İCRA BAŞÇISININ RAQATKASI

	25 may 2012


Onlayn ictimai-siyasi qəzet

Famil CƏFƏRLİ

İCRA BAŞÇISININ RAQATKASI

Həmişə bu fikirdə olmuşam, indi də o fikirdəyəm ki, qüdrətli və lider vətənimizdə ən maraqlı iş koxalıqdır. Yəni rayonun icra başçısı vəzifəsi. Bundan da maraqlı, həm də gəlirli, ekoloji və ictimai-siyasi cəhətdən təmiz, vitaminli iş ola bilməz. Həm də təhlükəsizdir. Söz yox, bu təhlükəsizlik söhbətində dünən xırda bir istisna olub. Onu sonra deyərik.

İndi isə gələk icra başçılığının AMEA alimlərinin elmi dili ilə desək, pozitiv-konstruktiv tərəflərinə, yəni üstünlüklərinə. Əvvəla, icra başçısı olmaq elə də baha deyil. 400-500 mini aşmır. İkincisi, bir rayona rəhbərlik eləmək üçün xüsusi savad, qabiliyyət, ağıl yiyəsi olmaq gərək deyil. Rayonda üstündə tikili olmayan boş torpaq sahəsi görəndə onun qiymətini gözəyarı, barmaq hesabı müəyyən edib satmaq üçün akademiya bitirmək gərəkdir ki?! Yox. Müxalifətin acığına YAP-a təzəlikcə artıq üçüncü dəfə üzv yazılan şair elə buradaca yaxşı deyib: “Elə ki gördün boş sahə, düşünmək nə üçün daha?!”
Birinci müavininə, ya da şəxsi qulbeçənə bir him edib satırsan. O torpağın üstündən Allah var a yüksək gərginlikli elektrik xətti, ya da altından kanalizasiya, qaz, su, telefon xətti, lap elə metro tuneli keçsin - boş şeydir. Əsas alverin gur getməsidir. Satıb qoyursan cibinə, sonra “bılo - ne bılo”. Səndən sonra icra başçısı kim olacaq, o gələndən sonra sən satdığın yerdə tikilmiş obyekti, binanı qanuni sayacaq, ya yox, o tikili camaata təhlükə yaradacaq, ya yox - bunlar sivil, qüdrətli, müstəqil və hüquqi dövlətçilik baxımından çox xırda və mənasız şeylərdi.
Başçı vəzifəsinin boyuna uyğun gələn başqa gəlirli sahələr də var. Sənin rayonunda nə qədər dövlət idarəsi, tikinti sahəsi, özəl şirkət, təhsil və səhiyyə ocağı, mağaza, restoran, çayxana, dəlləkxana, qumarxana, nə xana varsa, hamısı sənlikdir. Hamısına aylıq qoyub balaca şahlıq qurur, balaca padşah kimi yaşayırsan. Bu gəlir nöqtələri də hələ heç. Bunlar bəlli. Bəzən heç ağlına gəlməyən qazanc yerləri də olur. Məsələn, Gülağa İslamov Xəzər rayonuna başçısı qoyulanda ağlına da gəlməzdi ki, gün gələcək, o, rayondakı büdcə təşkilatlarına zorla sirk bileti satdıracaq. Rayondakı bütün dövlət idarə və müəssisələri, məktəb, xəstəxana, xaşxana, xəngəlxana, pivəxana rəhbərlərinin hərəsinə 100 bilet planı qoyacaq. 4 manatlıq bileti 6 manata satdırıb xırdaca bir şeydən 5-10 min duru qazanc götürəcək. Amma götürdü.
Tək bu da deyil. Hər deşikdən qazanc çıxarmaq olur. Başçı tanıyıram ki, rayon mollalarından da aylıq alır - hər yas məclisi başına 20 dollar. İcra başçısı var, rayon mərkəzində 14 yerdə “Çiko” tumu, 7 yerdə küçənin ortasına təndir qoydurub çörək satdırır. Doğum evinin baş həkimindən aylıq alan başçı da var. Başçı tanıyıram ki, hər fermerə 15 kisə arpa-buğda töycüsü qoyub. Əvvəllər başçısı olduğu qonşu rayondakı qoyun və hinduşkaları üçün...
Özü də bunlar bir-iki aylıq mövsümi işlər deyil ha. Məsələn, Gülağa İslamov 1995-ci ildən Xəzərin icra başçısıdır. Hesabını götür də. 17 il vurulsun X manata bərabərdir müstəqil var-dövlətçilik.
Kəsəsi, rayon icra koxası olmaq əla, sərfəli, yağlı işdir. Amma bir şərtlə ki, sərhəd zonasının rəhbəri olmayasan. Bəzən olur ki, lap uğurlu və çox balanlaşdırılmış xarici siyasətin dozası artır, geopolitik vəziyyətin bağırsağında bakterioz disbalans yaranır. Onda çətin olur, icra başçısı qaçıb təpilməyə bomba sığınacağı axtarır. Onu tapmayanda isə “siçan deşiyi axtarıram” məzmunlu tender elan edir. Söz yox, bunun da üstünlükləri var. Onu da lap axırda deyərik.
Dünən saat 12-də İranın hərbi vertolyotları sərhədimizi pozub. Şahidlər deyir ki, onlar bizim Astara rayonunda xəstəxananın üstündə iki dəfə dövrə vurub. Bu vaxt camaat təlaşa düşüb, qaçaqaç yaranıb. Tərslikdən icra başçısı da xəstəxananın həyətində imiş. Orada xırdavat satan bir çinli də varmış. Başçı onun satdığı durbini götürüb baxıb. Görəndə ki vertolyotlar doğrudan da İranındır, xəstəxanadan başılovlu qaçıb.
Bəzi ağzıgöyçəklər buna pis baxır, başçını qorxaqlıqda qınayır. Deyir bə müharibə olsa, bunlar neyləyəcək. Bu ittiham düz deyil. Dəqiq kəşfiyyat xəbəri belədir ki, Astaranın patriot başçısı heç yerə qaçıb-eləməyib. O, vətəni qorumaq üçün raqatkasını götürməyə tələsirmiş. Bu - bir.
İkincisi, Astaranın icra başçısı artıq böyük geopolitik proseslərin qəhrəmanıdır. Adı İran və Çin kimi nüvə dövlətlərinin adının çəkildiyi iri beynəlxalq qalmaqalda qəhrəman kimi hallanır. Day nə istəyirsən?!

887 dəfə baxılıb