AXCP ARİF HACILI VƏ PƏNAH HÜSEYNİ AYRILMAQ DÜSTURU TƏQDİM ETMƏKDƏ SUÇLADI

	13 fevral 2012


Onlayn ictimai-siyasi qəzet

Siyasət

AXCP ARİF HACILI VƏ PƏNAH HÜSEYNİ AYRILMAQ DÜSTURU TƏQDİM ETMƏKDƏ SUÇLADI

2010-09-06

Razi Nurullayev Arzu Səmədbəyliyə uğurlar arzuladı

Seçki kampaniyasının rəsmi startına 2 gün qaldı. Bu günədək Müsavat Partiyası ilə AXCP 80 seçki dairəsi üzrə vahid namizəd müəyyənləşdiriblər. Qarşıdakı bir neçə gündə də bir çox mühüm dairələr üzrə vahid namizədlə bağlı razılaşmaların olacağı gözlənilir. Təxminən 10 dairədə vahid namizədlə seçkiyə qatılmaq belə görünür ki, mümkün olmayacaq. Çünki nə həmin dairələrdə namizədlər geri çəkilmək niyyətindədilər, nə də partiyaların rəhbərliyi onlara təzyiq etmək istəyir.

Məsələn, 8 saylı Binəqədi seçki dairədə Müsavatın namizədi hazırda həmin dairədən deputat olan Arzu Səmədbəylidir. Müsavat başqanının müavini Arzu Səmədbəyli deputat kimi seçiciləri ilə çox yaxşı işlədiyini və digər məsələləri əsas göstərərək, ən şanslı namizəd olduğu üçün geri çəkilmək istəmir. AXCP-nin həmin dairədən namizədi sədr müavini Razi Nurullayev də ötən həftənin sonunda bəyan edib ki, qərarında qətidir, geri çəkilməyəcək: “Bir sıra dairələrin, o cümlədən mənim və Arzu bəyin iddia etdiyi 8 saylı Binəqədi seçki dairəsinin sərbəst buraxılması, yəqin ki, labüd olacaq. Geri çəkilmək çox çətindir. 5 ildir ki, yeni seçkiləri gözləyirdim, hazırlaşırdım, yüzlərlə insanla 5 il ərzində daima ünsiyyətdə olmuşam. Təbii ki, Arzu bəyin də bu dairədən iddialı olmasını tanıyıram və uğurlar arzulayıram. Hər ikimiz müxalifət təmsilçisiyik. Hansımız udarsa, müxalifətin qələbəsi olacaq”.
115 saylı Şəki dairəsində də eyni vəziyyət yaranıb. Müsavatın namizədi Adil Qeybulla ilə AXCP-nin namizədi Sahib Kərimov iddialarında israr edirlər.
Bu cür dairələrin sayının 10-dan yuxarı olması Müsavatla AXCP-nin seçki bloku deyil, siyasi blok yarada biləcəyi kimi fikirlərin ortaya çıxmasına səbəb olub. Məsələn, Müsavat Partiyası Mərkəzi İcra Aparatının rəhbəri Arif Hacılı mətbuata açıqlamasında partiyalar arasında seçki blokunun yaranması mümkün olmadığı halda, seçkiyə eyni şüar, eyni platforma ilə qatıla biləcək siyasi blokun da yarana biləcəyini istisna etməyib.
Siyasi blokun və ya koalisiyanın yaranmasının mümkünlüyü fikri ilə Müsavat deputat qrupunun üzvü Pənah Hüseynin də “Yeni Müsavat”dakı debatda səsləndirdiyi fikirləri AXCP rəhbərliyi cəbhəçilərin və müsavatçıların çaşdırılması hesab edirlər. AXCP Ali Məclisinin sədri Həsən Kərimov “Azadlıq” qəzetinə bildirib ki, monitorinq aparmaq, eyni siyasi platforma ilə çıxış etmək seçki blokunu əvəz edə bilməz. Bu, birləşməyin yox, ayrılmağın düsturudur: “Seçki blokunun yaradılması Həsən Kərimovun, Arif Hacılının, Pənah Hüseynin arzusundan daha çox, cəmiyyətin sosial sifarişidir. Eyni zamanda sıravi cəbhəçilərin və müsavatçıların çoxdankı arzusudur.
Ona görə də belə bir fikir ortaya atmaqla müsavatçıları və cəbhəçiləri çaşdırmağa ehtiyac yoxdur. Birlikdən başqa nicatımız yoxdur. Sosial sifarişə qarşı getməməliyik".
Pənah Hüseyn isə dünən bizə açıqlamasında bildirdi ki, AXCP funksionerləri onun fikirlərini düzgün başa düşməyiblər. Çünki o, siyasi blokdan danışarkən birlik əleyhinə heç bir fikir səsləndirməyib. Əksinə, birliyin daha da güclənməsinin tərəfdarı kimi çıxış edib: “Belə görünür ki, mənim fikirlərim düzgün anlaşılmayıb. Mənim tərəfimdən siyasi blok məsələsi seçki blokuna alternativ kimi yox, seçki ilə bağlı əməkdaşlığın sonrakı mərhələsi kimi təqdim olunub. Yəni seçki blokları yarandıqdan və siyahılar müəyyənləşdikdən, rəsmiləşdikdən sonra həmin siyasi təşkilatların, blokların, eni zamanda bəzi namizədlərin də iştirakı ilə bir seçki ittifaqı tipli bir qurumun yaranmasından söhbət gedir”.
P.Hüseyn bu ideyanın abstrakt olmadığını vurğuladı. Qeyd etdi ki, ideya hazırda müxalifət strukturlarında müzakirə olunmaqdadır.