CİN BEYNİNƏ VURANDA...

	25 may 2012


Onlayn ictimai-siyasi qəzet

Sevinc TELMANQIZI

CİN BEYNİNƏ VURANDA...

Srağagün səhər bu dialoqu eşidəndə Bakının taksi sürücüləri hələ üsyana başlamamışdı. Yolları qapatmamışdılar, polislər üstlərinə cummamışdı, evakuatorlar dövriyyəyə girməmişdi. Sadəcə iki kişi dalaşırdı. Biri o birinə elə beləcə də deyirdi: “Xleb Zavodu götürdün, dinmədim. Elmləri süpürdün, səs çıxarmadım. Uje Milli Məclisi də götürəndə cin vurdu təpəmdən”... Bir neçə saniyəlik çaş-başlıqdan sonra anladım ki, bu kişilər eyni saylı avtobusun sürücüləridir, davaları da sərnişin üstündədir.

Yəni, “elmləri süpürdün” deyəndə də, elm aləmini yox, metronun üstündəki canlı 20 qəpikləri, sərnişinləri nəzərdə tuturlar. Milli Məclisi “götürmək” deyəndə də binanın ələ alınmasından söhbət getmirdi, yenə dava 20 qəpik davası idi. Amma söhbət o qədər xoşuma gəldi ki, özümü az qala canlı tarix səhnəsində hiss etdim bir neçə saniyə. Sanki Sultan Süleyman bir-bir hansısa qalanı, şəhəri fəth edirdi. Sanki ölkədə qəfil bir inqilab başlamışdı. Sanki... Lənət şeytana...
Əslindəsə dediklərimin heç biri baş verməmişdi, sadəcə bir saat sonra taksi sürücüləri üsyana başladı. (Mənə də belə əyan olur-S.T)Nəqliyyat Nazirliyinə etiraz etdilər. Sonuncu köhnə taksiləri yoldan çıxarmağa çalışdı, sürücülər isə “iş yeri vermirsiz, barı imkan verin, pulumuzu qazanaq” deyirdilər. Şübhəsiz, mən də şəhərdə bər-bəzəkli taksi görmək istəyərəm, səliqəli salonu, hansısa bir təhlükə olanda müraciət edəcəyim firmanın maşınında mənzil başına çatmağı arzulayaram. AmmaE xalq deyimiylə desək, olan yerdən. Tutaq, mən mindim London taksisinə, getmək istədim Biləcəriyə. Elə bismillah edən kimi, 1 manat yazılacaqmı sayğaca? Sonra hər kilometrinə görə 50 qəpik. Bu vurub 8-9 manata çıxacaq, əmin olun. Amma köhnə, “öz əli, öz başı olan” taksi sürücüsü ilə qiymət sövdələşməsi etmək olur, cibinə uyğun qiymətə mənzil başına çata bilirsən. Bu, uzun izahatı niyə verdim? Çünki bizim millət indi “kəllə qoltuqda” gəzir, qəpiyinin hesabını aparır. Bir neçə ay sonra əcnəbi axışıb, Bakıda “badımcan bolluğu”(söhbət yeni taksidən gedir) görəcək deyə, heç kim büdcəsinə ziyan vurmaq istəmir. Bu halda üsyançıları polisə, maşınlarını isə evakuatora qoşmazdan əvvəl problemi kökündən çözmək lazım. Üstü bəzək, altı təzək formullarla yox...
Məsələn, neçə gündür, Azərbaycan Dram Teatrının iki aktrisası bir-birini qırır. Biri deyir, sən rejissorun otağına çox girib-çıxırsan deyə ön plandasan, o biri qayıdır ki, sən parıldamırsansa bunun günahı səndədir. Kim haqlı-haqsız, bilmirəm, amma bu da səbəbləri lap dibdə olan bəladan xəbər verir. Tutaq ki, məvacibi 300 manat olan subay aktrisaların bahalı kürkləri və teatr binasının qabağında tıxac yaradan “inomarka” maşınlarının mənbəyi sizin üçün də sual deyil? Və ya dava bunun davasıdırmı?
O gün bunlardan bir dəstəsi YAP-a keçəndə sualıma da cavab tapdım. Məsələn, aralarında biri vardı, dedi, YAP-a keçmək də hansısa komandaya azarkeşlik etmək kimidir. Bilmədim, qardaş bunu ezop dili ilə dedi, ya yox. Amma hələ ki, meydanda oynayan, bir-birinə badalaq vuran, qırmızı, sarı kart alan YAP komandasına azarkeşlik etmək elə 300 manatlıq maaşdan CİP-ə, “pulları çin-çinl” mərhələsinə keçmək üçün bir oyun idi. Baxırsan, nə istedadı var, nə komikliyi, nə səsi, amma meydandadır. Bilir ki, YAP-a keçəndən sonra fəxri ad da alacaq, sonra sim-sim sayağı “yap” deyib, bağlı qapıları açacaq. Allah kəssin elə açıq qapını...
Sürücü necə deyirdi? “Xleb zavodu götürdün, dinmədim. Sənətçini satın aldın, dinmədik, mətbuatı köləyə çevirdin, səsimizi çıxarmadıq. Amma... hansı mərhələyə çatanda cin beynimizə vuracaq? Ümumiyyətlə, elə cin varmı?

418 dəfə baxılıb