MERƏ BUĞA KƏLLƏSİ | Yeni Müsavat

	25 may 2012


Onlayn ictimai-siyasi qəzet

Tofiq YAQUBLU

MERƏ BUĞA KƏLLƏSİ

O gün bir cöngə şəhəri bir-birinə qatmışdı. Hansısa ət dükanının yanında bağlanmış buğa kəndiri qırıb qaçmışdı. Şanlı polisimiz də daxil olmaqla xeyli adam bu cöngənin dalınca düşmüşdü. Lakin onu tuta bilmirdilər. Cöngə Bakının küçə və meydanlarında icazəsiz aksiya keçirdikdən sonra axırda gəlib bir aptekə girdi və orada xeyli şeyi sındırıb dağıtdı. Cöngənin teylənməsi televiziyalarımız üçün göydəndüşmə mövzu oldu. Tamaşaçılar da maraqla həmin görüntülərə baxdılar. Seyr etdikləri onlara çox maraqlı və gülməli gəlirdi. Gülməli gələr də, axı gördüklərinin onlara heç bir ziyanı və təhlükəsi yoxuydu. Amma cöngənin teylənməsindən bir nəfərin ziddi ziyan çəkməsi ortadaydı. O şəxs, apteki darmadağın edilmiş sahibkar idi. Hələ cöngənin sahibini demirəm. Yəqin ki, şanlı polisimiz cöngəni yaxalaya bilməsə də onu çox asanlıqla yaxaladılar və şəhərdə icazəsiz aksiya və iğtişaşlar təşkil etdiyinə görə haqq-hesab soracaqlar. Polisimizi yaxşı tanıdığımızdan çox rahatca güman edə bilərik ki, onun itkiləri aptekin yiyəsinin itkisindən heç də az olmayacaq.

Cöngənin teylənməsi ilə bağlı yazmaq istədiyim əsas problemə toxunmadan öncə başqa bir məsələni nəzərinizə çatdırım. Televiziyalar, qəzetlər və saytları bu hadisə haqqında məlumat verəndə, qaçmış buğa haqqında gah “dana”, gah, “inək”, gah da “öküz” ifadəsini işlətdilər. Halbuki, qaçan heyvanın adını “buğa” və ya “cöngə” şəklində göstərməliydilər. Çünki dana, inək və öküz tamamilə fərqli şeylərdir. Mətbuatı yaxşı axtarsan məlum olacaq ki, kimsə bu hadisə haqqında yazısına “Buzov Bakını bir-birinə vurdu” başlığını qoyubmuş. Bir dəfə “Lider” TV Bakının yollarının bərbad olması haqqında reportaj verirdi. Müxbir əlinə xətkeş götürüb yoldakı çalanın dərinliyini ölçüb dedi ki, bu dərənin dərinliyi 13 santimetrdir. O, çala ilə dərənin fərqini bilmirdi. Belə şeyləri eşidəndə, adamın yadına şəhərli uşaqların “it mələdi”, “inək anqırdı” , “at hürüdü” kimi ifadələri və ya tövləni “inəyin qarajı”, atlını “atın şoferi” adlandırması düşür. Nə isə...
YAP Bakı ilə çox öyünür, onu “analoqu olmayan inkişafın” simvolu hesab edir. Onu tam bir Avropa şəhəri kimi təqdim edirlər. Yəni Bakı Praqa, Berlin, Madrid, Paris və s. kimi Avropa şəhərlərindən biri imiş (İqtidarın əvəzindən bu şəhərlərdən üzr istəyirəm). Biz isə deyirik ki, iqtidar ağlagəlməz korrupsiya layihələri hesabına Bakının mərkəzini və aeroportdan gələn yolun sağ-solunu abadlaşdırır, qalan yerlər isə it günündədir. Qar əriyəndən sonra bu, daha da aydın göründü, Bakı özü boyda çamırlığa və zibilxanaya dönüb. Bunun üstünə də “Lider” TV demişkən “dərə”lər ucbatından keçilməz olan yolları da gələndə əcaib bir mənzərə alınır. “Eurovision-2012" mahnı yarışmasının finalına hazırlaşan Bakının real durumu belədir. Hələ bu harasıdır? İt günündə olan bu şəhər 2020-ci ildə keçiriləcək Yay Olimpiadasına ev sahibliyi etmək istəyir. Bakının indiki halında belə bir iddiada olmaq sadəcə olaraq gülüncdür. Bakı indiki durumunda olsa-olsa ötən əsrin 60-cı illərində Olimpiadanın keçirilməsi üçün şəhərlərə qarşı sürülən tələblərə cavab verə bilərdi. İndi o, 21-ci əsrdə Olimpiada yarışlarına ev sahibliyi etmək istəyirsə çox işlər görməlidir. Həmin işlərdən biri də o gün şəhəri bir-birinə qatmış buğa ilə bağlıdır, daha doğrusu Bakının küçələrində heyvanların kəsilməsi. Artıq mədəni dünya onilliklər bundan öncə küçələrdə, açıq yerlərdə, hamının gözünün qarşısında heyvanların kəsilməsini yasaq edib. Heyvan ancaq sallaqxanada kəsilə bilər. Normal şəhərlərdə ən müasir texnologiya ilə təchiz edilmiş, yüksək sanitariya tələblərinə cavab verən sallaqxanalar fəaliyyət göstərir. Bakıda isə orta əsrlərin Şərq şəhərlərində olduğu kimi küçənin ortasında heyvan kəsirlər. Bütün ət dükanlarının yanında ağaca bağlı bir cöngə və ya bir-neçə qoyun olması norma halına gəlib. Bu, biabırçılıqdır. Ancaq Hacıbala Abutalıbov bunu başa düşmür. O gün kəndiri qırıb qaçmış buğa gedib aptekə yox, qaçıb onun kabinetinə girsəydi və bir yaxşı kəllə tutuzdursaydı, yəqin başa düşərdi.

446 dəfə baxılıb