SƏNİ DAHA YAXŞI YEYƏ BİLMƏK ÜÇÜN...

	25 may 2012


Onlayn ictimai-siyasi qəzet

Sevinc TELMANQIZI

SƏNİ DAHA YAXŞI YEYƏ BİLMƏK ÜÇÜN...

Biz jurnalistlər tez-tez dünyanın bahalı şəhərləri ilə bağlı siyahılar hazırlamağa meylliyik. Xüsusən də Tokionu, Parisi... bu siyahının başında görəndə sanki ürəyimizə yağ yayılır. Guya ki, okeanın o tayındakı Jerar və ya Yakusima çörəyə bizim kimi 30 qəpik yox, 1 manat 30 qəpik verəndə nəsə qabağa düşürük? Yox, amma nəsə dərdimizə bir həmdəm axtarırıq. Eyfel qülləmiz, başdan papaq salan göydələnlərimiz olmayanda nə olar, bizim də neftimiz var...

Tağı Əhmədovun metrosunun 20 qəpik olması ilə Bakının bahaçıllığı ilə bağlı saqqız kimi çeynənən söhbətlər yenidən alovlandı. Zarafat deyil, “may fay”ı (hər halda metropolitan rəisi özü onu belə adlandırır, bizim kimi jurnalistlərin cızıldaması ilə deyil ki-S.T) olası bir metroda gediş haqqı 5 qəpik qalmayacaqdı ki. Amma tək metro olsa, dərd yarıdır.
Bu şəhərdə yaşamaq da, yemək də, nəfəs almaq da atəş kimi əl yandırır. Siz türk şairinin “bədava yaşayırıq, bədava. Hava bədava, su bədava” deyə sayıqlamasına baxmayın, bizdə bu sadalananların hamısı üçün pul ödəmək lazımdır. Məsələn, evin yoxsa, kirayədə qalmalısan. Kirayədə qalırsansa, ən azı 200 manatını qatlayıb kənara qoymağın lazımdır. Bakının bir çox hallarda heç bir şəraiti, normal standartları olmayan mənzillərində isə kirayə haqqı ceyran belindədir. Son 10 ildə paytaxtda özünü göstərən tendensiyalardan biri də köhnə Bakı sakinlərinin öz evlərini baha qiymətə əcnəbilərə kirayəyə verib, özlərinin şəhər kənarına köçməsidir.
Yaxud yemək məsələsi. Bakıda kafe-restoran biznesi qədər sürətli inkişaf edən ikinci bir sahə olmasa da, buralarda da qiymətlər əl yandırır. Orta statistik azərbaycanlı üçün müntəzəm hansısa kafedə yüngülvari nahar etmək orta aylıq məvacibinin böyük bir qismini təşkil edir. Rəqəm və faktlara istinad edək. Bu gün Bakının istənilən kafesində ən populyar yemək növü şübhəsiz ki, kababdır. Bir şiş kabab, xiyar-pomidor salatı, bir şüşə meyvə suyu, bir az da pendirE Bir şiş kababın 6-7 manat, salatın 2 manat, pendirin 2 manat, şirənin isə 1-2 manata başa gəldiyini hesablasaq, bu, zəif nahar belə müştəriyə 13-14 manata başa gəlir. Hər gün belə nahar etdiyinizi xəyalınıza gətirin(məhz xəyalınıza), bu, sizə ayda 550 manata başa gələ bilər. Məvacibiniz nə qədərdir? 350 manat... Onda yıxılıb ölmə zamanı yetişibE
Təbii ki, hər zaman belə bahaçılığın səbəbini soruşanda müştərilərə “bizdə ət keyfiyyətlidir” və ya “yer haqqı bahadır” kimi cavab verilir. Ətin kilosu 7 manat olan ölkədə bir şiş kababa görə 6 manat ödənməsi, habelə, restoranın az qala süpürgəçi pulunun da müştərinin cibindən çıxarılması cəhdi yalnız anormallıqdan xəbər verir təbii ki. Kimsə hökumətə vergi, sosial sığorta, rüşvət, hörmət, izzət pulu ödəyirsə, bunda müştərinin suçu nə?
Pal-paltardan isə heç danışmıram. Yenə də gömrük, sərhəd, kirayə, işıq, qaz...pulu deyib, gerçək dəyərindən 5 dəfə artıq qiymətə sizə sırınan əski parçaları Bakının necə bahalı olduğunun sübutudur. Qiymətə baxanda sənə elə gəlir, hansısa brendin malını almısan. Əslindəsə onu İstanbul çarşılarında su qiymətinə tapmaq olar.
Qırmızıpapaq canavara “çevrilmiş” nənəsindən “sənin dişlərin niyə belə yekədir” deyə soruşur. Yekədişdən də tam səmimi cavab gəlir: səni daha yaxşı yeyə bilmək üçün. İndi bizim “yekədiş Bakı”nın durumu da eynidir. “Sən niyə belə bahasan, Bakı” desən, elə bu cavabı alacaqsan: “Səni daha yaxşı yeyə bilmək üçün”. Həqiqətən də Bakıda yaşamaq canavara yem olmağa bərabərdir.

474 dəfə baxılıb