QAN DONDURMUR, AMMA QANSIZLIQDIR...

	24 may 2012


Onlayn ictimai-siyasi qəzet

Sevinc TELMANQIZI

QAN DONDURMUR, AMMA QANSIZLIQDIR...

Adətən biz jurnalistlər həkimlərlə, həkim səhvləri ilə bağlı oxucu şikayəti alanda maksimum ehtiyatlı oluruq. Məsələn, xəstə yaxını deyir ki, həkim qohumumu düzgün müalicə etmədi deyə şikəst oldu, ya da dünyasını dəyişdi və sair. Jurnalist də belə olanda qalır udquna-udquna ki, görəsən bunu yazsam, sabah həkim bilmədiyim tibbi terminlərlə, anlaşılmaz reseptlərlə üstümə şığıyıb, “günah öləndə idi” kimi məşhur tezisi müdafiə etməyəcək? Amma türklər demiş, dananın quyruğunun qopduğu anlar da az olmur ha. Onda nə Hippokrat yadına düşür, nə də ağ xalat geyinib mələklik iddiası edənlər...

Restoranın pulunu ödəyə bilmədiyi üçün bəylə-gəlinin gecə girov saxlandığını, imtahanın haqqını vermədiyi üçün kursda qalan tələbəni, hətta doğum evində girov saxlanılan hamilə qadını, yeni ananı görən canım məmləkətim üçün pulu olmadığı üçün xəstəxana köşəsində canını tapşıran xəstə də adi haldır. Kimsənin tükü də tərpənmir. Elə ona görə dünən qəzetimizdə “Xəstə pulsuzluqdan xəstəxanada öldü” başlığını görəndə eyni hissi yaşadım. Qanunauyğunluqmuş kimi...
2009-cü ilin dekabr ayında konkret özüm şahid olmuşdum. Xalq arasında adına “respublikanski” deyilən xəstəxananın doğum şöbəsinə hamilə bir qadın gətirmişdilər. Adı üstündə, hamilə. Sancısı tutub, xəstəxanaya qaçıb, üstündə də pul yox. Yalvarır ki, ərim rayondan gəlir, yoldadır, mənə kömək edin, gələn kimi hörmətinizi edəcəm. Soruşun, bir həkim, tibb bacısı, sanitar ona yaxın dayandı? Qadın elə qəbul şöbəsindəcə uşağını dünyaya gətirdi, bağırdı, çığırdı... İki saat ərzində o uşağa baxan belə olmadı. Sonra ata hövlnak xəstəxanaya gəldi və həpi end.
Əminəm ki, hamının yaddaş “baqaj”ında buna bənzər bir, ya da bir neçə qəddarlıq hekayəsi var. O məşhur “bütün həkimlər pis ola bilməz, aralarında yaxşıları da var” tezisini isə yaxşı həkim görənə qədər inkar etmək əzmindəyəm. Digər tərəfdən isə anlamaqda çətinlik çəkirəm. İlboyu xəstələrin canını-qanını sümürən bu xəstəxanaların fondu yoxmu? Axı ora müalicə və ya doğum üçün daxil olan hər xəstə avtomatik fonda da pul köçürür. Doğrudanmı bu fond ildə heç olmasa bir neçə xəstəni öz hesabına müalicə və ya ana edə bilmir? Lənət şeytana, axı bu həkimlərə də, xəstəxana müdirlərinə də... dövlətdən məvacib verilir. Yəni puI - konfet kağızı yox. İşini görsün deyə. İşi də insan müalicə etməkdir. Yəni iki vur iki, bərabərdir dörd. O zaman bu rəzilliyin adı nədir?
Məşhur filmdə deyilən kimi, elçi daşını İsrafilin başına kim vuracaq? Biz hələ bu hadisələrin bir neçəsindən xəbər tuturuq, hər gün paytaxtda bunun kimi neçə rəzillik baş verir, kim bilir. Yalan olmasın, hər ay ölkədə qosqoca xəstəxanalar, müalicə mərkəzləri... istifadəyə verilir. Kiminçün? Kasıblar onun qapısında yalvarıb ölsün deyə?
Dünyanın ən uzun bayrağı, ən bahalı “Eurovision” iştirakçısı, ən uzun körpüsü... bizim ölkənin şanlı tarixinə aid deyilmi? Bu gedişlə pulsuzluqdan xəstəxana koridorlarında can verənlər sahəsində də rekorda imza atacağıq.
Bir neçə il əvvəl Amerikada polislər detektiv janrda çəkilən filmlərə, polis həyatından bəhs edən seriallara etiraz etmişdi. “Bu seriallar bizim bütün iş sirlərimizi açır, oğrulara, canilərə ip ucu verir” deyərək kinematoqraflara yazılı müraciət də ünvanlamışdılar hətta. Təklif edirəm, bizdə də həkimlərdən bəhs edən kino çəkilsin. Qoy milli tibbimizin bütün sirlərini dünya görsün. Amma indidən xəbərdarlıq edim: film “ujas” janrında olacaq.

651 dəfə baxılıb