BAKIDA ORİJİNAL AKSİYA | Son_xəbər

	23 may 2012


Onlayn ictimai-siyasi qəzet

Son xəbər

BAKIDA ORİJİNAL AKSİYA

2011-08-13

Gənclər paytaxtın mərkəzində dustaq paltarında siyasi məhbuslara dəstək verdilər

Gənc Siyasi Məhbusların Müdafiəsi Komitəsi 12 avqust Beynəlxalq Gənclər Günü münasibətilə “Demokratiya məhbəsdə” şüarı ilə səssiz aksiya keçirib. Aksiya dünən saat 14.00-da Fəvvarələr bağında baş tutub. Aksiyada üç nəfər gənc məhbus geyimində, əllərində barmaqlıqlar içərisində yazılmış demokratiya plakatı tutaraq hərəkət ediblər. Onların arxasınca bir qrup gənc əllərində həbsdə olan gənclərin - Ruslan Bəşirlinin, Cabbar Savalanın, Bəxtiyar Hacıyevin, Tural Abbaslının, Əhəd Məmmədlinin, Elnur Məcidlinin, Rüfət Hacıbəylinin, Elnur İsrafilovun, Ülvi Quliyevin fotolarını tutublar.

Aksiyanı keçirməkdə məqsəd gənclərin həbsi ilə ölkədə demokratiyanın həbs olunduğunu, insan haqlarının kobud şəkildə pozulduğunu vətəndaşların nəzərinə çatdırmaq olub.

Aksiyanı maraqla izləyən vətəndaşlar fotolardakı gənclərin bəzilərini, xüsusən də Cabbar Savalanı tanıyaraq “biz sizinləyik”, “sizin tərəfinizdəyik” deyə mesajlar verib. Aksiya 15 dəqiqə davam edib. Qeyd edək ki, polisin aksiyadan xəbəri olmadığından tədbir qarşıdurmasız başa çatıb.
Xatırladaq ki, Azərbaycanda hazırda doqquz nəfər gənc siyasi fəaliyyətinə görə həbsdədir. Onların hüquqlarının müdafiəsi və azadlıqa çıxmalarına dəstək məqsədilə bir neçə gənclər təşkilatları birləşərək Gənc Siyasi Məhbusların Müdafiəsi Komitəsini yaradıblar. Bunlar Xalq Cəbhəsi, Müsavat, Azərbaycan Demokrat və Ümid partiyalarının gənclər təşkilatları, “Azad Gənclik”, “Nida”, İnsan Haqları Klubu, Cabbar Savalanın və Bəxtiyar Hacıyevin müdafiə komitələridir.

Fərahim İLQAROĞLU

4004 dəfə baxılıb