“YENİ MÜSAVAT”IN 4444-CÜ SAYI ÇAPA HAZIRLANIR

	24 may 2012


Onlayn ictimai-siyasi qəzet

Son xəbər

“YENİ MÜSAVAT” 4444-cü SAYINI QEYD ETDİ

2010-05-20

Rauf Arifoğlu: “5555-ci sayımızda da ölkənin, regionun birinci qəzeti olacağımıza inanıram”

Bu gün “Yeni Müsavat” qəzetinin 4444-cü sayı işıq üzü gördü. Dünən qəzet kollektivi bu əlamətdar günü qeyd etmək üçün redaksiyada nahar süfrəsi arxasında tədbir keçirdi.

“Yeni Müsavat”ın təsisçisi və baş redaktoru Rauf Arifoğlu dedi ki, belə əlamətdar tarixlərdə bir anlıq dayanıb bu cür rəqəmin arxasında duran informasiyanı, zamanı hesablamalı olursan: “4444 dəfə qəzet çıxarmaq 12 il, üstəgəl ay yarım dayanmadan işləmək deməkdir. Azərbaycanda çox az sayda qəzet belə göstəriciyə sahibdir. Bu illər ərzində ”Yeni Müsavat"a çox adamlar gəlib-gedib. Nə xoşbəxt onlara ki, həmişə meydanda və öndə olan qəzetdə çalışıblar. 5555-ci sayımızda da qəzetimizin ölkənin, regionun birinci qəzeti olmasını arzu edirəm".

“Yeni Müsavat”ın redaktoru Zabil Müqabiloğlu dedi ki, jurnalistika qazanc yerindən çox şərəf yeridir: “Bizim jurnalistika ilə məşğul olduğumuz illərdə Azərbaycanda çox hadisələr baş verib. İllər keçəcək, bizim yazdıqlarımızdan arxiv, araşdırma kimi istifadə edəcəklər. 4444 dəfə ”Yeni Müsavat" kimi qəzet çıxarmaq, bu qədər sayda haqsızlığın, zülmün üstünə getmək hər dəfə də minlərlə oxucunun ürəyindən tikan çıxarmaqdır. Azərbaycan şərtləri altında bu, o qədər də asan iş deyil. Arzu edirəm ki, qəzetimiz həmişə köşklərdə, əllərdə olsun".

Qəzetimizin parlament müxbiri Elşad Paşasoy Azərbaycanda jurnalistika ilə məşğul olmağı qəhrəmanlıq adlandırdı: “1000-ci nömrəni elə bil dünən qeyd etmişik. Həmin günlərin ağırlığı, hər gün ölüm təhdidi ilə üz-üzə qalmağımız yaddan çıxmayıb. ”Yeni Müsavat"da bir gün belə çalışmaq jurnalistikaya, ölkəyə xidmət deməkdir".
Tədbir maraqlı replika və çıxışlarla, zarafatlarla, təbii ki, həm də ləzzətli yeməklərdən dadmaqla davam etdirildi. Sonra da hərə öz kompyuterinin arxasına çəkilib başladı yazmağa...