BİRLİK VƏ QARĞA ƏHVALATI

	25 may 2012


Onlayn ictimai-siyasi qəzet

Şahvələd ÇOBANOĞLU

BİRLİK VƏ QARĞA ƏHVALATI

Müsahibələr və açıqlamalardan sezilir ki, müxalifətin birliyi yenə də problemlərlə üzləşib. Yaxud kimlərsə prosesi əngəlləməkdədir. Allah bilir ki, indi nə söhbətlər gedir, kim nə planlaşdırır.

Problem olmasaydı, liderlər və partiya funksionerləri birləşmənin vacibliyi haqqında xüsusi və çox danışmazdılar. Əvəzində yeni planlardan söhbət açardılar. Onlar birliyin vacib olduğundan danışırlarsa, deməli, hələ bu birliyin alınması üçün problemlər var. Müsavat rəhbərliyinə daxil olan adamların çıxışlarından bir şeyi anlamaq olur ki, onlar daha böyük birlik formatı üçün inad edirlər. Düzdür, sonda birliyin yaranması üçün İsa Qəmbər tərəfdən problem yaranacağına şəxsən mən inana bilmirəm. İsa bəy buna necə gedə bilər? Hər zaman ictimai maraqları partiya maraqlarından üstün tutduğuna əmin olduğumuz bir adam buna yol verə bilərmi? Nə üçün?
Daha hansı inadların mövcud olmasını hələ dəqiq bilmirik. Yəqin tezliklə çox şeylərə aydınlıq gələcək. “Azadlıq” bloku liderlərinin yeni birliyin adı ilə bağlı inad göstərməsi barədə xəbərlər doğrudursa, çox pis... “Azadlıq” pis ad ola bilməz. Bu adın populyarlığı həm də Müsavatın ilk gündən orada olması ilə bağlıdır. Amma heç nə birlik üçün əngəl sayılmalı deyil.
Narazı elektorat müxalifətin səmimi birliyini gözləyir. Köhnə yazıların birində söyləmişdim ki, demokratik düşərgənin vahid blokunun qızılgül embleminin yerinə pişik başı qoysaq da adamlar gəlib qarşısında həmin pişik başı olan namizədə səs verəcək. Xalq formalizmə meylli olmur. Formalizm onun yüksək gerçəklik hissi tərəfindən hər zaman rədd edilir.
İndiki format çox doğru bir formatdır. Təbii seçimlə yaranıb. Seçkilərə ən sərt münasibət bu qurumları və liderləri birləşdirib. O zaman seçkiyə bu münasibəti bəsləməyənlər artıq başqa yolda olanlardır. Tək bir hadisəni xatırlaya bilərsiniz. Klassik Xalq Cəbhəsi partiyasından Zəlimxan Məmmədli təmsil etdiyi siyasi təşkilatın eyni mövqeyə girməsi üçün, eyni bəyanatı imzalaması üçün nə qədər zəhmət çəkdi. Partiyanın sədri Mirmahmud bəy isə dediyindən dönmədi. Bəhanə və ya səbəblər gətirərək qıraqda qaldı. Sərdar Cəlaloğlu isə ilk gündən bu birliyi var edən sənədi topa tutdu. ADP sədri uzun müddətdir ki, tamam başqa mövqe və taktika sərgiləyir. Həmin mövqe və taktikanı isə birlik barədə müzakirə aparanların heç biri qəbul etmir.
Kiçik format böyükləri kiçiltməz, yeni ad da köhnələri... Davam etməyə dəyər. Bir daha düşünməyə, bir daha danışmağa dəyər. Əks halda belə anlamaq olar: xalqın birliyini hamı öyür, hamı istəyir, amma xalqın doğru yolda gedənlərinin birliyini heç kim yaratmaq istəmir! Məqsəd nədir? Kim nə üçün çalışır? Kim nəyə və kimə işləyir? Sadə tərəfdarlar bu liderlərin nazını uzun illərdir çəkməkdən yorulmur, amma onlar bir-birini 3 aya yorurlar.

***

Maraqlı bir əhvalat var. Yaşı 80-ə çatmış ata ona baş çəkməyə gələn sayılıb-seçilən 45 yaşlı oğlu ilə salonda əyləşmişdilər. Oradan-buradan, arvad-uşaqdan, müxalifətdən-iqtidardan çox söhbət edəndən sonra ata-oğul pəncərə önündəki ağaca bir qarğanın qonduğunu gördülər. Ata qarğanı göstərib oğlundan sordu:
- Bu nədir, oğlum?
- Qarğadır, dədə.
Ata gülümsədi. Bir azdan yenə sordu:
- Bu nədir belə, oğlum?
- Qarğadır, dedim, dədə. İkinci dəfə soruşursan.
Ata gözünü pəncərədən çəkmədən bir daha soruşdu:
- Bu nədir, oğlum?
Oğul əsəbiləşib özündən çıxdı:
- Artıq neçənci dəfə soruşursan. Belə olmaz, dədə. Bu, qarğadır, qarğa!
Ata ayağa durdu. Otağına keçdi və əlində bir dəftərlə döndü. Oğlu bu dəftəri dərhal tanıdı, atasının gündəliyi idi. Atası gülümsəyərək dəftəri vərəqlədi və tapdığı səhifəni ondan oxumağı xahiş etdi. Oğlu da oxudu: “Bu gün kiçik oğlumla pəncərə önündə oturarkən ora bir qarğa qondu. Canım oğlum düz 23 dəfə məndən onun nə olduğunu sordu. Qızmadan, yorulmadan, sevinərək ona cavab verdim”.

900 dəfə baxılıb