumatı “Azadlıq” qəzeti dünənki sayında yayıb. Qəzet yazır ki, iki aparıcı müxalifət partiyası olan Müsavat və AXCP-nin əməkdaşlığı hakimiyyəti ciddi narahat edib. Bu səbəbdən də hakimiyyət parlament seçkilərində müxalifət adı ilə yaradılan bloklardan birinə AXCP və Müsavata qarşı mübarizədə önəm verəcək və həmin blok məhz bu məqsədlə yaradılıb.

Qəzetə məlumat çatdıran mənbə deyib ki, sözügedən blokun maliyyələşdirilməsi nəqliyyat naziri Ziya Məmmədova tapşırılıb. Yəni AXCP və Müsavata alternativ olaraq yaradılan bu blok kütləvi aksiyalar keçirməklə, hakimiyyətin ünvanına sərt çıxışlar etməklə görüntü yaradacaq.
Mənbə onu da bildirib ki, blokun uğurlu kampaniya aparması üçün gündəlik qəzet də nəşr ediləcək. Qəzet blokun adının onlara bəlli olduğunu, sadəcə, dəqiqləşdirmələr aparıldığına görə açıqlanmadığını yazır.
Qeyd edək ki, indiyə qədər bir neçə partiyanın iştirakı ilə iki blok yaradılıb. Onlardan biri Ümid, ADP və Aydınlar Partiyasının təsisçiliyi ilə qurulan “Qarabağ”, digəri isə Böyük Quruluş Partiyası, Bütöv Azərbaycan Xalq Cəbhəsi Partiyası və Ədalət Partiyasının təsis etdiyi “İslahat” seçki blokudur.
“Qarabağ” blokunun təsisçilərindən biri ADP sədri Sərdar Cəlaloğlu bildirdi ki, hakimiyyət ayrı-ayrı partiyalara qarşı “qara piar” aparır : “Görünür, həmin piar indi də bloklara qarşı aparılır. Ziya Məmmədovun Müsavat və AXCP-yə qarşı blok yaratması anlaşılan deyil. Belə olsaydı blok bütün müxalifətə qarşı yaradılardı. Nəyə görə Ziya Məmmədov? Belə çıxır ki, AXCP və Müsavat cütlüyü yalnız Ziya Məmmədovun tərəfdarlarına qarşı müxalifətçilik edəcək? Məntiqsiz, qarmaqarışıq, gülməli, ictimaiyyəti çaşdıran bu məlumata heç bir əsas yoxdur. Söhbətin hansı blokdan getdiyini mətbuata açıq şəkildə yazsınlar. Mən də deyə bilərəm ki, aldığım məlumata görə, Kəmaləddin Heydərov bizə qarşı bir blok yaradacaq. Bu həqiqətdi? İnsanlar iddia irəli sürməmişdən əvvəl qarşı tərəfin də ittihamlar səsləndirə biləcəyini nəzərə alsınlar”.
Böyük Quruluş Partiyasının (BQP) sədri Fazil Qəzənfəroğlu məsələyə sərt reaksiya verdi: “Hakimiyyətin yaratdığı bir blok var. O da AXCP-Müsavat blokudur. Bu blokun maliyyələşdirilməsi Ziya Məmmədova yox, Rusiya generalı Sakit Allahverdiyevə tapşırılıb. Bu haqda mətbuatda məlumat gedib. O etiraf edib ki, ”Azadlıq" qəzetinə, dolayısı ilə bu bloka pul ayırıb. Mənim bildiyim versiya budur. İkincisi, söhbət maska taxaraq siyasi mübarizə aparan siyasi qüvvələrdən gedir. Onları başqa yerdə axtarın.
Bu məsələnin bizə yaxından-uzaqdan aidiyyəti yoxdur. Bu sualın bizdən soruşulması məntiqsizdir".
F.Qəzənfəroğlunun ittihamlarına Müsavat Partiyasının Mərkəzi İcra Aparatının sədri Arif Hacılının mövqeyini öyrəndik. A.Hacılı dedi ki, Azərbaycan hakimiyyətinin əsas opponenti Müsavat Partiyası, AXCP və DUİ-yə daxil olan təşkilatlardır: “Aydın məsələdir ki, parlament seçkilərində hakimiyyətin əsas alternativi Müsavat -AXCP birliyi, o cümlədən hakimiyyətə qarşı səmimi rəqabət aparmaq niyyədi olan DUİ-dir. ”Azadlıq" qəzetinin hansı əsasla belə bir fikir yaydığını deyə bilmirəm. Düşünürəm ki, qəzet yaydığı fikrə aydınlıq gətirəcək".
A.Hacılı qeyd etdi ki, Müsavat Partiyasının və AXCP-nin bu məsələlərdə mövqeyi Azərbaycan ictimaiyyətinə məlumdur.

Leyla İLQAR

2530 dəfə baxılıb