“LONDON TAKSİ”LƏRİNİN VƏ QUM SƏPƏNLƏRİN QIŞ FIRILDAĞI (FOTOLAR)

	23 may 2012


Onlayn ictimai-siyasi qəzet

Son xəbər

“LONDON TAKSİ”LƏRİNİN VƏ QUM SƏPƏNLƏRİN QIŞ FIRILDAĞI (FOTOLAR)

2012-02-04

Bəzi taksi sürücüləri qarlı-boranlı hava şəraitindən istifadə edərək, taxometri qoşmaqdan imtina edirlər

Bir neçə gündür davam edən soyuq hava şəraiti təkcə yolları yox, həmçinin şəhər nəqliyyatını da doduraraq sıradan çıxarıb.

Şəhər meriyasının fövqəladə vəziyyətə hazır olmaması yolların qar və buzunun günlərlə qalmasına səbəb olub. Bu vəziyyətdən ən çox yararlananlar isə bəzi taksi sürücüləridir. Belə ki, şəhərin mərkəzindəki “London taksi”ləri müştəri mindirərkən taxometri söndürərək, qarı və buzu bəhanə gətirirlər. Əməkdaşımız belə hallardan biri ilə bu gün Mərkəzi Univermağın və “Gənclik” metro stansiyasının qarşısında qarşılaşıb. “90 AT 354” nömrəli “London taksi”si taxometri qoşmaqdan imtina edib. O, “Gənclik”metro stansiyasından “Köhnə Samsunq”a getmək üçün 5 manat istəyib. Taksi sürücüsünün qanunsuz əməlləri ilə bağlı əməkdaşımız “Bakı Taxı Company”nın 411-74-71 nömrəli qaynar xəttinə zəng vuraraq şikayət edib. Sürücü isə “Gedin hara deyirsiniz deyin. Onlar özləri bizə deyiblər. Biz də taxometri qoşmuruq”, söyləyib və sona qədər taxometri qoşmaqdan imtina edib.

Hava şəraiti ilə bağlı olaraq bir çox insan şəxsi maşınları ilə yola çıxmayıb. Hətta bəzi marşurutların xəttə çıxmaması taksi işbazları üçün göydən düşmə fürsət olub. Son üç gündə isə paytaxtın mərkəzində dayanan taksilər qiymətləri fantastik dərəcədə artırıblar. Sürüclərin sözlərinə görə, adi günlərdə 5 manata getdikləri yolu, yolların buz bağlamasına görə 15 manata gedirlər. “London taksi”lərindən birinin sürücüsü Əkrəm Əliyev deyir ki, hava ilə bağlı planı ödəyə bilmədiklərinə görə vəziyyətdən çıxmaq üçün bu yola əl atmalı olublar. Çünki saatlarla yolda qalırıq. Bu da əlavə yanacaq və vaxt itkisinə səbəb olur”.
15 ildir taksi sürcüsü olduğunu deyən Ə.Əliyev hökümətin qara məğlub olduğunu, şəhər meriyasının isə qış yuxusuna getdiyini söyləyir: “Bu dəqiqə paytaxtın bütün ara və magistiral yolları qar və buzun içərisindədir. Paytaxtın ən çox təhlükəli yerləri Yasamal və Əhmədlidir ki, oraya da mərkəzdən getməyin qiyməti 15-20 manat arasında dəyişir. Neftçilər prospektində qumsəpən maşını 5 dəqiqədən bir görə bilərsiniz. Bayaq maşına yaxınlaşanda öyrəndik ki, maşının içərisində bir qaşıq qum yoxdur. Gözdən pərdə asmaq üçün çıxarıblar küçələrə”.

Fərahim İLQAROĞLU
Fotolar müəllifindir

5854 dəfə baxılıb