DANIŞIR BAYQUŞLAR... | Yeni Müsavat

	25 may 2012


Onlayn ictimai-siyasi qəzet

Sevinc TELMANQIZI

DANIŞIR BAYQUŞLAR...

Bir həftədə ardıcıl olaraq iki dəfə eyni personadan yazan köşə yazarına, məşhur filmdə deyilmişkən, birtəhər baxırlar. Ortada iki səbəb ola bilər: ya köşə yazarı mövzu qıtlığı çəkir, ya da nəsə həmin adamla şəxsi qərəzliyi var ki, acığını bu cür çıxmağa çalışır. Hər ikisi də köşə yazarları “mafiya”sının qəbul etmədiyi qaydalardır. Amma neyləyəsən ki, bu məmləkət, eləcə də onun bəzi parlaq simaları adamı qoymurlar ki, qələmi bircə gün kənara qoyub, dinc durasan. Yekə çıxmasın, amma özləri adama “gəl-gəl” deyirlər...

Lap elə götürək Milli Teleradio Şurasının sədri Nuşirəvan Məhərrəmlini. Ötən dəfə Türksat peykində problem yarandığı üçün paytaxt əhli Türkiyə seriallarına, verilişlərinə həsrət qalmışdı, mən də yerli telekanallardakı bayağılığın, veriliş qıtlığının acığını MTRŞ sədrindən çıxdım. O da eləmə tənbəllik, Azərbaycan əhalisi üçün sayı çox az olan nəfəslikləri - “Azadlıq”, “BBC” və “Amerikanın səsi” radiostansiyalarının 2 aya bağlanacağını bəyan etdi. Və bundan sonra şimşəkləri əməlli-başlı üzərinə çəkdi.
Etiraf edim ki, bu üç radionun içində ən çox “Azadlıq”ı dinləyirəm. Özü də ancaq axşam saatlarında - 22.00-dan sonra. Həmin saatlar yorğun-arğın işdən evə qayıtdığım ərəfəyə təsadüf edir. Gün ərzində yazır, xəbərləri təqib edir, onları kompüterin yaddaşına köçürürəm. Axşamlarsa radionun reportajlarına, çox vaxt radikallığı ilə adamı heyrətləndirən (indi belə mövqeli KİV az qalıb) müsahibələrinə qulaq asanda, səmimiyyətimə inanın ki, günün yorğunluğu canımdan çıxır. Və bu dəqiqələrdə içimdən həm də “nə yaxşı ki, tək deyilik” fikrini keçirirəm. İndi isə Nuşirəvan müəllim deyir ki, sən demə, bu radio əcnəbiymiş. “Milli sərvətimiz” olan tezliklərimiz tükəndiyindən əcnəbilərə verdiklərimizi geri almalıymışıq. Bəs nə oldu, deyirdiz, bizim sərvətlərimiz tükənməzdi? Neftimiz tükənmir, amma tezliyimiz tükənir, eləmi? Nuşirəvan müəllimə görə, bütün günü manısların mahnılarını efirə verən, onları mikrofon başına çıxarıb, “ən çox sevdiyiniz yemək hansıdır, tənha bir adaya düşsəniz, özünüzlə kimi apararsız” kimi düşük sualları dinləyiciyə çatdıran, beşcə dəqiqəlik xəbərlər buraxılışında beş min səhv edən yerli radiolar daha lazımlıymış bu məmləkətə. Bir çox MİLLİmizdən daha azərbaycanlı, daha vətənpərvər və daha obyektiv olan “Azadlıq”ı indi də bu bəhanə ilə əlimizdən almağa çalışırlar. Necə deyərlər, sonuncu azadlıq adaları da belə əlimizdən çıxır.
Özündən razılıq çıxmasın, amma mən bu nəticəni təxmin edirdim. Çox uzağa getməyək, aprel ayında dövlət başçısı İlham Əliyev “Azadlıq” radiosunun prezidenti Cefri Gedmenlə görüşündə nə demişdi, xatırlayırsız? “Radionun Azərbaycan xidmətinin reportajlarında balans pozulub, qərəzli və ədalətsizdir”. İlham Əliyev bu qənaətə redaksiyasının reportajlarının bir aylıq monitorinqi nəticəsində gəldiyini bəyan etmişdi. Dövlət başçısı həmçinin radioda müxalifət nümayəndələrinə daha çox yer ayrılmasından da narazı qalmışdı. Və görüşün açar cümləsini də elə sonda işlətmişdi: “Bəlkə ümumiyyətlə bizə radiostansiya lazım deyil?”.
Bax belə. Bizə radiostansiya lazımdır, amma bu hökumətə yox.
Artıq üç dalğadan dünyaya ötürülən müxalif fikir hakimiyyəti qıcıqlandırır. Obyektiv jurnalistikanın daşını daş üstə qoymamaq, yerdə qalanları ölümünə qorxutmaq, bir sözlə, diş qıcamaq. Çoxbilmiş ekspertlərin bəzisi deyir, hakimiyyətin bu addımı Amerikaya münasibətdə əzələ nümayişidir, bir çoxları isə deyir, məqsəd onsuz da çoxdan bəri əlindən təngə gəldikləri bu radioları birnəfəsə qapatmaq idi. Sadəcə, səs-küyü çox çıxmasın deyə seçkiləri gözləyirdilər, o da bitdi.
O ki qaldı Nuşərəvan müəllimin bu məqamlarda daha çox eşitməyə öyrəşdiyimiz o amiranə və özündən razı səs tonu ilə verdiyi bəyanatlara... Onlara çox da qulaq asmayın. Hələ son söz deyilməyib. “Yuxarı”ların əlindəki “pult”un bircə düyməsinin basılması kifayətdir ki, dərhal “xoş məram” nümayiş etdirib, qərarı geri oxusun. Bu “xoş məram” da zalım “Lazım” kimidir. Onun nə vaxt gəlib, Qarabağı alacağı bilinmədiyi kimi, “xoş məram”ın da günün hansı saatında təşrif buyurub, radioların həyatını xilas edəcəyi bilinmir...
Bir də ki... Deyəsən, Nuşirəvan müəllim azad sözün carçıları olan radioları, telekanalları bir-bir bağlaya-bağlaya bu məmləkətdə bayquşlarla baş-başa qalmaq istəyir. Axı onun bayquşlarla söhbəti yaxşı tutur...

1430 dəfə baxılıb