NADİM İLAHİYƏ EYNƏK VERİN!

	25 may 2012


Onlayn ictimai-siyasi qəzet

Elşad PAŞASOY

NADİM İLAHİYƏ EYNƏK VERİN!

Bu hökumət Qubad İbadoğlunun ciddi iqtisadi faktlara əsaslanan arqumentlərini eşitmir ki, o, müsavatçıdır, müxalifətçilik eləyir. Bu hökumət nəinki İctimai Palatanın, Ziyalılar Forumunun, heç tanınmış iqtisadçılardan olan Vahid Əhmədovun da xəbərdarlığına məhəl qoymur.

Elə parlamentdə 2012-ci ilin dövlət büdcəsi müzakirə olunanda büdcəyə tənqidi yanaşan Vahid Əhmədovla Fazil Mustafanın üstünə kükrəmədilərmi? Deyək ki, bu şəxslər də hökumətin uğurlarını görmür və Samir Şərifov demişkən, onlara eynək lazımdır. Bəs Beynəlxalq Valyuta Fondunun (BVF) dediklərinə nə sözünüz? İş orasındadır ki, İsa Qəmbərin, Əli Kərimlinin, İqbal Ağazadənin, Pənah Hüseynin, Rüstəm İbrahimbəyovun, Cəmil Həsənlinin, Azər Mehtiyevin, Eldar Namazovun dediklərini, hökumətə xəbərdarlığını bu dəfə BVF-nin Azərbaycan üzrə missiyasının rəhbəri Nadim İlahi dilə gətirib. Bəlkə o da qərəzlidir, hakimiyyətin uğurlarını görmür? Ona da eynək lazımdır?
Nadim İlahi Azərbaycana 2012-ci ildə büdcə xərclərinin azaldılmasını tövsiyə edib. Müsavat deputat qrupu hələ 2005-2010-cu illərdə hakimiyyətə çağırış edirdi ki, Dövlət Neft Fondundan büdcəyə transfertlər azaldılmalıdır. Müxalifətçilər gələcək nəslə də neftdən pay saxlamağa çağıranda Səyavuş Novruzov replika qalmadı atdı. YAP-çı deputat açılışı olmuş obyektlərdə kəsilən lentlərdən müxalifətə kostyum tikilə biləcəyini dedi. Ancaq iş o yerə çatdı ki, 2012-ci il büdcəsinin 60 faizini Neft Fondundan ayırdılar. Budur, cənab İlahi də neft gəlirlərinin belə sürətlə büdcəyə ayrılmasından narahat olduğunu deyir. Təsəvvür edin, 16,4 milyard manatlıq dövlət büdcəsi gəlirlərinin 9,9 milyard manatı (60 faizi) Neft Fondundan transfertlər hesabına formalaşır.
İqtisadçılar neçə vaxt idi deyirdi ki, investisiya proqramlarına ayrılan xərclər azaldılmalıdır. Deyirdilər 2 km yola 65 milyon manat xərcləmək bu dövlətin anasını ağlatmaqdır. Ancaq kimdir bu çağırışları eşidən?! Əvəzində investisiya xərclərinin az qala 6 milyarda çatdırdılar. Sadə vətəndaşlar illər idi “bir küçəni nə qədər təmir edərlər” sualına cavab istəyirdi. Hətta YAP-çı deputatlar “neft pulları ilboyu qazılan paytaxt yollarına səpilir” desə də faydası olmadı. Nəhayət, BVF Azərbaycana çağırış edib ki, ölkənin olan-qalan pullarını yollara səpələdiyiniz, divarların ağardılmasına, yeraltı-yerüstü tunel-körpülərə xərclədiyiniz yetər, heç olmasa bir zavod tikin, emal müəssisəsi açın.
Artıq cənab İlahi də 30 illiyə nəzərdə tutulan Zığ yolunun təmirə bağlanmasının şokunu yaşayır. Azərbaycanın 60 milyardlıq neft pulundan 30 milyardı artıq xərclənib, BVF buna görə narahatdır. Beynəlxalq qurum bizə, biz azərbaycanlılara görə narahatçılıq keçirir. Artur Rəsizadənin isə heç tükü də tərpənmir.
Neft pulundan vətəndaşa qıymayan hökumət təmir-tikinti, fontan quraşdırma, balkon ağartma işlərində əliaçıqdır. Gözünüz aydın, Gəncədə də filarmoniya tikiləcək. Yəqin tikiləndən az sonra onu da təmirə bağlayacaqlar. Bir tərəfini sökəcək, sonra yenidən tikəcəklər. Beləcə, büdcəni sökəcəklər, sökəcəklər, sökəcəklər... Necə ki, Bakıda Dövlət Filarmoniyasının təmiri qurtarmır ki, qurtarmır. 2003-cü ildə 27 milyon manata bərpa olunan bina yenə təmirdədir. 1 milyon ayrılıb. Bir ölkədə ki minimum əməkhaqqı 85 manat, müəllimin-həkimin maaşı 120-150 manat, uşaq pulu 10-20 manat ola, orda bir binanın təmirinə 30 milyon sovurmağın adını qoymağa Dədə Qorqud gərək...
Nazir Ziya Məmmədov London taksilərinə yer eləmək üçün minlərlə taksi sürücüsünü çörəkdən məhrum eləmək istəyir. Tanıdığım sürücülər var ki, diplom sahibləri olsalar da xaltura etmək məcburiyyətində qalıblar. Adam var gündüz bir işdə çalışır, gecə taksi sürür. Kefdən yox, ailəsini yaşatmaq üçün. Qarabağ əlillərini tanıyıram, bir ayağı protez taksi sürür. İndi şəhəri “gözəlləşdirmək” adı ilə on minləri çörəkdən eləmək hansı zehniyyətin məhsuludur?
Statistika Komitəsi hesabat yayıb ki, ölkədən getmək istəyənlərin sayı azalıb. Bəlkə yolpulu tapıb ölkədən qaça bilməyənlərə görədir bu azalma?! Vaxtilə adı çəkiləndə daş atıb başını tutan hökumət bu günlərdə korrupsiyaya qarşı mübarizənin 1 yaşını qeyd elədi. Bu dövlətin, millətin taleyindən narahat olanların çox sözünü illər sonra qəbul edirlər. Elə büdcəyə ayrılan, havaya sovrulan neft pulları ilə bağlı deyilənləri də. Heç olmasa İlahini eşidin...

610 dəfə baxılıb