QABAQDA GEDƏN ZƏNCİRLİ

	24 may 2012


Onlayn ictimai-siyasi qəzet

Sevinc TELMANQIZI

QABAQDA GEDƏN ZƏNCİRLİ

Son günlərin populyar mahnısı “Sənə görə”ni eşidəndə yadıma avtomatik olaraq onun bəstəkarı Hüseyn Abdullayevin eks həmkarı Fəzail Ağamalı ilə Milli Məclisdəki təpikləşməsi, yumruqlaşması, bir sözlə, dalaşması gəlir. Hüseyn bəy bundan sonra istəyir, lap əsrin şedevr mahnısına imza atsın, xeyri yoxdur, onun beyinlərdəki assosasiyası o davadan uzağa getmir. Xüsusən də mahnının sonlarına yaxın naxçıvanlı ləhçəsi ilə “sənə cörə” deyə oxuyur ha, adama elə gəlir, bu sözlər elə cənab Ağamalıya həsr olunub. Neyçün ki, hər şey elə ona görə baş verdi. Sonuncu ayağa durub, eks deputat, indiki bəstəkarın alovlu çıxışına mane olmasaydı, bu da yerindən “səsini kəs” deməsəydi, müəllim indi də sağ-salamat kreslosunda oturub, pulunu qazanacaqdı...

Əslindəsə bu ölkədə hamının “sənə görə”, daha doğrusu, sənin ucbatından, sən olmasaydın, sən eləməsəydin, sən gəlməsəydin....lərlə başlayan cümlələri bəs deyincədir. İnsan oğlunun xarakteri budur, daim öz uğursuzluqlarına bir don geyindirməyə çalışır. Müxalifət deyir, iqtidar olmasaydı, biz ölkəni rifaha çıxarardıq. İqtidar deyir, müxalifət, müxalifət qəzetləri səsini başına atmasaydı, beynəlxalq imicimiz bu qədər zədələnməzdi. Redaktorlar jurnalistlərdən, jurnalistlər redaktorlardan, camaat MİS rəisindən tutmuş, müdirə qədər hər kəsdən narazıdır. Hamının barmağını uzadıb, “sənin ucbatından” dediyi bir kəslər var mütləq. Amma bir vacib detalı unutmadan... Bütün bu davalar, yəni, ayıb-qaxınclar xırmanda yabalaşma mərhələsində üzə çıxır.
Hərdən mətbuatda gedən söz atışmalarına fikir verin. Vaxtilə eyni cinahda savaşmış, eyni yerdə çalışmış, lap elə eyni çirkin içinə bulaşmış adamlardan biri, xüsusilə də narazı qalanı it qırğını başlayanda bütün bildiyi faktları üzə çıxarır. Bizim bir qonşu var, hər dəfə salamlaşanda işlədiyi yer barədə “şok məlumatlar”ı mətbuata ötürəcəyini anons edir. Sonra da əlavə edir ki, bəs bunları desə, ölkə bir-birinə qarışacaq. Amma məlum olur ki, hələlik bunları deməyin vaxtı deyil. O da hansısa zalım lazımı gözləyir. Tutaq ki, müdirindən gözləntisi, məsələn, daha yüksək vəzifə, maaş vədi gerçəkləşməsə, o da sandığı açıb, pambığı tökəcək. Bu xarabada hərənin intizarında olduğu bir “lazım” var axı...
Siz beləsinin iş-işdən keçəndən sonra dediyi hansısa sözə inanarsınızmı? Dünən qəzetlərdəki bəzi mətbuat konfranslarını oxudum. Bilirsiniz, son illər daha çox mənzil, iqtisadi hüquqları pozulmuş insanların mətbuat konfransı, bir də qrant layihələrinin təqdimatı üstünlük təşkil edir. Hüququ pozulmuş insanların konfranslarında isə ana xətt aşağıdakıdır: bizə uzun illər zülm edildi, hüquqlarımız pozuldu, bizim əlimizlə çoxlu qanunsuzluqlara imza atıldı, axırda maaşımızı da kəsdilər və biz məcbur olub çıxdıq. Yəni, mənə dəyməyən ilan min il yaşaya bilər. Vay o gündən ki, dəysin...
Oxuyanlar bilir, oxumayanlara isə mən qısa özətini verim. “Koroğlu” adlı şirkətin hüququ pozulmuş işçiləri mətbuat konfransı keçirərək deyib ki, rəhbərlik yalandan onların şirkətə borcu olduğunu iddia edib, bununla razılaşmayanda döyüb, sonra da soyundurub şəklini, videosunu çəkib. Şantaj edib ki, borcu ödəməsə, bu şəkilləri və videonu internet vasiəsilə yayacaq. İşçilərdən birinin atasını girov saxlayıblar, o birini şirkətdəki xüsusi otağında həbs ediblər. Tam bir dərəbəylik. İnsanlıqdan kilometrlərlə uzaq olan bu hadisə isə bizə aylar-aylar sonra məlum olub. Biləsiniz, tərəflərin bütün razılaşma cəhdləri baş tutmayıb, ortaq çözüm yolu tapılmayıb, sonra üz tutublar mətbuata. Yaxşı, bunun harası zərərçəkmişlik oldu?
Qəhrəmanın adını daşıyıb, ən axırıncı əclaf kimi davrananların hərəkətində isə xüsusi taktika axtarmağın əleyhinəyəm. Bir ölkədə ki, tanınmış insanları sındırmağın, cəzalandırmağın yolu gizli kamera ilə çəkilmiş görüntüləri internetə, telekanallara ötürməkdən keçir və bunu hökumətin başında dayananlar edirsə, bu halda sıravi bir şirkət də eyni yolu niyə keçməsin? Ağıllınız kimdir? Qabaqda gedən zəncirli...
Sənə görə, onlara görə, sizə görə... Bəs bu ölkə kimə görə bu gündədir? Biləniniz varmı?

628 dəfə baxılıb