SAÇ TÖKÜLMƏSİNİ ÖNLƏMƏK OLAR, ƏGƏR...

	13 fevral 2012


Onlayn ictimai-siyasi qəzet

Yaşam

SAÇ TÖKÜLMƏSİNİ ÖNLƏMƏK OLAR, ƏGƏR...

2010-02-02

Mütəxəssislərə görə, irsilik, hormonal faktor, keyfiyyətsiz qidalanma, texnogen faktorlar və stress prosesin əsasında durur

Statistik məlumatlara əsasən dünya əhalisinin 56 faizi saç tökülməsinə meyllidir. Saçı tökülənlərin 95 faizini isə kişilər təşkil edir. Maraqlıdır, niyə daha çox güclü cinsin nümayəndələri saç tökülməsindən əziyyət çəkir?

Kosmetoloq Sevda Muradovaya görə, kişilərin saç tökülməsinə cavabdeh olan testosteron hormonu zaman ötdükcə və daxildəki maddələr mübadiləsindən asılı olaraq dihidrotestorstorona çevrilir ki, nəticə etibarilə tük kökündə qan dövranı pozulur: “Bu zaman hormonların toksik təsiri başlayır. Follikulyar tük kökü ətrafında mikrosirkulyasiya pozulur, qidalanma zəifləyir. Normal tüklər getdikcə daha nazik tüklərlə əvəz olunur. Son mərhələdə saç tökülür, dazlıq əmələ gəlir”.
S.Muradova ona müraciət edənlərin içərisində kişilərin üstünlük təşkil etdiyini söylədi: “Çoxu kişidir. Bununla belə, 35-40 yaşdan sonra qadınların da saçı tökülür. Cinsi hormonlar dəyişikliyə uğrayır, balans pozulduğundan, qadınlarda keçəlləşmə baş verir. Xroniki proseslər, endokrin problemlər, qan azlığı və digər amillər saç tökülməsinə gətirib çıxarır. Həmçinin öd kisəsi problemləri prosesi sürətləndirir”.
Kosmetoloq tükün təbii yolla bərpası yollarından həkimlərin istifadə etdiklərini qeyd etdi: “Təbii yolla peşəkar həkim rəy verdikdən sonra qan dövranı müalicə ilə bərpa olunur. Müalicə nəticəsində biz tüklərin bərpasına nail oluruq”.
S.Muradova müalicəyə saç tökülməsi nəzərə çarpan kimi, ilk 2-3 il ərzində başlamağı vacib sayır: “Müəyyən yaş dövründə erkən saç tökülməsi dayanır. Bu, kişilərdə erkən hormonal inkişafla bağlı ola bilir. 25-30 yaşa qədər dövrdə tökülmə sakitləşir”.
Tibb elmləri doktoru, professor Adil Qeybulla saç tökülməsinin səbəblərinin çox olduğunu dedi: “Bunlardan bir qrupu anadangəlmə, yəni irsidir. Valideynlərində saç tökülməsi dominant olan kişilərdə bu daha çox özünü göstərir. Bu da həm hormonal, həm yağlı seboreyanın olmasını şərtləndirir. Əsas faktorlar bunlardır. Radiasiya, qidalanma tərzi, radio siqnalları, tezliklər, mobil telefon, radio telefonları də prosesə öz neqativ təsirini göstərir. Keyfiyyətsiz qidalanma, zülal defisiti də saç tökülməsində öz rolunu oynayır. Yəni daxili və xarici amillər məsələsi var”.
A.Qeybulla tökülən saçların bərpası üçün istifadə olunan üsullara da toxundu: “Autosaçların əkilməsi ilə ölən tüklərin bərpası həyata keçirilir. Bunun ziyanı yoxdur, çünki insanın öz saçından istifadə olunur. Sözsüz ki, burada normal fizioloji istiqamət gözlənilir. Onunla yanaşı, heterogen saçların saçlar əkilməsi məsələsi də sınaqdan keçirilir. Yəni insanın özündən yox, başqa insandan, başqa canlıdan götürülən nümunələr hesabına tüklərin bərpası nəzərdə tutulur. Bu baxımdan hazırda kötük hüceyrələr üzərində tədqiqatlar aparılır”.
Bir çox mütəxəssislərə görə, saçların tökülməsində stresslər, yəni sinir sisteminin vəziyyəti də az rol oynamır.

Nailə RÖVŞƏNQIZI

2501 dəfə baxılıb