MÜXALİFƏT ƏLİ ƏHMƏDOVA CAVAB VERDİ

	12 fevral 2012


Onlayn ictimai-siyasi qəzet

Siyasət

MÜXALİFƏT ƏLİ ƏHMƏDOVA CAVAB VERDİ

2010-09-05

Sərdar Cəlaloğlu: “YAP Kommunist Partiyası kimi təsərrüfat xarakterli təşkilatdır”
Arzu Səmədbəyli: “O, özü də bilir ki, YAP-ın xalq arasında nüfuzu yox kimidir”

Namizədlər siyahısını açıqlamaqdan çəkinən, müxalifətin namizədlərini açıqlamasını gözləyən Yeni Azərbaycan Partiyasının sədr müavini Əli Əhmədov son müsahibəsində böyük iddialar ortaya qoyub. O, müxalifət partiyaları arasında YAP-a rəqib ola biləcək bir partiyanın olmadığını iddia edib.

Ə.Əhmədovun o gülünc iddiası belədir: “Hətta bu partiyalar birləşsə belə YAP-a rəqib olmaq potensialına malik deyil. Bu partiyaların bütün üzvlərini bir yerə yığsan, YAP üzvlərinin çox kiçik bir faizini təşkil edər... Əgər YAP-da 500 mindən yuxarı insan varsa, bu, 500 mindən yuxarı seçici deməkdir. Təbii ki, bu insanlar gəlib səs verəndə ən azı 500 min səs YAP-ın xeyrinə olacaq... Əgər partiya üzvlərinin hər biri seçki kampaniyası vaxtı ailə üzvləri, dostları, tanışları, qonşularından azı iki nəfəri YAP-ın namizədinin ən layiqli olduğuna inandıra bilsə, beləliklə də onları təşviq etsə, bu, 1,5 milyon səs deməkdir. 1,5 milyon səs isə Azərbaycanın seçki mühitində istənilən seçkini uğurla başa çatdırmaq üçün yetərlidir. Bu mənada YAP-la rəqabət apara biləcək siyasi partiya mövcud deyil... Bu və ya digər partiya bloklarının yaranması seçkidə YAP-ın uğur qazanmasına hər hansı təhlükə yaratmaq imkanına malik deyil”.
Ə.Əhmədovun iddiasına münasibət bildirən ADP sədri Sərdar Cəlaloğlu ənənəsinə uyğun olaraq sualımıza bir misalla cavab verməyə başladı: “Bayquşa deyirlər ki, get dünyanın ən gözəl quşunu gətir, başlayır ağlamağa. Deyirlər niyə ağlayırsan, cavab verir ki, qorxuram gedəm öz balamı gətirəm, ona göz dəyə. Təbii ki, hər kəs özünü güclü, birinci hiss edir. Əli Əhmədov deməməlidir ki, biz zəifik, YAP seçkidə uduzacaq. Amma hər kəsə, Əli Əhmədovun özünə də aydındır ki, ölkədə insanlar hakimiyyətdən nə qədər narazıdır. Onun açıqlaması da göstərir ki, əslində bərk narahatdırlar. Seçki təbliğatına start verilməyib, heç namizədlərini açıqlamayıblar, amma piara başlayıblar. Qorxmasalar, belə danışmazlar ki... Biz ümumiyyətlə YAP barədə heç nə danışmırıq, onu heç rəqib də saymırıq. Biz hakimiyyətlə mübarizə aparırıq. YAP bir təşkilat kimi yoxdur, Kommunist Partiyası kimi təsərrüfat xarakterli partiyadır. Əli Əhmədov özünə təsəlli verir”.
Müsavat Partiyası başqanının müavini Arzu Səmədbəyli isə dedi ki, Ə.Əhmədov sadəcə kampaniya aparır: “Amma AXCP-Müsavat birliyi və ayrılıqda Müsavat Partiyası YAP-dan qat-qat güclüdür. YAP-ın bizimlə rəqabət aparmaq imkanları yoxdur. Müsavat xalq arasındakı nüfuzuna, elektoratına görə Əli Əhmədovun təmsil etdiyi təşkilatdan müqayisə olunmaz dərəcədə güclü olduğunu bütün seçkilərdə sübut edib. Təəssüf ki, Azərbaycanda seçkilər hakimiyyət tərəfindən və güc, icra strukturları hesabına saxtalaşdırıldığından biz qələbəmizi rəsmiləşdirə bilməmişik. Amma bizimlə yanaşı hakimiyyət, o cümlədən Əhmədov özü də bilir ki, xalq arasında onların nüfuzu yox dərəcəsindədir. Biz bu seçkilərdə hakimiyyətdən daha güclü və şanslıyıq”.