SƏNİN BİLDİYİN İNGİLİS DİLİ

	25 may 2012


Onlayn ictimai-siyasi qəzet

Sevinc TELMANQIZI

SƏNİN BİLDİYİN İNGİLİS DİLİ

Və ya sənə 200 manat da çoxdur

Bu, bir jurnalist klassikasıdır. Hər il eyni vaxtda əqrəblər bir saat geri çəkiləndə bizlər ölkəmizdəki bir çox adamların, sahələrin... geri çəkilməsini arzulayırıq. Məsələn, filan məmuru da saat kimi bir pillə geri çəksəydilər, bəhmən deputatı bir il əvvəlki, yəni, deputat seçilmədən öncəki halına qaytarsaydılar deyə xülyalara qapılırıq. Arzulamaq da ki, məşhur rus məsəlində deyildiyi kimi, zərərli deyil.

Belə arzulara son vaxtlar təhsil naziri Misir Mərdanov da düşür. Açıqlamalarının xronologiyasına baxırsan, adamı dəhşət bürüyür. Bir neçəsini yada salaq. “Belə getsə, nazirlikdəki əsaslı təmir idarəsi ləğv ediləcək”, “Saxta diplomlu müəllimlərin sayı artıb, bunu aşkarlayacağıq”, “200 manata heç bir ağıllı adam müəllimə işləməz”, “Ölkədə 200 min müəllimin təkmilləşməsinə ehtiyac var”.... Və deyəsən psixologiyada belə hal var - şəxsiyyətin ikiləşməsi. Yeri düşüb, yazım. Jurnalistlər danışır ki, xalq yazıçısı Elçin də hərdən “525-ci Qəzet”ə özündən götürdüyü müsahibələri göndərirmiş. Tutaq ki, müsahibənin “kuliminasiya” nöqtəsində “jurnalist Elçin” baş nazirin müavini olan Elçindən soruşurmuş ki, Elçin müəllim, axı sız niyə əsəbləşirsiz? Sonra müsahib “sakitləşirmiş” və müsahibə jurnalist Elçinin sualları ilə davam edirmiş. Anlayacağınız, tam bir məzhəkə.... İndi sıravi Misir də nazir Misiri divara dirəyib: niyə müəllimlərin maaşı pisdir, niyə bu çirkin rüşvətxorlar təhsil sektorunu bürüyüb, niyə, niyə, niyə....? Adama da maraqlı gəlir ki, nazir kreslonu itirməmək üçün daha neçə-neçə “diplomsuz”, “təkmilləşməmiş” müəllimi, rüşvətxor nazirlik işçisini, savadsız müəlliməni... qurban edəcək?
Bu açıqlamaları oxuyandan bir gün sonra uşağın məktəbində ingilis dili müəlliməsi ilə söhbətə getmişdim. Klassik “uşağın durumu necədir” mükaliməsi idi. Müəllimə ənənəvi taktikadan istifadə edib “uşağı müəllim yanına qoyun, zəifləyib” deyərək, əslində özünü nişan verdi. “Mən ingilis dilini bilirəm, özüm məşğul oluram” cavabıma isə son illərdə ilk dəfə müşahidə etdiyim unikal, şedevr bir həyasızlıqla cavab verdi: “Bilirsiz, xanım, indi məktəblərdə keçilən ingilis dili sizin bildiyiniz ingilis dilindən deyil. Yeni proqramdır və bunu ancaq öz müəlliməsi keçə bilər”.
Bu, Misir Mərdanovun canıyananlıqla “200 manata işləyə bilməyən” dediyi, təkmilləşməsinə ehtiyac duyduğu müəllimələrdən biri idi. Onun bəlkə də təkmilləşməsinə ehtiyac var idi, amma insan olaraq. Onsuz da 200 manata işləyəcək qədər sadəlövh deyildi. Sadəcə, sən nə qədər ağılsız olmalı, ya da qarşındakını nə qədər səfeh hesab eləməlisən ki, ona “mənim bildiyim ingilis dili sənin bildiyindən daha yaxşıdır” məntiqini sırıyasan? Bu, təxminən yarmarkadakı alverçinin “bu maldan bazarda başqa heç kimdə yoxdur” öyünməsinə bənzəyirdi.
Və işin faciəvi tərəfi odur ki, “ay müştəri, gəl bəri” deyə valideyn səsləyən müəllimələrin az qala yarıdan çoxu bu taktika ilə işləyir. İmkanınız olanda məktəblərə baş çəkin. Siz bilirsiniz ki, bəzən sinfin yarısı dərs saatında özəl məşğələ keçir, o biri yarısı isə oturub bilik öyrənənlərə baxır? Onda mən də soruşuram ki, elə o 200 manat da həmin müəlliməyə çox deyilmi? Bəlkə azaldasınız?
Bu cavabdan özümə gəlməmiş orijinal açıqlamaları ilə fərqlənən deputat Hadı Rəcəblinin boşanmalarla bağlı bir çıxışını oxudum. Müəllim deyirdi ki, indi varlılar kasıblara nisbətən daha çox boşanır, çünki pul da insanı qudurdur, arzuları sərhəd tanımır. İngilis dili müəlliməsi kimi, deputat da camaatı xamlamağa çalışır deyəsən. Pul əl çirkidir deyə mesaj ötürür öz aləmində. Amma hərdən kriminal statistikaya baxsa, pis olmaz. İmkansızlıq ucbatından içkiyə qurşanıb, sonra da həyat yoldaşını öldürən atalar, pul qazanmaq üçün ailəsini atıb Türkiyəyə, Dubaya gedən analar... bu ölkədə yaşayır. “Varlılar da ağlayır” serialının çəkilməsindən isə 20 ilə yaxın vaxt keçib. Odu ki, artıq bu ölkədə heç kim belə nağıllara inanmır, Hadı müəllim.
Deyəsən, jurnalist klassikasına qayıtmağın yeridir. Kimi bir il, yox, yox, bir əsr geriyə qaytaraq? Bəzi namizədlərin adı yuxarıda çəkilib...

989 dəfə baxılıb