DAHA DENƏN PARAŞÜTÜ VERMİRƏM DƏ...

	24 may 2012


Onlayn ictimai-siyasi qəzet

Sevinc TELMANQIZI

DAHA DENƏN PARAŞÜTÜ VERMİRƏM DƏ...

Sağ olsun, Təhsil Nazirliyi. O taleyüklü problemi, təhsilin anasını ağladan bəlanı həll etdi. Məlum oldu ki, artıq bu ildən etibarən orta məktəblərdə yaşı 65-dən yuxarı olan müəllim(ə)lər işləməyəcək. Məktəb direktorları ədəb-ərkanla onları yola salacaq, yerinə yenisini dəvət edəcəklər. Daha bundan sonra heç bir valideynin gözü arxada qalmayacaq. Yaşlı müəllim yoxdusa, təhsildə də problem yoxdu. Belimizə çöpdən dirək.

İroniya bir tərəfə, təhsildəki bəlalardan yaza-yaza biz çərlədik, amma nazirlik bunları həll etməməkdə problem görmədi. Vahid məktəbli forması, yaşlı müəllimlərin təqaüdə göndərilməsi, son zəng tədbirlərinin ləğvi kimi dütdülü sərəncamlar gözə dəyir ancaq. Mən təbii ki, “yaşlı müəllimlər indiki cavanlardan daha təcrübəlidir” haqq-hesabına girməyəcəm. Çünki bu cür çirkli təhsil mühitində kiminsə kristal təmizliyi, yüksək pedaqoji qabiliyyəti barədə danışmağı yersiz hesab edirəm. Üstəlik, gözümün qabağına ötən parlament seçkilərində məntəqələrdə üz cıran, qonum-qonşunu seçkiyə səsləyən yaşlı, qonşu müəllimələrin siması gəlir, lap vaz keçirəm təəssüflənməkdən.
Sadəcə, söhbət ondan gedir ki, dövlət qulluqçularının yaş senzi ilə bağlı Milli Məclis qərar qəbul etsə də, hələlik bu, təsdiq olunmadığından bu yöndə hər hansı iş görülməmişdi. İlk addım isə müəllimlərlə bağlı atılıb. Yaxşı, bəs yaşı 65-ə çatan, illərdir kreslosundan bərk-bərk yapışan nazirlərə, komitə sədrlərinə, idarə rəislərinə... kim gözün üstə qaşın var deyəcək? 77 yaşlı Artur Rasizadə, 74 yaşlı Ramiz Mehdiyev, 65 yaşlı Misir Mərdanov, 67 yaşlı Hidayət Orucov, 80 yaşlı Xoşbəxt Yusifzadə, 72 yaşlı Abid Şərifov... Siyahını uzada da bilərdim, yer qıtlığı olmasa... Qanun qüvvədədirsə, niyə onu digər vəzifə xəstələrinə də tətbiq etmirlər? Elə müəllimləri yazıq görmüsünüz? Üstəlik, sizin yolunuzda saçlarını süpürgə etdiklərini nəzərə alanda bu, lap ədalətsizlik sayılır.
Amma demokrasidə çarələr tükənmir. Qərardakı əlavələrə diqqət etmisiniz? Ya da nazirlik işçilərinin açıqlamalarına? Təhsil Nazirliyinin strateji təhlil, planlaşdırma və kadrların idarə olunması şöbəsini müdiri Fərzəli Qədirovun dediklərinə bir daha nəzər salın o zaman: “Belə meyarlar müəyyənləşdirilib ki, işlədiyi yerdə həmin müəllimi əvəz etmək mümkün deyilsə, kifayət qədər dərs saatı varsa, o, fənn üzrə yalnız bir ixtisas müəllimidirsə, səhhəti də işləməyə imkan verirsə, onunla növbəti 1 il üçün də müqavilə bağlana bilər. Belə tapşırıq da verilib ki, ümumiyyətlə, 65 yaşlı müəllimlərin işdən azad edilməsi ilə bağlı təhlillər aparılsın. Əgər haradasa ixtisas üzrə fənn müəllimi yoxdursa, ora yeni müəllimlər işə qəbul edilsin. Məktəblər bizə bu barədə məlumat verəcək. Biz bununla bağlı ya müsabiqə keçirəcək, ya da həmin yerləri ehtiyat kadrlara təklif edəcəyik. Hesab edirəm ki, ciddi problem yaranmayacaq. Şəhərlərdə müəllim sıxlığı olduğundan bu problem olmayacaq. Yaşlı müəllimlərin fənləri digər fənn müəllimləri arasında bölünəcək”.
Məşhur lətifədəki kimi, daha denən, paraşütü vermirəm də. Açıqlamaya diqqət etdiniz? Bu halda hər bir yaşlı müəllimin işdə qalma ehtimalı var. Səbəblər isə indidən hazırdır: müəllimi əvəz etmək mümkün deyil, dərs saatı çoxdur, səhhəti işləməyə imkan verir, o fənn üzrə yalnız bir müəllimədir... Yaxşı, bəs bunun adı bal kimi korrupsiya deyilsə, nədir? Ən sadə arqument. 65 yaşlı müəllimin, ya da müəllimənin mütləq bir oğlu-qızı, övladı var. Onlar işləmək istəyən, amma işi təhlükəyə girən valideynləri üçün dədə-baba qaydasından istifadə edib, əngəlləri dəf edərək, problemi yoluna qoymayacaq? Qoyacaq. O halda bu nə turşu, bu nə pəhriz?
Köhnə bir mahnı var idi. “Biz sizə minnətdarıq, qocalar, ay qocalar” deyə rəhmətlik İslam Rzayev şirin-şirin oxuyardu. İndi bizim məktəb direktorlarının otaqlarında da bu mahnıya qol götürüb oynayırlar. Qoca müəllimlər olmasa, orta yaşlı direktorlar, digər məmurlar necə yaşayardı? Bax, bu da başqa bir mahnının mövsuzudur.

765 dəfə baxılıb