HEYDƏR BABAYEVİN VURULMASININ ƏSL SİRRİ

	25 may 2012


Onlayn ictimai-siyasi qəzet

Şahvələd ÇOBANOĞLU

HEYDƏR BABAYEVİN VURULMASININ ƏSL SİRRİ

İndi camaatımız papağını qabağına qoyub fikirləşsə ki bu Hafiz Hacıyev böyük adamdır, sözü min kişinin sözündən mötəbərdir, üstəlik, vurduğu adam yerdən qalxmır, onda biz necə etiraz edə bilərik?! Çünki iş məhz belə də oldu. Adam analoqu olmayan iqtisadi inkişafın şanlı nazirini qaraladı və taxtdan saldı. Etiraz da edə bilərsiniz. Deyə bilərsiniz ki, Hafiz kimdir axı?! Ona tapşırılanları sadəcə bülbül kimi təkrarlayıb.

Sözün düzü budur, Hafiz ona deyilənləri təkrarlayıb. Amma bu tapşırığı ona kim vermişdi? Doğrudanmı Hafiz Hacıyev Kəmaləddin Heydərovun öyrətməsi ilə Heydər Babayevə həmlə etmişdi? Gəlin, belə sadəlövh olmayaq, Kəmaləddin Heydərov özündən yuxarının razılığı olmadan bu addımı ata biləcək biri deyil. Mənim ağlım kəsən budur ki, belə məsələlərdə hətta Hafiz Hacıyev də ondan cəsur və müstəqildir. Hafiz Hacıyev də o qədər axmaq adam deyil ki, “fövqəladə kassir”in sözü ilə siyasi qərarlar verənlərin iradəsinə təsir etmək fikrinə düşsün.
Azərbaycan hakimiyyətində özfəaliyyət çoxdan yığışdırılıb. Xüsusən də bu cür siyasi qərarların verilməsində. Heydər Babayev barədə qərar isə çoxdan verilmişdi. Yadınızdadırsa, günün birində ona məxsus klinikanı bağladılar. Həm də kiçik bir klinikanı. Səhiyyə nazirini də digər nazir yoldaşları öyrətməmişdi ki? Elə həmin dövrdən Babayevə qarşı konkret addımlar intensivləşdi.
Mətbuatda gedən, siyasi dairələrdə və el arasında söylənilən fikir və ehtimallara hörmətlə yanaşıram. Amma onların hamısını bölüşmürəm. Baş nazir yerində qalırsa, baş nazir postu uğrunda mübarizə niyə tərəflərin birinin qələbəsi ilə başa çatırdı? Heydər Babayev hakimiyyət daxilindəki qrupların sevmədiyi bir adam ola bilərdi. Həmin qrupların ona qarşı fəaliyyətini, onun gözdən salınmasına cəhdlərini də inkar etmək olmaz, amma bu cəhdlərin mövcudluğu hələ onların gerçəkləşməsi demək deyil. Hakimiyyət daxilində müxtəlif qruplar var və onlar arasında mübarizə ayrı-ayrı dövrlərdə çox amansız həddə çatıb, lakin onlar yenə də iş başındadır, bir-birini yeyə bilməyiblər və qurd quzu ilə birgə otlamaqda davam edir.
Bəs niyə Heydər Babayev kimi təcrübəli, sınaqdan keçmiş, bacarığı və potensialı həmkarlarından hətta üstün olan bir kadr vuruldu?
Yalnız bir səbəb vardı. Heydər Babayev iqtisadi inkişaf naziri olandan sonra Qərb ölkələrində rəğbətlə qarşılanmağa başlandı. Ona münasibət müsbət idi. Bu ölkələri təmsil edən yetkili və diplomatlar hər halda bu hökumətdən bir adam tapıb onu tərifləməli olurdu. Beynəlxalq iqtisadi qurumlar da həmçinin. Bu münasibətə onların bir az da əsasları vardı. Təbii ki, Heydər Babayev eyni korrupsioner sistemin ziyanlı oliqarx-nazirlərindən biri idi, amma şəxsi keyfiyyətlərinə görə doğrudan da bacarıqlı, işi bilən, fərqində olan, psixoloji və mədəni anlamda isə qərbli biridir. Elə qərblilərdə qazandığı rəğbət də onu yıxdı.
Onu qısqandılar, ondan qorxdular, bəlkə də onun timsalında yuxarıdan başlayan burjua inqilabını gördülər. Bu fikri deyərkən təkcə intuisiya və məntiqə əsaslanmıram, bəlli müşahidə və informasiyalarım da rol oynayır. Fərhad Əliyevlə Əli İnsanovun da vurulma səbəbi eyni idi. Biri Qərbdən təhlükə kimi görünürdü, digəri Şərqdən. Hakimiyyət sahibləri suyu üfürə-üfürə içir; onlar Heydər Babayevin yeni bir təhlükə olduğunu istəmədilər. Onlara Kəmaləddin Heydərov, Misir Mərdanov, Hafiz Hacıyev tipində nazirlər lazımdır.
Ona görə də Heydər Babayev rəzil edilərək vuruldu. Baxmayaraq ki, fərdi potensialına görə hakim komandada nazir ola biləcək bir-iki adam varsa, onlardan biri o idi. Bu üstünlükdən bizə və xalqımıza heç bir fayda olmasa da! Onun ölkəyə dəvət olunması da məhz qabiliyyətinə, bacarığına görə olub. Bu sualı bir daha verməli oluram: gəlməyə dəyərdimi? Bu rəzaləti yaşamaq üçün öz təmiz və doğru karyerandan, həyat yolundan dönməyə dəyərdimi?! Öz xalqına qarşı oyunlarda rol alıb bu rəzil duruma düşmək lazım idimi?

1882 dəfə baxılıb