SAĞLIĞINDA TERRORÇU, ÖLƏNDƏ BADAM GÖZLÜ

	24 may 2012


Onlayn ictimai-siyasi qəzet

Sevinc TELMANQIZI

SAĞLIĞINDA TERRORÇU, ÖLƏNDƏ BADAM GÖZLÜ

Sağlığında kor Fatma olanlar yenə ölən kimi badam gözlüyə dönüblər. Üsəma, Osama, yoxsa Usema olduğu hələ də dünyada dartışılan bir nömrəli terrorist bin Ladenin ölümü hamıya dərd olub sanki. Bütün dünya ondan danışır yenə. Özü də fikir vermisinizsə, azacıq da canıyananlıqla. Ölümündən əvvəl kasıb daxmasında televizora baxan, arvadı, uşaqlarıyla səssiz bir həyat keçirən yaşlı insan...

Zarafatsız, başda Amerika telekanalları olmaqla xəbərçilər bu rəzil terrorçunu az qala ömrünün qürub çağında nəvələri ilə oynayarkən öldürülüb, dənizə atılan zavallı qoca kimi təqdim etməyə çalışırlar. Ölümündən bir neçə gün əvvəl çəkilən videogörüntülərdə dünyaya hansı mesajı verib, 2 ilmiş niyə evindən çıxmırmış, arvadları qəsəbədə hansı maşınla gəzirmiş? Bunun kimi bir sıra heyvərəliklə məşğuldu dünya xəbərçiləri. Tıq-tıq xanım demiş, lap çərə gedib, çürə gedib. Nə deyibsə deyib. Əsas etdikləridir ki, o da göz qabağındadır. Doğrudanmı dünyanın illərdir əlindən zəncir çeynədiyi terrorçunun həyatındakı yersiz təfərrüatlar kiməsə maraqlıdır? Bunu xəbər olaraq təqdim etməyin əleyhdarı deyiləm, amma bundan bir insan hekayəsi, Yeşilçam filmləri dadında ağlamalı ssenari düzəldilməsidir anlamadığım.
Allaha şükür, biz də camaat olaraq düşənə balta vurmağı, ölənin dalınca danışmağı xoşlamarıq. İllər uzunu canımızı-qanımızı sümürənləri ölümündən sonra qəhrəman etməyi bacarırıq. Ona görə də indi bu terroristdən ballandıra-ballandıra hekayələr danışmağa başlayanlar çoxalıb yan-yörəmizdə. Vurub-tutan oğlanı salam verəndə belə qorxduğumuz Amerika silahsız vəziyyətdə öldürüb... Allah, sən özün saxla (hətta dünən bəzi qəzetlər yazdı ki, guya Bakı kəndlərindən birində vəhhabilər terrorçuya yas da veriblərmiş. Bu xəbəri də dünya xəbərçiləri yayıb - S.T.).
Bəlkə müqayisə uğursuz olacaq, amma Hacı Məmmədov elədiyi bütün naqisliklərindən sonra türmədə şəkil çəkməyə başlayan kimi romantik sənətkar obrazına büründü ha, indi də dünya Bin Ladendən nəsə bir obraz düzəltməyə çalışır. Hələlik proses mərhələsindədir, xəbəriniz olsun.
Hərənin həyatında bir terrorist olar. Bakılılar da il uzunu su, qaz, işıq terroru ilə üz-üzədir (oxucuya dünya miqyaslı terrordan məişət qayğılarına keçidlə bağlı başgicəllənməsi yaşatdığım üçün sonsuz üzrlər-S.T). Məsələn, bizim yaşadığımız qəsəbədə hər həftənin cümə günü istisnasız olaraq, qaz kəsilir. Bilmirsən, xristianların müqəddəs cüməsinə görədir, ya nədir, məhz həmin gündə bunu edirlər. O gün bunun səbəbi ilə maraqlandıqda aşağıdakı şəkildə açıqlama verildi: “Şənbə-bazar camaatın evinə qonaq-qara gəlir deyə həmin gün kəsmirik”. Sonra isə daha orijinal bir təklif verildi ki, bəs biz hər həftə belə çətinliklə üzləşməyək deyə bir gözü elektriklə işləyən qaz plitələrindən alsaq, yaxşıdır. Düzdü, bunu nəylə alacağımızı demədilər, amma təklif təklifdir. Suya gəlincə, Bakının əksər yerində suyu qrafiklə, bəlli saatlarda verirlər, bilirsiniz. Sənin çənlərə su doldurmaq üçün evdə saat neçədə olacağını, işini saat neçədə qurtarıb, qonaqlıqdan neçədə qayıtmalı olduğunu məhz su idarəsində işləyənlər müəyyənləşdirir. Hətta qadınların öz ərlərinə diqtə edə bilmədiyi qaydanı(məsələn, axşam 7-də evdə ol kimi) suçular gerçəkləşdirir. Daha doğrusu, bizim kənddə deyilən kimi, haytasını yeridir. O gün su anbarından bizim binalara su vuran dayıdan “saat neçədə su verəcəksiniz” deyə soruşdum, həlləm-həlləm şairlərdə görə bilmədiyim tərki-dünya, bir az da romantik üz ifadəsiylə dedi ki, “nə bilim, bəlkə bir saat sonra yıxıldım, öldüm, ömrüm də kəsildi. Onda su da olmayacaq”. Təbii ki, həmin dəqiqələrdə bütün məhəllə iki əlini göyə açıb, ən azı həmin gün suçu dayının günü sağ-salamat başa vurmasını o bir Allahdan təvəqqe elədi... Ya da daha bir tanış mənzərə. Bu gün əlindəki yeganə hakimiyyəti avtobus sükanı olan birisi gecikdiyi üçün yolu istədiyi formada dəyişib sənin gedəcəyin yeri özü müəyyənləşdirirsə, bu da terrorun başqa formasıdır. Dəvə və qanad paraleli...
Yəni, sözümün mustafası odur ki, bu dünyada hərə öz miqyasında terrorçudur. Bu gün bizlər gündəlik həyatımızda kimlərinsə xırda terrorundan belə əziyyət çəkiriksə, görün dünya yekə terrorçulardan nə çəkib. Kimdənsə qəhrəman düzəltməzdən əvvəl keçdiyi yolu yada salmaq lazımdır. Yoxsa ölkədə(dünyada) qəhrəmanların əlindən tərpənməyə yer qalmayacaq.
P.S. Biləcəridə oturub Pakistandakı terroristə, özü də ölmüş olanına barmaq silkələməyin də ayrı ləzzəti varmış. İsti kabinetindən erməninin “anasını ağlar qoyanlar”ı adam indi başa düşür.

873 dəfə baxılıb