ŞAGİRDLƏRƏ HEYVAN GÖSTƏRİN

	25 may 2012


Onlayn ictimai-siyasi qəzet

Murad KOHNƏQALA

ŞAGİRDLƏRƏ HEYVAN GÖSTƏRİN

Yurdumuzda pul qazanmağın çox qəribə yolları varmış. Mən hansı ölkəyə getsəm dərhal orda qazanmağın üsulunu tapıram, di gəl, Azərbaycana gələndə əlim-ayağım bağlanır, heç nə bacarmıram. Ola bilsin, iqtidardakıların hansısa məni falçıya bağlatdırıb. Doğurdan, heç cür təsəvvür eləyə bilmirəm ki, məsələn, bir rayonun maarif müdirinin seyfindən milyonlar çıxa. Onu necə qazanır axı, bu adam? Belələri ya dahidi, ya da oğru. Dahiliyini qoyaq bir qırağa, çünki bizdə maarif müdiri dahi ola bilməz. Yəqin oğrudu. Bəs onda, hardan oğurlayır bu pulları? Bax, burasını mən bilmirəm.

Bu yaxınlarda bir dostum söylədi ki, onun tanışı dələduzluq üstündə 9 il iş alıb. Soruşdum, nə dələduzluğudu? Dedi, o müxtəlif adamlardan yaxşıca pul yığaraq “müştərilərini” inandırıb ki, onları gəlirli vəzifəyə işə düzəldəcək. Ayrı-ayrı adamlara üst-üstə 800 min manat pul “atıb”. Söhbət əsnasında yadıma gəldi ki, o dələduzu mən də tanıyıram, haçansa kafedə oturub yemək də yemişik. Çox səliqəli geyinmiş, kostyum-qalstuklu bir adam idi. Hamı ilə son dərəcə səmimi davranırdı. Kafedə yeməyin hesabını da o verdi. Belə baxanda, kişinin oğlu hazırca deputat idi. İndi fikirləşirəm, görəsən onu niyə Milli Məclisə aparmamışdılar? Sən demə, səliqəli tanışımız MTN-ə də adam düzəltmək adıyla xeyli yığıbmış.
Sonra dostumdan soruşdum, yaxşı, bunun nə xeyri, gedib türmədə çürüməyə dəyərdimi? Dostum dedi, çürümək nədi, pulunu verib “burjuy” kamerasında bəy kimi yaşayır. Özü də 9 il nədi, bugün-sabah amnistiyaya-zada çıxıb çöldə yenə “işini” davam elətdirəcək. Demək, ölkəmizdə pul qazanmağın bir yolu da bu imiş. Deyir, çıxandan sonra da atdığı adamlara deyəcək ki, məndən şikayət eləyib tutdurduğunuza görə pulunuz qayıtmır, pulların hamısını məhkəmələrə dağıtdım, vəssalam.
Sonra dostum danışdı ki, pul qazanmaq demişkən, xəbərin varmı, Bakının bütün lisey, internat, orta məktəb direktorları qan ağlayır? Soruşdum, nolub, indi hansı qanun çıxıb? Dedi ki, arxası Prezident Aparatına bağlı olan hansısa biznesmen Moskvadan iri maşınlarda vəhşi heyvanlar gətirir. Dedim, bəs bunun məktəb direktorları ilə nə əlaqəsi? Gülüb dedi, həmin səyyari zooparkı məcburən məktəb uşaqlarına göstərmək istəyirlər. Bağça təmayüllü məktəblərlə birgə Bakıda minə yaxın təhsil müəssisəsi var. Hər direktordan, uşaqların sayına görə, siyahı ilə 6 manatdan bilet pulu yığılacaq. Şagirdlərin pulu oldu-olmadı, direktor məbləğı nağd ödəməlidi. Sonra dostum gülüb dedi ki, hesablamışam, burda, təxminən 4 milyon yarıma qədər qazanc var.
Maraqlandım ki, bəs, hansı heyvanları göstərəcəklər uşaqlara? Dostum dedi, dəqiqini mən də bilmirəm, yəqin, canavar, çaqqal, ayı, eşşək, porsuq, dələ, qaban, tülkü, şir, pələng kimi heyvanlar olacaq. Soruşdum, yaxşı, bunun şagirdlərə nə xeyri olacaq? Dedi, xeyri şagirdlərə yox, onu gətirənə olacaq. Şagirdlər də heyvanat aləmi haqda olan bilgilərini artıracaqlar. Heyvanları səyyari qəfəsdə saxlayacaqlar, uşaqlar da gəlib onlara tamaşa eləyəcək. Biznesmen deyib ki, uşaqlar pələngin iri pəncələrinə baxıb idmanla məşğul olmağa meyllənəcəklər. Tülkünün davranışından özlərinin gələcəyi üçün biclik təcrübəsi toplayacaqlar. Eşşəkdən dözümlülük və qalınqabırğalı olmağı öyrənəcəklər. Ölkədə əyri yollarla qazandıqları pulu xarici banklarda gizlətməyi yereşən porsuqdan mənimsəyəcəklər. Kollektivdə yırtıcı olmağı canavarlardan götürəcəklər. Şər deməsən xeyir gəlməz, işdi, gələcəkdə türməyə düşəsi olsalar dələnin çərxin içində fırlanmasını yadlarına salıb səbirli olacaqlar.
Demək, şagirdlər həyat bilgisini insanlardan, kitablardan yox, əsasən, heyvanlardan öyrənməlidi.

504 dəfə baxılıb