ÇÖRƏK YOXDU, TORT YEYİN...

	25 may 2012


Onlayn ictimai-siyasi qəzet

Sevinc TELMANQIZI

ÇÖRƏK YOXDU, TORT YEYİN...

Hər il bu ay, elə bu günlərdə elə həmin mövzular gözümüzü-qulağımızı yorur. Astroloqlar mataha minir yenə, üzlərinə müdrik ifadə verib, bürcümüzün yeni ildəki proqnozunu verir. Filan ay əlinizə pul gələcək, bəhmən ay səhhətinizdə problem olacaq, o biri ay da məsələn, ərə gedəcəksiz... Hətta bizim milli astroloqlardan biri özünü bu işə o qədər, türkün sözü, qapdırmışdı ki, deyirdi, bəs ulduzlarla mənim aramda fəlsəfi bir bağ var. Bir dəfə hansısa falçıdan əyləncə məqsədilə götürdüyümüz müsahibəyə ağzı köpüklənə-köpüklənə etiraz edəndə də həmin havalarda idi.

“İnsanları aldatmayın, şarlatanları reklam etməyin” deyə bar-bar bağırırdı telefonda. Düzü, birinin kompüterə, o birinin isə karta baxıb, nəsə uydurması arasında xüsusi fərq olmasa da, bu gerçəyi o vaxt həmin “dahi”yə anlada bilməmişdim.
İndi yenə başlayıblar. Pullanacaqsız, işləriniz yaxşı gedəcək, səhhətiniz qaydasında olacaq (olmayacaq) haqq-hesabına... İldə 12 ay, 365 gün... olduğunu nəzərə alanda həmin sadalananların mütləq həmin günlərdən birində başımıza gələcəyinə əmin deyilikmi zatən? Xəstələnəcəyik də, əlimizə pul da gələcək, uğurlara (uğursuzluqlara) imza atacağıq. O zaman bu “şarlatan”lara düha münasibəti göstərmək niyə?
Guya batil inanclar bununla bitir? Ayın 29-30-da hamı başlayacaq bir-birinə o şit məsləhətləri verməyə. “Saat 12-ni vuranda heç kəs yatmasın, yoxsa il boyu elə yataqda qalar”. “Həmin dəqiqələrdə yeyin, için, şənlənin ki, il də belə şən keçsin”. İlin ilk gününə gəlincə, həmin gün evinə qonaq gələnin kimliyi də əhəmiyyət daşıyan məsələlərdəndir. Əlində nə gətirməsi, gəldiyi gün özünü necə aparması.... say, say bitən deyil. Sinov gedirik belə sınamalardan ötrü. Yəni, mahiyyətə yox, formaya əhəmiyyət verənlərdənik. Başımıza gələn pis, uğursuz işlərdə mütləq bir qara pişik, qara daban, qara it... axtarmaqda maraqlıyıq. Halbuki işimiz alınmırsa, bunun səbəbkarının, tutaq ki, hansısa rüşvətxor məmur, çirkin rejim olduğunu qəbul etməklə söhbətə başlaya bilərik.
Astroloqların bazarına bir soğan suyu sıxıb keçim, tort məsələsinə. Ölkənin baş kulinarı, yox, yox, biskvit ustası Eldar Əzizovun bişirtdirdiyi torta. Bir neçə il əvvəl “Mətbəxdə” rubrikam vardı, müsahiblərimdən “Azərbaycanı hansı yeməyə bənzədirsiz” deyə soruşurdum. Böyük əksəriyyət orijinallıq üçün “tort” deyirdi, içində hər cür şirin təam olan torta -qozlu, kremli, bəzəkli imiş guya yurdumuz. İndi baxıram, Azərbaycanı gerçəkdən torta çevirməyə çalışırlar. Amma içində heç nə yoxdur. Üstü bəzəkdir sadəcə...
O məşhur fransız məsəlini bilirsiz yəqin. Fransa Kraliçası Marie Antoinette aclıq və yoxsulluqdan üsyan edən xalqa ‘’çörək tapa bilmirsiz, tort yeyin" demişdi. Lənət şeytana, əslində bu günlərdə fransızların hər şeyini boykot edirdik, amma yeri gəldi deyə bunu yazdım. İndi Eldar Əzizovunku da həmin hesabdır. Demək istəyirlər ki, balam, nolsun, çörək tapa bilmirsiz, alın sizə tort. Hərəyə bundan bir dilim düşəsidir.
Amma Allah bunların axırını Marieninki kimi eləməsin. Axırı necə olub? Dəli deyiləm ki, yazım. Gedin, tarix kitablarını açın...

825 dəfə baxılıb