DÜZƏLİB HƏR YARAĞIMIZ...

	25 may 2012


Onlayn ictimai-siyasi qəzet

Zahid SƏFƏROĞLU

DÜZƏLİB HƏR YARAĞIMIZ...

Ura-patriotlar bizi qınamağa tələsməsinlər, - hər halda, Azərbaycanın birləşməsini bizdən çox istəyə bilməzlər, - ancaq YAPtokratiya əhli və onun havasını saxlayanların vərdişidir: vaxtaşırı siyasi gündəmə yersiz mövzular daşıyıb ac-yalavac, qəzəbli toplumun diqqətini ölkənin əsas problemlərindən, yerə 2 sm qar düşən kimi paytaxtda yaşanan rəzil təsərrüfatsızlıqdan yayındırmağa çalışırlar. Ölkənin adını dəyişdirmək təklifi də eyni qəbildəndir.

Avtoritar, totalitar rejimlərin domino effekti ilə çökdüyü, ictimai narazılığın Azərbaycanda qırmızı xəttə çatdığı dövrdə aydındır ki, belə təşəbbüskarlıq kimlərin marağındadır. Çünki bu dəqiqə ad məsələsindən qat-qat vacib azı 7 problem sadalamaq olar ki, onların da hamısı hazırkı mövcud dönəmdə rişə atıb, böyüyüb, illərdir həllini gözləyir. Hansını deyək, Qarabağ probleminimi? Dürüst seçki, korrupsiya və rüşvət, monopoliya probleminimi? Bəlkə siyasi azadlıqlar və vicdan məhbuslarının məsələsi, dolanışıq problemi ad məsələsindən daha az önəm kəsb edir toplum və dövlət üçün?
Qəribədir, bu dərdlərdən hər biri Azərbaycanı uçuruma aparacaq gücdə ikən, məmləkətin ismini dəyişdirməyin vaxtımı, yerimi? Burda deyiblər, “düzəlib hər yarağımız, qalıb saqqal darağımız”. Bu ona bənzəyir ki, birini dar ağacına aparırlar, bu dəm kimsə qıraqdan təklif edir ki, bəs gəlin onu əvvəlcə yaxşıca yedirdək, üstəlik, adını də dəyişək, sonra asaq.
Belə baxanda, ideya olaraq normaldı, məqbuldu. Özü də kifayət qədər köhnə təklifdi bu. İş ondadır ki, müstəqil Azərbaycanı “Şimali Azərbaycan” adlandırmaq təşəbbüsünün minimum 20 yaşı var. Ancaq təklifin məhz indi gündəmə gətirilməsinin faydadan çox zərəri olacağı qənaətindəyik. Ölkənin onsuz da məhdud iqtisadi, siyasi-diplomatik potensialını, təcavüzkara qarşı təbliğati resurslarımızı başqa ağır problemlər dura-dura, bu yöndə xərcləmək çətin ki, praqmatizm göstəricisi sayılsın.
Təsadüfi deyil ki, görkəmli tarixçi alim Cəmil Həsənli də təklifin əleyhinə çıxıb. Alim tez-tez dövlətin adını, millətin əlifbasını, dilini dəyişməyi yanlış sayır. İşğal problemi yaşayan, iqtisadi cəhətdən inkişaf edə bilməyən və hələ də xammal ölkəsi sayılan, həmçinin əhalisi məşəqqət içində həyat sürən və nəhayət, Ermənistanın İran kimi müttəfiqi ilə qonşu olan bir ölkəyə həqiqətən bu mövzuda ictimai müzakirələr yaraşmır.
Sual da budur ki, sadalanan dərdləri çözmədən, müstəqilliyimizi dönməz etmədən, İranın real təhdidlərindən sığortalanmadan ad dəyişmə kimi İran üçün qıcıqlı bir məsələni gündəmə daşımaq uzaqgörən gediş hesab edilə bilərmi? Bundan daha əfsəri o olar ki, rəsmi Bakı güneyli soydaşlarımızın doğal haqları uğrunda mübarizəyə real dəstək versin, nəinki məsələdə Tehran rejimi qarşısında ürkək, özünümüdafiə mövqeyi tutsun və hətta onun qorxusundan güneyli siyasi mühacirləri Şimali Azərbaycandan didərgin salsın...
Bu gün isə bizim çözməli olduğumuz 1 nömrəli problem Azərbaycanın yerdə qalan 4/5-nü hərbi və iqtisadi cəhətdən güclü, demokratik, əhalisi rifahda bulunan, regionda Türkiyə kimi söz sahibi olacaq dövlətə çevirməkdir. Yalnız bundan sonra Qarabağ məsələsinin üzərinə uğurla getmək olar. Yalnız bu fonda sadaladığımız digər köklü problemlər aradan qalxmış olacaq. Yenə yalnız bundan sonra Güneyə real dəstək verilə, onun müstəqilliyi (Azərbaycanın bütünlüyü) tezləşə, o sırada da ad məsələsi uğurla həllini tapa bilər. Zira, siyasi reallıqlar nəzərə alınmadan səslənən ən gözəl təklif belə fiaskoya məhkumdu. Siyasətdə tələskənlik də, aşırı astagəllik də fəsad gətirər.
Ad məsələsi Güney müstəqillik əldə etdikdən sonra onsuz da aktuallaşacaq və sövq-təbii dünyanın siyasi gündəmini zəbt edəcək. Çünki eyni adda iki Azərbaycan dövləti ola bilməz. O tayda “Cənubi Azərbaycan” olacaqsa, bu taydakı dövlət də bəlli məsələdi ki, dönüb “Şimali” olacaq və bütün dünya bununla asanca barışacaq. Başqa sözlə, biz hər şeydən öncə İrandakı prosesləri izləməli, təhlil etməli və gözləməliyik. Ancaq passiv yox, aktiv gözləmə mövqeyi tutmaqla. Adı isə həmişə dəyişə bilərik.
Bəlkə buna heç lüzum da qalmayacaq. Almaniya birləşəndə adlarında “qərbi”və “şərqi” sözləri olmayıb ki. Yaxud “Müstəqillik Aktı” təsdiqlənəndə gərək Azərbaycan Respublikası cümhuriyyətinin varisi olaraq “Şimali (Quzey) Azərbaycan” adlandırılaydı. Bu adla da beynəlxalq təşkilatlara üzv olaydı...

271 dəfə baxılıb