MƏRHUMƏ ÜÇÜN LAP ÇƏTİNDİR

	24 may 2012


Onlayn ictimai-siyasi qəzet

Sevinc TELMANQIZI

MƏRHUMƏ ÜÇÜN LAP ÇƏTİNDİR

Azərbaycanda beş-altı populyar mövzu var. Bunlar milli aşıqlarımızın sözü qurtaranda nanay-nanay eləmələri üçün super bəhanədir. Erməniyə barmaq silkələmə, telekanallardakı şou proqramlar, manısların geyimi, toy-yas mərasimlərindəki israfçılıq... Bu mövzulardan birinin başından tutub, il uzunu pis müğənnilər kimi, “raskrutka” edirlər. Hamısı zərərsiz, dişsiz, üstəlik, divident gətirən. Divident deyəndə, özlərini millətə super canıyanan, milli-mənəvi dəyərlərin qoruyucusu kimi təqdim etmə cəhdlərini nəzərdə tuturam.

Nəsə, o gün bu vay-şivən janrında daha bir müzakirə keçirilirdi. Tarixçilər, deputatlar, hökumət nümayəndələri daş atıb başlarını tutmuşdular ki, bəs dəbdəbəli xeyir-şər məclisləri xalqımızın evini yıxır. Məsələn, bunlar toy süfrəsində beş cür yemək görmək istədikləri halda, 55 cür təamı mədəyə ötürməli olurlar. VİP çadırları, bərkgedən mollalar, ölüyuyanlar, qəbir yerləri... varın gerisini siz düşünün, bir budaqda oturub, minini silkələmişdilər. Ən orijinal şikayətlənmə keçmiş deputat Zəlimxan Yaquba məxsus idi. Deyirdi, gedirsən qəbiristanlığa, məlum olur ki, bircə telefon yoxdur ölüylə danışasan. Tarixçi Yaqub Mahmudovsa quşu gözündən vurmuşdu. “Yas mərasimlərinin banket səviyyəsində keçirilməsi xalqda idarəetməyə böyük nifrət yaradır. Üstəgəl, heç kim halal pulla belə mərasim keçirə bilməz” - sitat eynən bu cür idi.
İdarəetməyə nifrətin haradan və necə qaynaqlanması barədə dastan açmaq istəmirəm, bunu ölkədəki pəpə yeyəndən məmə deyənə kimi hamı bilir. Amma bu halal pul söhbəti məşhur lətifədəki kimi yaman xətrimə dəyib. Orası düzdür ki, bizdə bir taksi sürücüsü ilə deputat oğlunun toyu, ya da atasının yas mərasimi arasında cüzi fərq olur. Tutaq, kasıb boğazından, əyin-başından kəsir ki, məclis yola versin. Amma halal-haramlığa gəlincə... Lütfən, dəhşət millət təəssübkeşləri olan bu müəllimlər ayda 400-500 manat məvacib alan məmurların, məmur balalarının şəhərdə şütüyən, hərdənbir də heyvan səsləri çıxaran bahalı maşınlarını, ucalan villalarını, bağ evlərini, xarici banklardakı qat kəsən pullarını da yad etsinlər. Yəni, kasıbın “qonşudan qalma geri” prinsipi ilə borc-xərclə bahalı məclis keçirməsi təkcə onun paxıllığı, bəhsçilliyinin nəticəsi deyil. Ölkədəki görməmişlik ənənəsinin bünövrəsini qoyanlar çox vaxt bu iddiaların müəllifləri olur. Necə deyərlər, istəmirəm, amma yan cibimə qoy. Bir yekə villaya “sığışmayıb” daha bir neçəsini tikmək, qarajında cüt-cüt maşın saxlamaq, beş qəpik tapan kimi ən yaxşı halda nəsli, kənd-kəsəyi, ən görməmiş halda isə atası haqqında kitab buraxdırmaq... Xınalıq kəndindəki 92 yaşlı Əmir kişi etməyib ki, bunları? Siz də vaz keçin də bunlardan. Necə olur, siz bunları edəndə haram sayılmır, kasıb şadlıq sarayı rəhbərinin israrı ilə süfrəyə 55 təam qoyanda, ya da sizin qoyduğunuz ənənəni davam etdirmək istəyəndə haramçılıq, korrupsiya, rüşvət haqq-hesabı aləmi başına götürür?
Oğluna toy etməyə pulu olmadığına görə özünü asan ata... Bətnindəki dörd aylıq körpəsi ilə Türkiyədə fahişəlik edən ana... Ödənişli fakültəyə qəbul olduğu üçün özünü asan Şəhla. Sizin haqqında danışdığınız məmləkətin insanlarıdır. Biz onlar haqda tez-tez yazırıq, bəlkə oxumursuz? Milləti harınlamış, şou-biznes həsrəti, varlı-hallı göstərmək də bir dövlət siyasətidir yəqin ki. Hərdən bəzi atalar öz oğulları haqda yalandan şikayətlənirlər ha. “Bu avara uşağın əlindən mən neynim” - deyib, əslindəsə içdən-içə qürur duyduqlarını hamı bal kimi bilir. İndi bu millət təəssübkeşləri də yalandan şikayətlənib, əslində yalandan mesaj verməyə çalışırlar. Brilyant Dadaşova, Faiq Ağayev də belə oxuyur axı: “Xalqımın günləri necə xoş, necə şən keçir”... Yəni, məqsəd bu mesajı verməkdir əslində. Biz o qədər xoşbəxt, o qədər varlı, o qədər firavan, o qədər.... yaşayırıq ki, VİP çadıra 10 min manat veririk, evimizdə kilosu 20 manat olan ət yeyirik, pulu da cırıb altında oynayırıq... Canımız yanmasın, biz beləyik...
Məşhur məsəldə necə deyilir? Sizinçün də çətindir, bizim üçün də. Amma mərhumə üçün lap çətindir. Allah bütün ölülərə, ölü canlara rəhmət eləsin...

809 dəfə baxılıb