YAP SİYAHISINI AÇIQLAMADI | Siyasət

	12 fevral 2012


Onlayn ictimai-siyasi qəzet

Siyasət

YAP SİYAHISINI AÇIQLAMADI

2010-09-08

Hakim partiya namizədlərini Müsavatla AXCP-dən sonra elan edəcək

Seçki kampaniyası dünən rəsmən başladı. Artıq sənədlərini Mərəkəzi Seçki Komissiyasına təqdim edən seçki blokları da var. Hakim Yeni Azərbaycan Partiyası isə dünən də deputatlığa namizədlərinin siyahısını açıqlamadı. Qeyd edək ki, hakim partiyanın siyahısını açıqlamaması indiyə qədər ən müxtəlif rəylərin ortaya çıxmasına səbəb olub.

Bəziləri bunu hakimiyyətdəki qrupların siyahıya öz adamlarını daha çox yerləşdirmək uğrunda mübarizəsi ilə, bəziləri isə YAP-ın taktiki gedişi ilə əsaslandırır. YAP-ın rəhbərliyinə daxil olan şəxslər isə bir neçə dəfə bəyan ediblər ki, onlar müxalifətin namizədləri siyahısının açıqlanmasını gözləyirlər.
YAP-ın icra katibinin müavini, deputat Mübariz Qurbanlı isə dünən mediaya müsahibəsində qeyd edib ki, siyahının açıqlanmaması partiyanın seçki taktikasıdır: “YAP seçkiyə tam hazırdır, partiyamız seçkidə qələbə çalmaq əzmindədir. Keçirdiyimiz bütün rəy sorğuları da bunu deməyə əsas yaradır. Eyni zamanda prezidentimiz və partiyamızın sədri İlham Əliyevin həyata keçirdiyi siyasətin əhali, seçicilər tərəfindən müdafiə olunması, bizim irəli sürəcəyimiz namizədlərin də müdafiə edilməsi, dəstəklənməsi bunu deməyə əsas verir. Hakim partiya növbəti seçkilərdə iştirak edəcək namizədlərini müəyyənləşdirərkən həmin namizədlərin partiyadakı əsas fəaliyyəti və seçicilər qarşısında götürdüyü öhdəlikləri yerinə yetirməsi məsələlərinə daha çox diqqət yetirir. Eyni zamanda, həmin şəxslərin - onlar YAP-ın parlamentdəki təmsilçiləri, yaxud da yenidən namizəd olacaq şəxslər ola bilər. O bölgədə, o əhatədə olan nüfuzu və əhali içərisində onlara veriləcək dəstək məsələləri də diqqət mərkəzindədir”.
Deputat YAP-ın namizədlər siyahısının açıqlanması adı altında mətbuatda gedən ajiotajı başa düşmədiyini deyib: “Hər bir partiyanın seçki siyasəti, taktikası, strategiyası var. Hər bir partiya seçkiyə gedəcək namizədlərini, nümayəndələrini, yəqin ki, zamanında müəyyənləşdirir, vaxtı gələndə onu açıqlayır. Bu gün qanun bizə hansısa bir formada namizədlərimizin hansı dairədən gedəcəyini açıqlamağı məcbur etmir. Biz namizədlərimizi seçki qanunvericiliyinin tələblərinə uyğun olaraq zamanında açıqlayacağıq. YAP-ın siyahı problemi və bununla əlaqədar olaraq da hər hansı bir bağlı, qapalı söhbət yoxdur”.
Dünən günün sonunda əldə etdiyimiz məlumatda isə deyilir ki, YAP Müsavat-AXCP seçki blokunun vahid namizədlər siyahısının elan olunmasından dərhal sonra namizədlərinin siyahısını açıqlayacaq. Bu hadisə isə hər halda ya bu gün, ya da sabah baş verə bilər. Çünki Müsavat-AXCP seçki bloku bu gün elan olunacaq.

Etibar SEYİDAĞA

843 dəfə baxılıb