PREZİDENTİN AZADLIĞA BURAXILAN SİNİF YOLDAŞI “YENİ MÜSAVAT”a DANIŞDI

	24 may 2012


Onlayn ictimai-siyasi qəzet

Son xəbər

PREZİDENTİN SİNİF YOLDAŞI HƏBSDƏN ÇIXDI

2012-02-23

Elşən Həsənov: “Hamıya azadlıq arzulayıram, həbsxanadakılara da, çöldəkilərə də”

Müsavat Partiyası Sabunçu rayon təşkilatının 2 aprel aksiyasına görə həbs olunan üzvü Elşən Həsənov dünən azadlığa buraxılıb. Mətbuatdan həm də dövlət başçısının sinif yoldaşı kimi tanınan E.Həsənovun azadlığa buraxılmasını eşidib dərhal onunla görüşmək üçün evinə yollanırıq. Bizi Elşən bəyin həyat yoldaşı Rəna xanım qarşılayır. Paytaxtın Sabunçu rayonunda kiçik məhəllədə yerləşən evinə girdiyimizdə keçmiş məhbus o qədər də isti olmayan otağın küncünə qoyulmuş kresloda oturub telefonla danışırdı.

Telefon zəngi bitir, sonra təkrar zəng. Beləcə, Elşən bəyin təkrarlanan zənglərdən canını qurtarmasını gözləyirik. Deyəsən bunu hiss edir və gülür: “Həbs olunmaq yaxşıdır, azadlığa buraxılmaq ondan da yaxşıdır”,- deyə on aylıq həbsinə zarafatyana münasibət bildirir. Səbəbini də söyləyir: “Hamı səni axtarır, zəng edib təbrik edir. Telefonlar susmur”. Zəng edənlər isə onlarladır. Müsavat başqanı İsa Qəmbərdən tutmuş, sıravi müsavatçılara, dostlara, tanışlara qədər.
Elşən bəy deyir ki, vaxtından bir ay tez buraxılmasının səbəbi məhkəmə ilə çıxmağa ərizə yazmasıdır: Həbsxana rəisi Ərşad müəllim belə məsləhət bildi. Görünür, yuxarılarla məsləhətləşib və razılıq veriblər. Gəlib dedi ki, yaşıl işıq yandırdılar sənin üçün.

Bir də gördüm ayın 21-də Xəzər məhkəməsindən gəldilər. hakim Fatma xanım və yanında gələnlər dedilər ki, heç birimiz razı deyilik səni buraxmağa. Soruşdum ki, məcbursuz? Dedi ki, hə",- fikirlərini tamamlayır və az sonra soruşur: “Vaxtından tez çıxmaq pisdir bəyəm?”. Mitinq məhbusunun sözlərinə görə, həbsxanada məhkumlar tez-tez bu cür ərizələr yazırlar: “Həbs müddətinin üçdə ikisi, dörddə üçü bitmiş məhkumlar vaxtaşırı bu cür ərizələr yazırlar. Ayda bir dəfə də, hər ayın 5-6-sı məhkəmə keçirilir, buraxılan da olur, buraxılmayan da. Məsələn, iki ay əvvəl cəbhəçi Elnur Məcidli də məhkəmə üçün ərizə yazmışdı, amma buraxmadılar. Ancaq bu dəfə tək mənim üçün məhkəmə keçirildi. Dustaqlar deyirlər ki, indiyə qədər bir nəfər üçün burada məhkəmə keçirilməyib. Yəqin əvvəl də ərizə yazsam, buraxardılar. Sadəcə, ağlıma gəlməyib”.

Yeni il ərəfəsində əfvə düşmədiyini kədərlə vurğulayan Elşən bəy deyir ki, əfv üçün ərizə yazmasa da, əfvə düşəcəyini gözləyirmiş: “Özüm yazmadım. Yazsınlar da hüquq müdafiəçiləri”. Söhbətdən hiss olunur ki, keçmiş məhbus hüquq müdafiəçilərinin onun müdafiəsi üçün etdiklərindən o qədər də razı deyil. Ancaq konkret ad da çəkmir, bildirir ki, hüquq müdafiəçiləri bacardıqlarını ediblər: “İmkanlarına görə müdafiə ediblər, gücləri çatan qədər iş görüblər. Yəqin imkanları az imiş”. O, həm də deyir ki, həbsxanadakı bütün məhbuslar əfv gözləyirlər: “Hamı əfv, amnistiya barədə danışır, bütün günü bununla bağlı söhbətlər gedir. Əfv barədə söhbətlər çıxanda hamı ümid edir ki, azadlığa qovuşacaq. Siyahıdan sonra da..."

Keçmiş məhbus səhhətindəki problemlərdən də danışır. Onun sözlərinə görə, həkimlər onun müayinəsini həftələrlə yubadıblar: “Xəstəxanada məni müalicə etmək istəmirdilər. Bununla bağlı "Yeni Müsavat" qəzetində xəbər gedəndən sonra əl-ayağa düşdülər. Bir ay idi mənə bir dənə də olsun dərman verməmişdilər, düz bir ay. Ancaq sonradan hətta başqa xəstəxanaya aparıb ayağıma görə dəqiq müayinədən keçirdilər. Diaqnoz qoydular və əlillik dərəcəsi verdilər. Ayağıma görə ikinci dərəcəli əlil olduğumu dedilər, ancaq hələ kağızı ala bilməmişəm. Həbsxanadan çıxanda da Xəzər VTEK-in işçiləri gəlmişdilər, dedilər ki, idarəyə gəlib kağızı alarsan. Yəqin rüşvət istəyəcəklər".

Sonda Elşən bəy deyir ki, hamıya azadlıq arzulayır: “Həbsxanadakı dustaq yoldaşlarıma, elə çöldəkilərə də azadlıq arzulayıram. Elə ölkədəki vətəndaşların hamısı dustaq kimi yaşayırlar. Arabir həbsxanada qəzetləri oxuyurdum, heç xoşuma gəlmir ölkədəki vəziyyət. Türməni heç kimə arzulamıram. Oradan çöl daha pis görünür”.
Elşən bəyin həyat yoldaşı Rəna xanım isə deyir ki, həbsxanaya düşməsi onların heç birinin mübarizədən çəkilməsinə səbəb olmayacaq: “Mən özüm də müsavatçıyam. Sağ olsunlar müsavatçılar, Elşən həbsdə olanda mənə dəstək verdilər. Mübarizə davam edəcək, davam etməlidir də”.

Söhbətimizi bitirib Rəna xanımın qurban dediyi qoçu kəsdirməyə gedirik. Onların evlərinin yaxınlığındakı ət dükanının qəssabı qoyunu tez-bazar kəsib soyur və “Allah qəbul etsin”,- söyləyir. Elşən bəy isə yoldan ötən tanışlarla salamlaşıb hal-əhval tutur. Rəna xanım həyat yoldaşının həbsdən sağ-salamat çıxması üçün qurban deyibmiş. Və həm də bir daha həbsxana yollarında qalmaması ümidilə qurban payını böləcəyini söyləyir. Biz də elə bu ümidlə, həmçinin Elşən bəylə xanımını həmişə mübarizə yollarına görmək arzusu ilə onlardan ayrılırıq...

Röya RƏFİYEVA

11520 dəfə baxılıb