“MUTSUZLAR” ÖLKƏSİ

	24 may 2012


Onlayn ictimai-siyasi qəzet

Sevinc TELMANQIZI

“MUTSUZLAR” ÖLKƏSİ

Hərdən adama elə gəlir ki, bu ölkənin yarısı mahnı, rəqs, meyxana, evləndirmə, yemək... yarışmalarında iştirakçı, o biri yarısı isə orada münsifdir. Ölkənin problemləri xirtdəyə çıxıb, bunlar anormal, plagiat layihələr izindədir. Məsələn, ANS-in o məşhur izdivac proqramında “şok dəyişiklik” olub. Artıq qızlarla oğlanlar studiyada bir-biri ilə tanış olmayacaqmış, qızlar həftə boyu efirdən öz məharətlərini(?-S.T) göstərəcək, ekran başındakı bəy, qayınana namizədləri də məharətli gəlini seçəcəkmiş. Tam bir qul bazarı mənzərəsi. Bircə o qalır ki, qızın dişinə baxıb, onun güclü, ya zəif olduğunu müəyyənləşdirsinlər. Tam bir orta əsr təfəkkürü...

Space isə durnanı gözündən vurub. “Bermud üçbucağı” adlı bir layihəyə başlayacaq. Burada da iştirakçılar 36 saat ac və susuz qalacaqlar. Hər bir iştirakçının adına nümunə olaraq 5 min manat pul ayrılıb. Onların suya və ya yeməyə tələbatları olduqları zaman vəsaitlərindən xeyli miqdarda pul çıxılacaq. Məsələn, bir stəkan suyun qiyməti 250 manat, bir qab yeməyin isə 500 manatdır. Əsas məqsəd olduqca az pul xərcləməkdir. İştirakçılar da kimlərdir? Müğənni Günel Ələkbərova, “Şeron” qrupunun keçmiş üzvü Yaşar, rəqqasə Oksana Rəsulova və əslən türk olan aparıcı İlhan. Siz Allah, hansınız bunları tanıyırsız və ya tanımağa layiq hesab edirsiniz? Onlar Bermud üçbucağından çıxsalar nə olacaq, orada acından ölsələr nə? Ayrıca, Azərbaycan kimi bahalı bir ölkədə belə bir anormal layihə keçirməyin mənası nədir? Zatən bu ölkə acından ölmək üzrə olanların Bermud üçbucağına çevrilməyibmi?
Görün dünyanın nə yeridir ki, il boyu şouya, manısa, salonlara, konsertlərə pul xərcləyən hökumətin bu sahədə də naşı olduğu üzə çıxıb. Yarışmanı keçirmək üçün normal zalları yox, ölkədə qonaqları qarşılamağa şəraitləri yox. Hər şey cəhənnəm, müsabiqə təşkilatçıları bu cür ölkənin ev sahibliyi etməsinə də qarşıdır. Yəni, deyirlər ki, vətəndaşların mülkiyyət hüquqlarının kütləvi pozulmasına son qoyun, həmçinin siyasi və digər azadlıqları təmin edin, ondan sonra müsabiqə keçirərsiniz. Bəyanat da yayıblar sağlığınıza.
Bəlkə də elə buna görə Səməd Seyidov deyib ki, müsabiqəyə görə viza şərtlərini sadələşdirməyi düşünmürük. Lap əcəb edirlər. Məşhur filmdə deyilən kimi, elə bizi görməsələr, yaxşıdır. Bax, o gün “Yaxşı Cazibə” filminin yaradıcı heyəti gəldi Bakıya və gördü bizi. Fəvvarələr Meydanında serialın növbəti bölümünü çəkdilər (Niyə Qaraçuxurda yox, Fəvvarələr Meydanında? - S.T). Mətbuat konfransında da ənənəvi Bakı tərifləri ərşə yüksəldi: İçərişəhər çox gözəl, yeməkləriniz harika, tarixi yerləriniz super... Maqazin proqramlarından birində isə baş rol ifaçısı Hakan maraqlı bir müşahidəsini bölüşdü: “Amma buranın insanları sanki mutsuz. Sokakdakı insan hep düşüncəli, qayğılı...” Qardaş lap düz tapıb: yeməklər gözəl, tarixi yerlər harika, amma bunların heç biri kasıbın deyil, bir ovuc adamındır. Mutsuzluq da elə bu səbəbdən.
Mutsuzluq demiş, hökumət də Azərbaycanla bağlı Rusiya telekanallarında, Avrovisionun saytında yer alan məlumatlardan narahatdır. Məsələn, mahnı müsabiqəsinin rəsmi saytında yazılıb ki, Bakı öz tarixi kökünü İranın paytaxtı kimi götürüb. Rusiyanın “TV Sentr” telekanalı isə Azərbaycanın işğal edilmiş ərazilərindən qeyri-adekvat reportaj hazırlayıb. “TV Sentr” sentyabrın 2-də Azərbaycanın işğal edilmiş ərazilərindən hazırlanan reportajı efirdə yayaraq Dağlıq Qarabağ münaqişəsinin tarixini ifrat dərəcədə təhrif edib. Bu da sizə diaspora ayrılan milyonların nəticəsi. Ən çox maya qoyduğunuz Rusiyanın telekanallarında, qalib olduğunuz müsabiqənin rəsmi saytında belə barənizdə düzgün məlumat yerləşdirə bilmirsinizsə, onda daha nəyi bacarırsınız? Bu, artıq neçənci yanlış məlumatdır? Ya diasporanızı gücləndirin, ya da belə qurumunuz olmadığını birdəfəlik etiraf edin.
Sonra da deyirlər, sadə vətəndaş mutsuz görünür...

854 dəfə baxılıb