ERMƏNİNİN DEPUTAT OLMAQ İSTƏYİNƏ REAKSİYALAR GƏLDİ

	13 fevral 2012


Onlayn ictimai-siyasi qəzet

Siyasət

ERMƏNİNİN DEPUTAT OLMAQ İSTƏYİNƏ REAKSİYALAR GƏLDİ

2010-09-05

Vəfa Quluzadə: “Bizdə vaxtsız banlayan xoruzun başını kəsirlər”
Fəzail Ağamalı: “Bu, erməni hiyləgərliyinin növbəti nümunəsidir”

Azərbaycanda keçiriləcək parlament seçkiləri erməniləri də maraqlandırmağa başlayıb. Azərbaycan Erməniləri Assambleyasının sədri Qriqori Ayvazyan Bakıya qayıtmaq üçün hüquq və zəmanət əldə etmək xahişi ilə BMT-nin qaçqın məsələləri üzrə ofisinə müraciət edib.

Ayvazyanın fikrincə, onun və digər Azərbaycan ermənilərinin hüququ var ki, BMT-in qaçqın məsələləri üzrə ofisindən və Azərbaycan prezidenti İlham Əliyevdən Azərbaycan vətəndaşı kimi təhlükəsizliklərinin qorunmasının təmin edilməsini tələb etsinlər: “Mənim hüquqlarım heç bir Azərbaycan vətəndaşının hüquqlarından az deyil və mənim də Milli Məclisin deputatı seçilmək hüququm var. Bunu mənə heç kəs qadağan edə bilməz”.
Özünü Azərbaycan vətəndaşı kimi qələmə verən Ayvazyan bununla belə, Azərbaycan torpaqlarının Ermənistan tərəfindən işğalına və 1 milyondan çox azərbaycanlının yurd-yuvasından qovulmasına isə münasibət bildirməyib. Ancaq istənilən halda erməninin Azərbaycan vətəndaşlığını qəbul etdiyini bəyan etməsi maraqlı məsələdir. Olmaya bu müraciətin də arxasında erməni hiyləgərliyi dayanır və Azərbaycanı növbəti sürpriz gözləyir? Xatırladaq ki, Azərbaycanın Mərkəzi Seçki Komissiyası ötən seçkilərdə Azərbaycan dövlətinə müraciət edəcəkləri halda, ermənilərin seçkilərdə iştirakını mümkün saymışdı.
Sabiq dövlət müşaviri Vəfa Quluzadənin fikrincə, əgər Ayvazyan Azərbaycan qanunlarını qəbul edib Azərbaycan vətəndaşı kimi bura gəlmək istəyirsə, o zaman özünü Daxili İşlər Nazirliyinə təhvil verməlidir: “Gərək DİN yoxlasın ki, onun hansısa cinayətdə əli var, ya yox”.
V.Quluzadə qeyd etdi ki, Ermənistanda azərbaycanlılara qarşı etnik təmizləmə aparılıb: "Ona görə də heç bir erməninin Azərbaycan parlamentində oturmağa haqqı yoxdur. Hansısa erməni parlamentə seçilmək istəyirsə, gərək azərbaycanlılar da gedib erməni parlamentində otursunlar, yaxud Ermənistanın dövlət orqanlarında təmsil olunsunlar. Ona görə bu erməni xoruz kimi banlamasın. Bizdə vaxtsız banlayan xoruzun başını kəsirlər".
Milli Məclisin deputatı Fəzail Ağamalı isə bunu erməni hiyləgərliyinin növbəti nümunəsi kimi dəyərləndirdi: “Sual olunmalıdır ki, indiyə qədər nədən bu adam öz hüquqlarını müdafiə etmək və guya Ermənistanda təzyiqə məruz qalmaqla bağlı bəyanatla çıxış etməyib, beynəlxalq təşkilatlara müraciət ünvanlamayıb? Nə oldu ki, birdən-birə Azərbaycanda seçkilərin keçirilməsi ərəfəsində ermənilərə məxsus olan belə bir hiyləgər açıqlama verdi? Düşünürəm ki, bu hiyləgər bəyanata "yox" deyilməlidir və bu cavab hüquqi cəhətdən əsaslandırılmalıdır".