QARLA BACARMAYAN HÖKUMƏT... | Yazarlar

	24 may 2012


Onlayn ictimai-siyasi qəzet

Yazarlar

QARLA BACARMAYAN HÖKUMƏT...

2012-02-13

Qarabağda nə edəcək?

Açığı, daha qardan da bezmişəm, qarın ortaya çıxardığı “siyasi yarıtmazlıqlar”dan da. Adam nə qədər “Azərenerji”nin, “Azəriqaz”ın, “Azərsu”nun (maşallah, hamısı da “Azər”dir) maxinasiyalarından, korrupsiyasından yazar axı. Zatən, yazmağın bir faydası da olmur, çünki kimsənin - ölkə rəhbərliyinin vecinə deyil əhalinin dərdləri. Axı bu vəziyyətin yaranmasına səbəb korrupsioner sistemin zəncirvari şəkildə bir-birinə bağlı olmasıdır. Ona görə də kimsəyə gözün üstə qaşın var deyilmir hələ ki. Bütün bunları nəzərə alıb, üstəlik də dünən günorta radələrində qarın yavaş-yavaş əriməyə başladığını müşahidə edib də tamamilə başqa mövzularda cızma-qara etməyi düşünürdüm. Amma günortadan sonra qar yenə püskürməyə başlayanda, üstəlik də YAP-ın ünlü siması Siyavuş Novruzovun Qarabağ veteranı olmasına dair dedi-qoduları oxuyandan sonra... hökumətin yarıtmaz siyasətindən yazmamaq olmadı...

Deməli, hamımız gördük ki, “qayğıkeş”, “cəfakeş”, “fədakar”, “xilaskar”, “çevik” Azərbaycan hökuməti heç uf demədənqara təslim oldu. Özü də cəmi 15-20 sm-lik qara, 5-10 dərəcə şaxtaya. Bütün şəhər təsərrüfatı iflic oldu. Bir qədər obrazlı ifadə etsək, hökumətin ağzı Yasamal dikinə dirənəndə, başladı “buksavat” eləməyə, elə eşələnə-eşələnə də qalıb orada. İqtidarımızın bu əcaib durumuna baxanda bir anlıq fikirləşirsən ki, bəs bu hökumət üzü Murova, Camışdağa, Şuşa qalasına doğru gedəndə necə olacaq? Əgər bu hökumət cansız-dilsiz, silahsız, əliyalın qar-borana quzu kimi təslim oldusa, Qarabağda nə edəcək? Bəlkə bu hökumət düşünür ki, Qarabağa getmək lazım gələndə dözümlü xalqın nümayəndələrini teyləyib aparacaqlar? Sözüm yoxdur, vətənin müdafiəsi onsuz da tarixən kasıb-kusubun boyuna biçilib, alnına yazılıb. Amma elə edin, bu kasıb camaat sağ-salamat qalsın Qarabağa gedənə qədər; qarda-tufanda soyuqdan xəstəlik tapıb ölməsin...
Bir tərəfdən də düşünürəm ki, yox e, Qarabağı almağa da qara təslim olan YAP-çılar özləri gedəcəklər! Görmürsünüz, Siyavuş Novruzov artıq cibinə Qarabağ müharibəsi veteranı vəsiqəsi də alıb qoyub.
Qar, şaxta-filan boş şeydir, əsas Qarabağdır, orada da döyüşməyə Siyavuş Novruzov kimi oğullarımız var.
Cənab Novruzovun müharibə veteranı olması məsələsi ortaya çıxandan sonra çoxları buna şəkk edir. Dostlar, Siyavuş Novruzov müharibədə olub! Onlar 1992-93-cü illərdə milli hakimiyyətin devrilməsi istiqamətində güclü döyüş əməliyyatları keçiriblər. Siyavuş müəllimlə bir səngərdə Mübariz Qurbanlı, Əli Əhmədov da döyüşürdü. Düzdür, həmin vaxt onlar “güllədaşıyan” olublar, amma bu günə baxın, əsas döyüşçülər - Sirus Təbrizli, Əli İnsanov, Əli Nağıyev hardadır, bunlar harda. Əsl “müharibə veteranı” belə olur.
Ona görə də inanmaq olmur ki, Siyavuş Novruzov müharibədən qorxar. Hacıbala Abutalıbovun, Etibar Pirverdiyevin, Baba Rzayevin və başqalarının qarda batıb qalmasına baxmayın, Siyavuş bəy qoçaq oğlandır, maşallah, 10 kisə pul torbasını bir əlində götürüb aparar. Özü də təxminən 19 ildir bu adamlar Azərbaycan xalqı ilə müharibə aparırlar, böyük təcrübəyə malikdirlər. Xalq öz haqqını istəyir, bunlar zor tətbiq edib onu millətin əlidən alır. Bu məntiqlə Siyavuş müəllimi gerçəkdən müharibə veteranı hesab etmək olar. Özü də xalqın haqqının əlindən alınıb, YAP-da qorunub saxlanılmasında Novruzovu qəhrəman adına layiq görülə bilər...
Deyirəm, qar ərisəydi, Siyavuş Novruzov gedib Qarabağı azad edərdi, canımız qurtarardı.

410 dəfə baxılıb