SONYA HƏSRƏTİNDƏ OLANLAR

	25 may 2012


Onlayn ictimai-siyasi qəzet

Sevinc TELMANQIZI

SONYA HƏSRƏTİNDƏ OLANLAR

Bu iddianı qosqoca Türkiyə xarici işlər naziri deməsəydi, boş vermək olardı. Deyərdik ki, yenə də hansısa yerli postmodernist yazar diqqət cəlb etmək üçün belə söhbəti ortaya atıb. Amma xəbərləri araşdıranda məlum oldu ki, cənab nazir türk kişilərin rus qadınlarla evlənməsi, bu cür izdivacların artması tərəfdarıdır.

Deyir, rus ailə mədəniyyəti türk ailə mədəniyyətinə çox yaxındır. Rus qadınların ailələrinə bağlı, sayğılı olduğunu da iddia edir üstəlik. Ailə mədəniyyətləri arasında hansı bağlılıq olduğunu deyə bilmərəm, amma Trabzonun, İstanbulun əxlaqsızlıq yuvalarından daha çox rus qadınlar çıxır.
Amma etiraf edək ki, bu, təkcə Əhməd bəyin düşüncəsi deyil. İllər uzunu Rusiyadakı əsgərlikdən qayıdanda qoltuğuna Nataşasını da vurub gələn əmi-dayıların ölkəsində yaşamışıq. Hələ qolunda yaşıl rəngli, “Lena-lyublyu tebya”, “Maşa” döymələri yazılan uzaq qohumları demirəm. Deməyim o ki, yabançı, xüsusən rus gəlin patologiyası elə bizim diyarlara da xasdır.
Sabirin yüz il bundan əvvəl “Tacirlərimiz sonyalara bənd olacaqmış, Bu yazıq fatma, tükəzbanları neylərdin, İlahi” misraları da indi məhz bu səbəbdən, yəni bilərəkdən təhrif olunub. Xüsusən bizim ellərdə və xüsusən müasir ədəbi çevrələrdə. Birinci cümləni bilərəkdən “delete” edib, ikinci cümlənin ətrafında məntiq oynadanlar var. Əcnəbi qadın həsrəti ilə yazılan yazılar 19-cu əsrdə “mənim madam balası” deyib, rus qadınların ətəyindən sallanan Məşədi təfəkküründən uzağa getmir. Bəzən yazı müəllifləri əcnəbi qadını o qədər fetişləşdirirlər ki, səssiz qalmaya bilmirsən. Sanki bundan öncəki həyatlarında belə bir evlilik yaşayıblarmış kimi. Bütün azərbaycanlı qadınları bir olmadığı kimi bütün əcnəbi qadınlar da bir deyil. Axı eyni məntiqlə azəri qadınlar da öz rus, fransız... həmcinsləri haqda “onlar pintidir, əyyaşdır, əxlaqsızdır...” kimi sözlər söyləyə bilər. Bəs doğru olarmı? Yox! Ailə həyatı qapalı qutu kimidir - içəridə nəyin necə yaşandığını kim bilir? Heç bir münasibət bir-birinə bənzəmir, barmaq izi kimidir Əcnəbi qadınların öz ərlərinə hansı əzablar verdiyini, necə sındırdığını bilən varmı? Yox, əgər qonşunun toyuğu qonşunun gözünə qaz kimi görünürsə, o başqa məsələ...
Bu tip açıqlamalarda və yazılarda daha bir anormal məntiq müşahidə olunur. Sanki Allah qadını məhz kişinin həyatını asanlaşdırmaq, onun mədəsini, kefini xoş etmək üçün yaradıb. Yəni, qadının dünyaya gəliş məqsədi, yaşam missiyası buymuş elə. Təmiz pal-paltar, dadlı yemək, sağlam, tərbiyəli körpə, səliqəli ev-eşik... Təxminən Çin robotu misalı. Səhər açılandan qadın “tok”a taxılıb, bütün bu sadaladıqlarımla məşğul olmalı, bu arada iş görə-görə Kafkanı oxumalı, hekayə, köşə, şeir yazan həyat yoldaşının(sevgilisinin) ilham pərisi olmalı, bər-bəzəkli qiyafələrdə onun göz zövqünü oxşamalıymış. Ər də narazılığa yer qalmayanda məşhur filmin “bu nə plovdur bişirmisən, yağ gətir” sitatını dodaqaltı mızıldanaraq daim taleyindən şikayətlənməliymiş. Necə deyərlər, alma mənə, armud mənə, hər əlimə də bir nar gərək.. Amma bunca istəyin qarşılığında qadına bir insan olaraq nə verilməlidilər? Bunun cavabı yox mübarək açıqlamalarda...
“Möhtəşəm Yüzil” serialına baxmayanlar az tapılar. Rus əsilli(krım köklü) Hürrəm Sultanın öz rəqiblərinə qarşı hansı metodlarla mübarizə apardığına da həmçinin. Hələ texnikanın inkişaf etmədiyi, kompüter, internet, mobil telefonun... olmadığı dönəmdə hansı üsullarla mübarizə gedir? Rəqibinin üzünə yandırıcı maddə atma, içkisinə zəhər qatma... Nə axtarsan var rus gəlində. Adam hərdən fikirləşir, Hürrəm 21-ci əsrdə yaşasaydı, hansısa türkiyəli nazirin arvadı olsaydı, Türkiyənin daşını daş üstə qoymazdı...
Bunlar hələ də rus gəlin həsrətindədilər...

583 dəfə baxılıb