KİM SEVİRSƏ İDMANI... | Yaşam

	12 fevral 2012


Onlayn ictimai-siyasi qəzet

Yaşam

KİM SEVİRSƏ İDMANI...

2010-01-31

Tanınmışlar idmanın hansı növü ilə məşğul olur?

“İdman sağlamlığın rəhnidir”. Yəqin ki, məşhur “Qaynana” filmindəki bu ifadə çoxlarının hələ yadından çıxmayıb. İnsan sağlamlığının bir nömrəli təminatçısı olan idmanın ən müxtəlif növləri mövcuddur. Əgər əvvəllər bu işlə tək kişilər məşğul olurdusa, artıq qadınlarımız da idmana böyük həvəs göstərirlər.

Günümüzdə idmanla məşğul olmaq insanlar arasında kütləvi hal alıb. Hər kəs öz sağlamlığı naminə idmanın bir sahəsinə maraq göstərir. İqtidar mənsubları arasında idmanın müxtəlif növlərinə maraq göstərənlər sayı seziləcək dərəcədə artıb. Məmurları paytaxtın bəlli ərazilərində fəaliyyət göstərən idman mərkəzlərində tez-tez görmək olar. Bəs digərləri necə, idmanla məşğul olurlarmı?
Millət vəkili Fəzail Ağamalı idmanın bir çox növləri ilə maraqlanır: “Əsasən yüngül atletika, voleybol ilə məşğul olmuşam. Boş vaxtlarımda tennis oynamışam. İdmana meylli olduğum üçün bəzən güləşlə də məşğul olduğum olub. İndi isə imkan tapanda üzürəm. Çalışıram ki, daha çox gəzim. İdmandan çox əyləncə növü olsa da bilyard oynamağa üstünlük verirəm”.
Müsavat Partiyası Mərkəzi İcra Aparatının rəhbəri Arif Hacılı stolüstü oyunlarla maraqlanır: “Mən əsasən şahmat, futbol və tennis oynamağa üstünlük vermişəm. Yay aylarında futbol və stolüstü tennis oynayıram, daha çox stolüstü oyunları tərcih edirəm”.
Professor Qabil Hüseynli daha çox qaçır: “İdmanın yüngül növlərinə üstünlük verirəm. Adətən qaçıram, imkan olanda velosiped sürürəm. Əvvəllər mini futbol oynayırdım, indi bunu dayandırmışam. Ümumiyyətlə idmanın yüngül növləri ilə professional şəkildə deyil, amma can sağlığını qorumaq üçün məşğul oluram. Yatmazdan əvvəl qaçmağa çalışıram”.
“Əvvəllər sərbəst güləşlə məşğul olmuşam, indi isə daha çox yeriməyə üstünlük verirəm, hər səhər on beş dəqiqə qaçıram” bunları isə millət vəkili Arzu Səmədbəyli söylədi.
AMİP-in mətbuat xidmətinin rəhbəri Əli Oruclu güləşlə məşğul olub: “Heç vaxt professional şəkildə idmanla məşğul olmamışam. Uşaq vaxtı güləşə getmişəm. Müəyyən qədər futbol oynamağı da sevmişəm”.
Millət vəkili Asim Mollazadə də idmanla məşğul olur: “İndi daha çox yeriyirəm, amma zamanında güləşlə məşğul olmuşam”.
Millət vəkili Nəsib Nəsibli isə idmanın yalnız qaçış növü ilə məşğul olur.
Qəzetimizin köşə yazarı Tofiq Yaqublu futbol oynamağa üstünlük verənlərdəndir: “Mən gənclikdə güləşlə məşğul olsam da indi mütəmadi olaraq futbol oynayıram”.

ŞAHNAZ

992 dəfə baxılıb