ÜÇ MUŞKETYORU TAPIN...

	25 may 2012


Onlayn ictimai-siyasi qəzet

Sevinc TELMANQIZI

ÜÇ MUŞKETYORU TAPIN...

Qəzetlər tez-tez, yorulmadan prezident İlham Əliyevi aldadanlardan yazır. Hər dəfə də eyni hikkəqarışıq, sadəlovh təəccüblə. Dünən birini də bizim əməkdaşlar üzə çıxarmışdı. Demək, noyabrın 24-də ölkə başçısı İlham Əliyev “Nizami” kinoteatrının lentini kəsib. Hətta içəri keçib, “Üç muşketyor”dan bir parça da izləyib. Amma səhəri gün kinoteatrı tamaşaçıların üzünə bağlayıblar ki, hələ təmir bitməyib, kino-mino da yoxdur. Gedin, bir də bir ildən sonra, yəni, 2012-ci ildə gələrsiz.

Düzünü deyim, hər dəfə də bu kimi xəbərlərin baş səhifəyə daşınması adamı qıcıqlandırır. Bölgələrdə tikilən, amma həkimsiz, tibbi personalsız xəstəxanalar, müəllimsiz, şagirdsiz məktəblər, boş qalan mərkəzlər, mədəniyyət ocaqlarını... görən camaatıq biz. Xəstəxana var, amma bölgə insanı dişi ağrıyanda Bakıya, bir az pulu varsa, İrana, Türkiyəyə üz tutur. Rayonlardakı məktəbləri çoxdan hörümçək toru bağlayıb. Mədəniyyət mərkəzlərində isə yel vurub yengələr oynayır. Və bunlar qara camaatı, Fatmayla Məmmədi aldatmaq üçün deyil. Heç onları aldadılmaq “şərəf”inə də nail etmək istəmirlər. Hər şey bir nəfər üçündür bu ölkədə. O görsün, “əhsən” desin, televiziyalar bunu çəksin, rəsmi qəzetlər yazsın deyə..
Bu yalana təəccüblənmək təxminən spiker Oqtaq Əsədovun tıxacda qalmasına təəccüblənməyə bənzəyir. Halbuki bal kimi məntiqi ardıcıllıqdır. Ölkəni illərdir tıxaca salıb, çıxmağa qoymayanların “3-cə saat” tıxacda qalması o qədər təbii və ilahi ədalətdir ki, başqa söz deməyə hacət yox. Lap elə, guya o həmin 3 saatı tıxacda keçirməyib, parlamentdə, iş otağında keçirsəydi, bu camaata, insanlara nə faydası olacaqdı ki? Bizdə belə anormallıqlara immunitet yarandığı halda yenə də uşaq sadəlövhlüyü ilə təəccüb də məni təəccübləndirir.
Təəccüb demiş, yəqin xəbəriniz var. “Buta Palace” adlı məkanda “The first-2011" adlı mükafatlandırma mərasimi keçirilib. Ora qatılan türkiyəli sənətçilərdən birinin pencəyini oğurlayıblar, o birisindən gömrükdə rüşvət alıblar, bir başqası da nəsə başqa cür aldadılıb. Təşkilatçının açıqlamasını oxudum o gün. Deyir, pencək oğurlanmamışdı, sadəcə kimsə çaşıb geyinib getmişdi. Gömrükdə rüşvəti isə... sənətçi veribsə, öz günahıdır. Mən indi qonaqpərvərlik, dost-qardaşın yanında biabır olmaq haqq-hesabına girməyəcəm. Amma pencək oğurluğunu ”kiminsə çaşıb geyinməsi" kimi qələmə vermək ancaq bizim kimi yalana, oğruluğa, istismara öyrədilmiş cəmiyyətlərdə mümkündür.
Təsəvvür edin, ölkədə pensiyalar, maaşlar kəsilir, camaat özünü inandırır ki, ölkənin borcları, iqtisadi problemləri var, lap elə “Avrovision”a hazırlaşırıq. Bir yolu ildə beş dəfə bağlayıb, təmir edirlər. Camaat yenə də özünü inandırır ki, şəhərdə maşın çoxdur, yük maşınları da şəhəriçi yollardan istifadə edir deyə... yollar tez sıradan çıxır. Adamın pencəyi oğurlanıb, tədbirin təşkilatçısı deyir, kimsə çaşıb geyinib. Ya da ki, “rüşvət istəyirlər, amma sən vermə” deyə ölkəyə gələn qonağa müdrik məsləhət vermək ağılsızlığın ən son həddidir. Adama deyərlər, sən özün rüşvət istənəndə kiməsə üzünü bozardırsan bəyəm? Lənət şeytana, bu qədər zibilin içində boğulan ölkəyə, xeyir ola, qonaq çağırırsız? Hansı gününüzü camaatın gözünə soxmaq istəyirsiz? Adam bunların “böyüyüb-böyüyüb” Avrovision yarışması keçirəcəklərini düşünəndə canına vicvicə düşür. Oğurlanan çemodanlar, pencəklər... Avropa qəzetlərinin manşetlərini indidən görür kimiyəm...
Başağrısı olmasın, amma İlham Əliyev “Nizami” kinoteatrında “Üç muşketyor”u təsadüfən izləməyib. Bu, ölkənin konkret neçə nəfər və kim tərəfindən idarə olunmasına işarədir. Onların kimliyini özünüz tapın. İtən pencəyə görə isə baş sındırmayın. Dedilər axı, onu kimsə çaşıb geyinib...

521 dəfə baxılıb