ƏLİ ƏLİYEV “YENİ MÜSAVAT”ın XƏBƏRİNİ TƏSDİQLƏDİ

	13 fevral 2012


Onlayn ictimai-siyasi qəzet

Siyasət

ƏLİ ƏLİYEV “YENİ MÜSAVAT”ın XƏBƏRİNİ TƏSDİQLƏDİ

2010-09-07

VİP sədri indi də “xəyanət faylı”nın müəllifinin başqa ünvan olduğunu elan etdi

Vətəndaş və İnkişaf Partiyasının sədri Əli Əliyevin bu ilin aprelində onun adı ilə bağlı ortaya çıxan məşhur xəyanət mətninə görə günahkar elan edib partiyadan çıxardığı gənclərlə iş üzrə müavini Nurəddin Babayevi VİP-ə qaytardığı haqda ötən həftə “Yeni Müsavat”ın yaydığı xəbər rəsmi təsdiqləndi. Belə ki, dünən Əli Əliyev “Hürriyyət” qəzetinə müsahibəsində “Yeni Müsavat”ın yaydığı xəbəri təsdiqləyib. Əli Əliyev deyib ki, ötən həftə partiyanın Məclisində Nurəddin Babayevin VİP üzvlüyünə bərpa edilməsi məsələsi müzakirə edilib və müsbət qərar qəbul olunub.

Maraqlıdır ki, VİP sədri 4 ay əvvəl günahkar elan edib partiyadan uzaqlaşdırdığı N.Babayevi təmizə çıxarmaq və adını çəkmədiyi mücərrəd birisini əsas günahkar kimi təqdim etməyə çalışır: “Dörd ay əvvəl qəbul etdiyimiz qərarın birinci bəndi ondan ibarət idi ki, prosesə aydınlıq gətirilənədək Nurəddin Babayevin VİP sıralarında üzvlüyü dayandırılsın. Bu, heç bir halda partiyadan qovulma deyildi, çünki onun günahı sübuta yetirilməmişdi. Məhdud bəlli var idi ki, günahkar ehtimal etdiyimiz şəxsi həmin çevrənin içində axtarmaq lazım idi. Təəssüf ki, həmin çevrədə bizim ehtimal etdiyimiz iki şəxs bu araşdırmanın aparılmasında bizə yardımçı olmadı. Biri ümumiyyətlə, partiya ilə əlaqələrini tam kəsib, hansı ki, Nurəddin Babayev məlum mətnin göndərildiyi elektron ünvanını ona veribmiş. Biz ümumiyyətlə Nurəddin Babayevin elektron ünvanının parolundan istifadə edə biləcək şəxslərin siyahısını çıxarmışdıq. İstisnalarla gəlib çıxdıq həmin iki nəfərin üzərinə. Həmin şəxslərdən də biri telefonlarımıza cavab vermədi, həmin gündən qərargahımıza gəlmədi, bizimlə bütün əlaqələrini kəsdi. Nurəddin Babayevin isə baş verən hadisədə ancaq səhlənkarlıq məsuliyyəti olub. Onun bu 4 aydakı davranışı müsbət qiymətləndirilib və Məclisdə onun partiya üzvlüyünə qoyulmuş məhdudiyyət aradan götürülüb”.
Xatırladaq ki, AVCİYA-nın 16 aprel 2010-cu il tarixində təşkil etdiyi konfransın yekunlarına dair hazırladığı kitabda müəllifinin VİP sədri Əli Əliyev olduğu göstərilən mətndə İsa Qəmbərin və Əli Kərimlinin siyasi səhnədən necə çıxarılması, onların partiyalarının necə çökdürülməsi konsepsiya şəklində əksini tapırdı. Əli Əliyev həmin mətnin ona məxsus olmadığını bəyan edərək bir müddət sonra müttəfiqə xəyanət (O dövrdə VİP “Azadlıq” blokunda Əli Kərimli ilə müttəfiq idi) mətninin VİP sədrinin gənclərlə iş üzrə müavini Nurəddin Babayevin elektron ünvanından göndərildiyini bəyan eləmişdi. N.Babayevi isə cəza olaraq partiyadan kənarlaşdırmışdı. N.Babayev isə media ilə heç bir təmas qurmadığından məsələ bu şəkildə ört-basdır edilmişdi.
Onu da xatırladaq ki, N.Babayev VİP-dən çıxarılan zaman bu addımın Əli Əliyevin özünü təmizə çıxarmaq üçün bir oyun olduğunu “Yeni Müsavat” olaraq yazmışdıq.

E.SEYİDAĞA

795 dəfə baxılıb