YAXUD HAKİMİN “ƏSƏBPULU”

	25 may 2012


Onlayn ictimai-siyasi qəzet

Elşad MƏMMƏDLİ

YAXUD HAKİMİN “ƏSƏBPULU”

Məmləkətimizdə aparılan məhkəmə islahatları öz bəhrəsini verməkdədir. Əgər əvvəllər hakimlər siyasi xarakterli proseslərdə çəkişən tərəfləri ən azı görüntü xatirinə dinləyir, axırda aldığı sifarişə uyğun öz bildiyini edirdisə, indi ümumiyyətlə cavabdehin hüquqları tanınmır. Çox əla “islahatlar”dır, belə getsə, bir azdan heç məhkəməyə ehtiyac da olmayacaq.

***

İki gün öncə nəqliyyat naziri Ziya Məmmədovun oğlu Anar Məmmədovun “Yeni Müsavat” və “Azadlıq” qəzetlərinə qarşı iddiasına baxanda qəribə hadisələr baş verib. Yasamal Rayon Məhkəməsinin hakimi Elçin Qurbanov qəzetimizin nümayəndəsi Vaqif Hüseynin vəsatətini dinləmək əvəzinə, ona təpinib. Nümayəndə haqqını, qanunu tələb edəndə hörmətli Qurbanov bərk əsəbiləşib. Sən demə, hakimə qanundan danışmaq olmazmış, çünki dərhal Elçin bəy Vaqif Hüseynə deyib: “Elə etməyin ki, hakimin göstərişinə tabe olmadığınıza görə sizi cəzalandırım” (Cənab hakim məgər bilmir ki, məhkəmə prosesində hakim də, vəkil də, nümayəndə də yalnız qanunlara tabe olur?) Daha sonra əcaib bir hadisə baş verib. Hakim nazir oğlunun iddiasına baxmazdan əvvəl Vaqif Hüseyni “sözə baxmadığı”, qanundan danışdığı, hakimi əsəbiləşdirdiyi, etiraz bildirdiyi üçün 50 manat cərimələyib. Bir qədər sonra isə Anar Məmmədovun iddiasına baxaraq, “Yeni Müsavat”la “Azadlıq”ı ayrı-ayrılıqda 4 min manat cərimələyib. Üstəlik, qərar çıxarıb ki, qəzetlər nazir oğlunun 1 milyon manatlıq ayını yeməsi ilə bağlı yazdığı məqalələrin hər birinin ölçüsünə uyğun eyni səhifədə təkzib və üzrxahlıq verməlidir.
Görürsünüz, aparılan məhkəmə islahatları nəticəsində hakimin “əsəbpulu” anlayışı da ortaya çıxıb. Əvvəllər belə şey yox idi. Məsələn, vaxt var idi, 2003-cü ilin 15-16 oktyabr hadisələrinə görə şərlənib tutulmuş müxalifətçilər məhkəmə prosesində üzləşdikləri qanunsuzluqlara, ədalətsizliyə, üzəduranların böhtanlarına dözməyərək hakimi hətta açıq şəkildə ittiham edirdilər. Amma o zaman qanunda “əsəbiləşdirməyə görə” cərimə məsələsi yox idi. Məsələnin maraqlı tərəfi odur ki, hakim Vaqif Hüseynin onun əsəblərinə vurduğu ziyanın “maya dəyəri”ni yerindəcə, araşdırma-filan aparmadan, həkimdən arayış almadan hesablayıb. Belə çıxır, bu ölkədə oliqarx oğlunun əsəbiləşməyi hakimin əsəbiləşməyindən düz 80 dəfə üstün, yekə məsələdir. Çünki məhkəmə Anar Məmmədovun keçirdiyi stressə görə 4 min manat təzminat kəsib...

***

Günümüzə, saatımıza bax, indi biz iş-gücümüzü atıb nazir oğlunun ayını necə kabab edib yeməsinin əksini təsvir etməliyik. Məntiqlə hakim “geriyəoxuma” hökmü çıxarıb. Hörmətli Elçin Qurbanov, tutaq ki, biz ayının kəsilməsi anına qədər yazıları geri “oxuduq”. Axı ayı daha yoxdursa, biz onun qaytarıb qəfəsə salınmasını necə təsvir edək və oxuculara deyək ki, əlahəzrət ayı sağ-salamatdır, kefi kök, damağı çağ yaşayır? Bunun mexanizmini bizə öyrədə bilərsinizmi?
Ərz edim ki, Azərbaycanın beynəlxalq aləmdə imicinə zərbə vurulmasında ölkənin hakimləri ciddi rol oynayırlar. Burada əcaib qərarlar çıxarırlar, biz də götürüb işi göndərərik Avropa İnsan Haqları Məhkəməsinə, onlar da hökuməti cərimələyir və ölkəmizin adı qara siyahılarda yer alır. Son 1 ildə Avropa Məhkəməsi Azərbaycana qarşı azı 10 qərar çıxarıb. Kəsilən cərimələri isə hökumət ödəyir, hakimlərə isə təpinən yoxdur. İndi bizim qarşıda hökuməti cərimələtmək üçün azı 7 fürsətimiz var. Çünki hazırda “Yeni Müsavat”a qarşı 7 məhkəmə iddiası var. Əminik ki, bunların hər biri üzrə babat təzminatlar alacağıq. Ona görə də qoy bu hakimlər öz işlərində olsunlar. Bir gün gələcək, ölkə rəhbərliyi AM-də kəsilən cərimələri hakimlərin özlərinə ödətdirmək qərarını verəcək. Artur Rəsizadə nə qədər hakimlərin ucbatından xərcə düşəcək?

539 dəfə baxılıb