NEMƏT PƏNAHLININ EVİNİN İŞIĞI YANDI | Son_xəbər

	23 may 2012


Onlayn ictimai-siyasi qəzet

Son xəbər

NEMƏT PƏNAHLININ EVİNİN İŞIQ PROBLEMİ HƏLL EDİLDİ

2012-02-05

“Azadlıq aşiqi”nin enerji borcu ictimai yardımlaşma yolu ilə ödənib

Həbsdə olan AMDP sədri, xalq hərəkatının öncüllərindən olan Nemət Pənahlının mənzilinə elektrik verilişi bərpa edilib. Bu, Pənahlının evinin “Bakıelektrikşəbəkə”yə olan 1000 manatdan çox enerji borcunun ödənməsindən sonra baş tutub. Həmin məbləğ isə “İnsan Haqları Uğrunda” İctimai Birliyin sədri Eynulla Fətullayevin başlatdığı ictimai yardımlaşma kampaniyası zamanı toplanıb.

Bu haqda “Yeni Müsavat”a məlumat verən E.Fətullayev dedi ki, bir neçə gün öncə o, N.Pənahlının ailəsinin şaxtalı-boranlı günlərdə işıqsız qalmaması üçün müxtəlif tanınmış ictimai-siyasi xadimlərə müraciət edib: “Sirus Təbrizli, Cəmil Həsənli, Fazil Mustafa, İqbal Ağazadə, Eldar Namazov, Əkrəm Əylisli, Qüdrət Həsənquliyev, İlyas İsmayılov və digər şəxslərlə əlaqə saxlayıb bu problemin həllinə köməklik göstərmələrini xahiş etdim. Bəlli oldu ki, burada söhbət yalnız borcun ödənməsindən getdiyi üçün biz ictimai yardımlaşma yolu ilə məsələni həll edə bilərik. Mən bu barədə kampaniya elan etdim və adları qeyd olunan şəxslərdən başqa hətta iqtidarda təmsil olunan bəzi adamlar da dəstək verdilər. Bu, bizim milli dəyərlərimizdən irəli gələn bir məsələdir. Şəxsin hansısa siyasi mövqeyindən, haçansa səhv buraxmasından asılı olmayaraq belə vəziyyətlərində həmin adamlara kömək durmalıyıq. Belə situasiyaları həbsdə olan insanlar daha yaxşı başa düşür. Mən özüm də həbsxanada olmuşam və bunun nə demək olduğunu anlayıram. Tanımadığım xeyli sayda sadə adamlar da bizimlə əlaqə saxlayıb Pənahlı ailəsinə kömək etmək istədiyini bildirdilər. Bu, ictimai şüurla bağlı çox müsbət bir haldır. Məni hər zaman cəmiyyətdə biganəlik narahat edib. Hesab edirəm ki, artıq bu buzu sındıra bilmişik. Biz toplanan vəsaiti fevralın 3-də Nemət Pənahlının ailəsinə təqdim etdik, borc ödəndi və mənzilə elektrik verilişi bərpa edildi. Biz orada olarkən Nemət Pənahlı da həbsxanadan evinə telefon açdı və işıqlarının yandığını bilincə sevindi, bu işə köməklik göstərənlərə təşəkkürünü bildirdi. Bu cür ənənələri davam etdirilməlidir. Mən hazırda vicdan məhbusu Şahin Həsənlinin durumu ilə bağlı çalışıram. Onun özünün və ailəsinin vəziyyəti ağırdır, ona kömək göstərilməsi üçün "Sərhədsiz reportyorlar" təşkilatına müraciət etmişəm. Çünki o, ifadə azadlığına görə həbs olunmuş insandır".

Elşad MƏMMƏDLİ

1871 dəfə baxılıb