MOSKVA DONACAQ | Son_xəbər

	23 fevral 2012


Onlayn ictimai-siyasi qəzet

Son xəbər

HƏRBÇİ AİLƏLƏRİNƏ QARŞI QƏDDAR ADDIM

2012-01-30

Bayraq Meydanı ətrafında sakinləri qışın sazağında küçəyə tökmək istədilər

Azərbaycan hökuməti qar, şaxta, borana məhəl qoymadan vətəndaşları öz evlərindən küçəyə atmaqdan çəkinmir. Yanvarın 29-u, şaxtalı havada Dövlət Bayrağı Meydanı həndəvərində yaşayan 28 hərbçi ailəsinin yaşadığı binanı sökməyə başlayıblar. “Azvirt” şirkətinin işçiləri hərbçi ailələrinin evlərinə hücum çəkərək söküntü işlərini aparmağa cəhd ediblər. Bu zaman şirkət işçiləri ilə sakinlər arasında qarşıdurma yaranıb.

Bu barədə redaksiyamıza həmin bina sakinlərindən biri məlumat verib. Hadisə yerinə çatanda öyrəndik ki, bir qədər öncə sakinlər soyuq havada “Azvirt” şirkətinin nümayəndələri ilə mübahisə ediblər. Onlar belə havada evlərinin sökülməsinə etirazlarını bildiriblər. Belə ki, mülkiyyət sahiblərinə xəbərdarlıq edilmədən söküntüyə başlayıblar. Ancaq sakinlərin etirazından sonra əraziyə Bakı Şəhər İcra Hakimiyyətinin (BŞİH) nümayəndəsi Eldar Yunusov gəlib. Hərbçi ailələri meriya nümayəndəsinə öz təkliflərini irəli sürüblər. Vətəndaşlar tələb ediblər ki, ya qanun çərçivəsində normal kompensasiya ödənilsin, ya da onlara veriləcək mənzillərin dəyəri düzgün qiymətləndirilsin. E.Yunusov onların təklifinə bu həftə ərzində meriyadan cavab gələcəyini deyərək ərazini tərk edib. O, mülkiyyət sahiblərindən vaxt istəyib. Söküntü işləri isə müvəqqəti dayandırılıb.

Söhbət zamanı bəlli oldu ki, sakinlərə cəmi 10 min manat həcmində təzminat təklif olunur. Ancaq bu təzminat dövlət və onun rəsmi strukturlar tərəfindən yox, zərərçəkən ailələrin başçılarının çalışdığı hərbi hissə tərəfindən ödənilib. Bu isə təzminatdan çox, humanitar yardım xarakteri daşıyır. Narazı insanlar hər yerdə olduğu kimi onlara da kvadratı 1500 manatdan kompensasiya tələb edirlər.
Onlar hərbçi ailəsi olduqlarını və dövlətin bu faktoru nəzərə almasını istədilər: “Biz dövlətə qulluq edirik. Ancaq bizə qarşı belə hörmətsizlik olunur, soyuq havada bizi küçəyə tökmək istəyirlər. Şaxtaya, borana baxmadan gəlib binanı sökməyə başlayırlar. Bu hansı vicdana sığışır? Bizə kiminsə yardımı lazım deyil, qanunla kompensasiya versinlər. Mülkiyyət haqda qanuna əməl olunsun”.

Xatırladaq ki, Bayraq Meydanı ətrafında baş verən maxinasiyaları ictimailəşdirən, hərbçilərin hüquqlarını qoruyan “İnamla hüquq” MMC-nin direktoru, hüquq müdafiəçisi Bəxtiyar Məmmədov dekabrın 30-da həbs edilib. O, açıqlama vermişdi ki, Hərbi Dəniz Qüvvələrinin komandiri, vitse-admiral Şahin Sultanov Meydan ərazisinin genişləndirilməsindən sui-istifadə edərək 28 hərbçi ailəsinin evlərini qanunsuz olaraq əllərindən alır, qarşılığında isə onlara naməlum mənbədən 10 min manat kompensasiya ödəyir.

Emil SALAMOĞLU

4113 dəfə baxılıb