KİMBERLİ QLASS VƏ QUBAD İBADOĞLUNUN VƏTƏNƏ MÜNASİBƏTİ

	25 may 2012


Onlayn ictimai-siyasi qəzet

Zamin HACI

KİMBERLİ QLASS VƏ QUBAD İBADOĞLUNUN VƏTƏNƏ MÜNASİBƏTİ

İdman sahəsində daha bir böyük uğur qazanmışıq. Qadın voleybolçularımızın “Rabitə” komandası Qətərin paytaxtı Doha şəhərində keçirilən klublar arasında dünya çempionatında qalib gəlmişdir. Bu münasibətlə ilk növbədə Azərbaycan Voleybol Federasiyasının prezidenti, nəqliyyat naziri Ziya Məmmədovu təbrik edirik. Bəzi saxta taksi sürücüləri ona mane olmasalar Ziya bəy idman sahəsində daha zırpı işlər törədəcəkdir.

Doğrusu, qadın voleybolu haqda yazmaq fikrim yox idi, sadəcə bir internet səhifəsində Doha qələbəmizin “Yaşasın azəri qızlarımız” şəklində şərhlərini gördüm, ironiya çox xoşuma gəldi. Həqiqətən bu “Rabitə” komandası milli qızlarımızdan təşkil edilmişdir. Ümumiyyətlə, bizdə qadınlar əsasən voleybol oynayırlar. Ölkənin hər yerində, bütün şəhər və kəndlərdə bir əlində çömçə, o biri əlində voleybol topu tutmuş qəhrəman Azərbaycan qadınları görərik. Hətta keçən həftə mən Binəqədi qəsəbəsindəki voleybol meydanında bir qadın gördüm, qucağında uşaq voleybol oynayırdı! Tomris, Natəvan, Sara Xatun, Burla Xatun ənənələrini yaşadan qadınlarımızın top vuran əlindən öpürəm. Keçək “Rabitə”çi qızlara. Xalqımız öz çempionlarını tanımalıdır.
İlk növbədə komandanın baş məşqçisi Dejan Brdjoviç yoldaşı qeyd edək. Brdjoviç Biləcəridəki 106 saylı poçtun rəisidir. Komandanın aparıcı oyunçularından Boyana Doqanjiç, İrina Zukova və Silviya Popoviç elə həmin poçt şöbəsində əməliyyatçı işləyirlər, xalqımıza rabitə xidməti göstərirlər.
Mira Qoluboviç və Diana Nenova Yasamal Telefon Qovşağının əməkdaşlarıdır. Nataşa Krsmanoviç, Sanja Staroviç və Mirela Deliç poçtalyon işləyirlər, hər gün səhər məşqindən sonra evlərə şadlıq, sevinc dolu məktublar, banderollar daşıyır, xalqımızı həm də bu yolla sevindirirlər. Kimberli Qlass çox gözəl, suyuşirin xanımdır, o, təqaüdçülərə poçt xidməti göstərir, xüsusi olaraq imkansız adamların evinə gedir. Lidiya Dyaçenko Rabitə Nazirliyinin mərkəzi aparatında yanılmıramsa nazirin müavinidir. Olqa Ativi isə Aztelekomda internet şluzları işinə baxır.
Ümumiyyətlə, “Rabitə” qadın voleybol komandamızda cəmi 1 nəfər legioner vardır, o da güman edirəm ki, Natalya Məmmədovadır. Başqasına rastlaşmadıq. Heç ehtiyac da yoxdur, öz rabitəçi qadınlarımıza dövlət hər cür şərait yaradıb ki, onlar asudə vaxtlarında voleybol oynasınlar. Bunun üçün poçt idarələrində hətta sabun satmağa da nazir tərəfindən şəxsən icazə verilmişdir.
Bir daha milli qadın voleybolçularımızı təbrik edirik və bayrağımızı zirvələrə qaldıranlara xor baxmaq fikrinə düşənləri şiddətlə qınayırıq. Belə şəxslərdən biri özünü iqtisadçı ekspert kimi təqdim edən müsavatçı Qubad İbadoğludur. Fikrimcə, bu insan uğurlarımıza sevinmir. Məsələn, “Evrovizion”da qələbə qazandığımız vaxt mən İbadoğlunu Azadlıq meydanında maşının üstünə çıxıb qışqıran vəziyyətdə görməmişəm. Nə deyim, ayıb olsun.
Hələ baxın görün İbadoğlu təzə nə söyləyibdir. Deyir ki, Dövlət Bayraq Meydanına gedən 2 kilometr yolun çəkilişinə 65 milyon manat xərclənməsi korrupsiyadır. Qardaşım, sən niyə vətəni sevmirsən? Nədən üçrəngli bayrağa xor baxırsan? Axı bayraq yolunda insanlar şəhid olur, can qoyur, neçə nazirimiz, məmurumuz bayraq yolunda həlak olmuşdur. İndi bu bayraq yoluna 65 milyon sərf edilməsi niyə sənin gözünə çox görünür? Hələ azdır fikrimcə. Biz bayrağımız yolunda nə qədər xərc çəksək xeyrin görərik. Yenə qeyd edirəm, adamlar bayraq yolunda ölür, bu isə Bayraq Meydanı yoluna çox pul getdiyini söyləməklə nə qədər radikal müxalifətçi olduğunu göstərir.
Başqaları bir yana, heç olmazsa Nataşa Krsmanoviç qədər vətənsevər olmaq mümkün deyildimi?

1741 dəfə baxılıb