NAĞILVARİ SÖHBƏT... | Yeni Müsavat

	24 may 2012


Onlayn ictimai-siyasi qəzet

Sevinc TELMANQIZI

NAĞILVARİ SÖHBƏT...

...ya da üç almanı kim yedi?

O gün İctimai Televiziyanın direktoru İsmayıl Ömərov “Azadlıq” radiosuna müsahibə verib. Deyib ki, nağılvari müsabiqə keçirmək istəyirik. Söhbət təbii ki, Avrovision (nəhayət bir nəfər dilçi çıxıb, bu sözün Azərbaycan dilində necə yazılmalı olduğunu deyəcək, ya yox?- S.T ) mahnı müsabiqəsindən gedir. Hansına ki, guya ölkə səviyyəsində hazırlıq başlanıb. Hökumət nümayəndələrinin dediklərinə inansaq, artıq yüksək səviyyəli hotellərdə gələn il müsabiqənin keçiriləcəyi zaman üçün yerlər rezerv edilib, istirahət guşələrimiz xaricilərə gəl-gəl deyir, yollarımız düzəldilir, London taksiləri də cağbacağ öz yerində. Bu arada imkan tapıb, müsabiqədən əvvəl ölkəmizə gələn xarici jurnalistlərin da payını veririk.

Yaramazlar gedib öz qəzetlərində Azərbaycan haqda tənqidi yazı yazmasınlar deyə... Son olaraq 4 gənc bu işin “öhdəsindən gəldi”. Polisin dediyinə inansaq, söhbət sırf məişət zəminində yaşanıb. Gənclər xarici xanım jurnalistlərlə tanış olmaq üçün telefonlarını istəyiblər, sonuncular “come on”un antonimini deyəndə də döyülüblər. Bax, budu Azərbaycan qonaqpərvərliyinin nişanəsi. İndi siz təsəvvür elədiz gələn il müsabiqə keçirilən vaxt neçə xarici xanım şillə-təpiyin altına salınacaq?
Yeri gəlmişkən, sizə bir sirr də açım ki, sözügedən döyülmə olayından sonra yerli jurnalistlərimizin içində də sevincqarışıq bir arxayınçılıq yaranıb. Yaxın bir ildə bizə dəyib-dolaşan az olacaq, xarici həmkarların zərərsizləşdirilməsi aktuallaşacaq deyə. Əlbəttə, bizim canımız can deyil? Qaçqın olanda nə olar, hər gün biz döyüləsi deyilik ki?
Bununla belə, ölkəyə turist axını başlayıbmış. Turizm Nazirliyi hər gün artan rəqəmləri gözümüzə soxur. Amma az keçmədən anlaşılır ki, hökumət ölkəyə rəsmi iş səfərinə, lap elə alverə gələnləri də turist kimi qeydiyyata salır. Xəstə qohumunu ziyarət edən, təhsil üçün çaşıb Bakını seçənlər də turist statusunda qeydə alınırlar. Necə deyərlər, su girdi qaba, oldu içməli. Sərhədi bu tərəfə adladınmı, oldun turist - başqa yolu yox.
Dünən deputat Hadı Rəcəblinin qəzetlərdən birinə müsahibəsini oxudum. Deyir, bizim turizm mərkəzlərində Türkiyə ilə müqayisədə qiymətlər ona görə bahadır ki, bizdə turizm mövsümü cəmi iki aydır, Türkiyədə isə beş. Loru dildə desək, “qısa müddətdə kimi atım, qabağa düşüm” məntiqiylə davranır yerli turizm obyektləri. Əslində Hadı müəllimin bu açıqlaması o qədər də obyektiv sayılmaz. Çünki elə keçən ilin bu vaxtı həmin bu deputat saytlarda özünə məxsus istirahət mərkəzinin reklamını edirdi. “Azərbaycanın bütün imkanlı kişilərini bu mərkəzdə gözləyirik” anonsunu verərək həm də. Qəsdən mərkəzin adını yazmıram ki, reklam olmasın. Amma deputat adam, üstəlik də həmin vaxt namizəd olan bu şəxsin sözügedən qaydada iş yerini reklam etməsinə rəsmi strukturların susqunluğunu da Ömərov demiş, nağılvari gəlişmə adlandırıb keçirəm bu qiymət məsələsinə.
Hökumət son dönəmlər istirahət üçün Türkiyəyə, Gürcüstana...axışan əhalinin qarşısını almaq üçün yenə bildiyi metoddan istifadə edir. Aviabilet qiymətlərini qəsdən qaldırır ki, sərhədi adlamağa heyləri qalmasın. Bunun da adına zorən istirahət deyirlər, xəbəriniz olsun. Yəni, bizdə hər şey zor gücünədir. Təhsil də, istirahət də, yaşayış da... Adicə çimərliyə gedib, bir stol, iki stula 10 manat, bir çaynik çaya yenə 10 manat... tələb olunan məmləkətin yazıq bəndələri özlərinə istirahəti rəva görə bilərlərmi?
Ömərovun haqqında danışdığı nağıl da elə budur. Bu ölkədə hər şey nağılvaridir. Lənət şeytana, hətta axırda göydən düşən almalar da. Onları gördüm deyən olmur. Özləri danışıb, özləri yeyirlər...

704 dəfə baxılıb