YAP-ın ÜMUMİ MARAQLARI

	25 may 2012


Onlayn ictimai-siyasi qəzet

Elşad MƏMMƏDLİ

YAP-ın ÜMUMİ MARAQLARI

Yaxud Vasif Talıbovun yeni repressiya planı

Kim nə deyir desin, Naxçıvan MR Ali Məclisinin sədri, Yeni Azərbaycan Partiyası (YAP) Naxçıvan Muxtar Respublikası təşkilatının sədri Vasif Talıbov çox uzaqgörən adamdır. Nədən ki, Əli Əhmədovun, Siyavuş Novruzovun, Mübariz Qurbanlının görmədiklərini o duyur, hiss edir və narahatlıq keçirir. Xeyr, söhbət heç də sosial problemlərdən, xalqın canının boğazına yığılmasından və bunları aradan qaldırmaq zərurətindən getmir.

Vasif yoldaşın sədrliyi ilə YAP Naxçıvan Muxtar Respublikası təşkilatı idarə heyətinin ötən ilin yekunlarına və 2012-ci ildə qarşıda duran vəzifələrlə bağlı iclası keçirilib. Görünməmiş işdir, V.Talıbov deyib ki, 2012-ci il partiyanın qurumları üçün olduqca tələbkar və məsuliyyətli bir dövrdür.
Amma deyəsən, YAP-da baş verən son proseslər Vasif müəllimi ciddi narahat edib. Sitat: “...Hakim partiya statusu bizi arxayınlaşdırmamalıdır... Partiyanın seçkili orqanları ilə dövlət hakimiyyət orqanları arasında əlaqələr güclənməli, çevik xarakter almalıdır. Ötən il bir sıra təşkilatlarda baş verən pozuntularla bağlı mətbuatda tənqidi materiallar verilmişdi. Əgər partiya üzvləri, ilk təşkilatlar vaxtında mövqelərini bildirsəydilər, bu nöqsanlar olmazdı... Partiya işi daim yaradıcı fəaliyyət tələb edir. Ona görə köhnə metodlardan əl çəkmək, işə çevik xarakter vermək lazımdır... Faktlar göstərir ki, bəzi təşkilatlar bu məsələdə ifrata varır, kəmiyyət amilinə üstünlük verirlər... Təsadüfi insanların, şəxsi mənafe güdənlərin partiya sıralarında təmsil olunması yolverilməzdir”...
Açığı, çox düşündüm, götür qoy elədim, başa düşə bilmədim ki, hörmətli, izzətli Talıbov nə planlar üzərində düşünüb, bu çıxışının ardınca əməli nələr olacaq. Amma ortada təbii ki, nəsə var. Biz adət etmişik ki, hansısa bir əndrəbadi qayda, qərar, dəb, repressiya metodu ilk öncə Naxçıvanda tətbiq edilir, sonra bütün Azərbaycan boyunca həyata keçirilir. İndi görəsən, Vasif müəllim yeni YAP idarəetməsinin tətbiqi ilə bağlı camaatın başına nə oyun açacaq? Tamamilə mümkündür ki, YAP üzvlərini bir-bir çağırıb onları testdən keçirəcəklər, öyrənəcəklər kim partiyaya şəxsi mənafeyi üçün gəlib, bu statusdan istifadə edərək biznes qurub, iş tapıb pul qazanır, ona vergi - “YAPhaqqı” tətbiq edəcəklər. Buna etiraz edənlərə isə qapını göstərəcəklər.
Lakin məsələ ondadır ki, Vasif Talıbovun bu ideyası gerçəkləşsə, hakim partiyada demək olar heç kim qalmayacaq. Bu təşkilatdakı insanların əksər üzvləri zorən yaplaşdırılmış müəllimlər, həkimlər, iş adamlarıdır. Onlar məhz şəxsi mənafeləri - iş-güclərini itirməmək üçün bu addımı atıblar. Qaldı rəhbərlikdə təmsil olunanlara, axı Əli Əhmədovu, Mübariz Qurbanlını AMİP-dən ayırıb YAP-a gətirən amil heç də ideologiya olmayıb. Onlar məhz fərdi maraqları üçün bura gəliblər və bu gün də oliqarxa çevriliblər. Bu partiyanın ümumi maraqları elə məhz şəxsi mənafeləri kollektiv şəkildə həyata keçirməkdən ibarətdir.
Bu təşkilata ideya kimi baxanlar isə çoxdan burada yoxdur. Əli İnsanov türməmədir, Sirus Təbrizli evində eşiyində, Əli Nağıyev, Əli Əlirzayev, Əsədulla Qurbanov və digərləri də onun kimi...

455 dəfə baxılıb