AĞ HƏYAT, QARA PREZİDENT

	25 may 2012


Onlayn ictimai-siyasi qəzet

Şahvələd ÇOBANOĞLU

AĞ HƏYAT, QARA PREZİDENT

Qaradərili adam ABŞ kimi nəhəng ölkənin prezidenti seçildi, bizdə isə heç ağdərililər də prezident seçilə bilmir. Gerçəklik budur ki, Azərbaycanda anadan qeyri-adi doğulub rəngin yaşıl və göy də olsa, qıpqırmızı da olsa, prezident seçilə bilməzsən. Amma heç vaxt “prezident oldu” ifadəsi ilə “prezident seçildi” ifadəsini səhv salmayın.

Günün söhbətlərinə qulaq asanda adama elə gəlir ki, hamı Barak Obamanın prezident seçilməsini qaraların qələbəsi kimi başa düşür. Lakin belə deyil, bu qələbə daha çox ağ adamların qələbəsidir. Qaralarla özlərinə fərq qoymayan ağ adamların böyük qələbəsi! Bütün uğurlarını onlarla yanaşı yaşayan hər kəslə bərabər bölüşən ağ adamların qələbəsi!
Bu, ağ və qara adam söhbətinin prinsip olaraq yığışdığı bir gündür. Bizdə hələ regionçuluq, rayonbazlıq ovqatının at oynatdığı bir dövrdə bu hadisənin əhəmiyyətini anlamaq o qədər də çətin deyil. Özlüyündə ABŞ-da kimin prezident olmasının bizim üçün heç bir fərqi yoxdur. Amma sırf mənəvi aspektdə bu hadisə bütün dünya üçün misilsizdir. Hərbi və siyasi derjava olan ABŞ dünyanın ən güclü dövlətidir, amma indiyədək onun bu qədər möhtəşəm mənəvi uğuru olmamışdı.
Obamanın prezident seçilməsi düşünülmüş bir layihə də ola bilər, amma çox yaxşı düşünülüb. Tamahkar və imperialist xarici siyasətindən əl çəkməyərək öz mənəvi simasına böyük ləkələr vurmuş bir dövlətin bundan böyük uduşlar əldə edəcəyi şəksizdir. Ağ Evin öz ölkəsində yaratdığı ağ həyatı tənqid etmək artıq mümkünsüzdür.
İndi bu hadisənin anlamından baxanda dünyanın daha bir nəhəngi olmaq istəyən dağ boyda Rusiya adamın gözündə Gürcüstandan da kiçik görünür. İndi həmin Rusiyada da, elə bizdə də hər kəs tərəddüdsüz olaraq ürəyindən keçirə bilər ki, kaş elə bizim də ağ həyatımız və qaradərili prezidentimiz olaydı. Budur, yerin dibindən çıxmış Medvedyev özünün prezident səlahiyyətlərinin müddətini uzatmaq üçün təklif verir. Türkmənbaşının ruhu bu diyarların üzərində dolaşmaqda davam edir.
Bəs qara həyat nədir? Ağ adamı zəncidən də hüquqsuz edən həyat. Baxmayaraq ki, artıq zəncinin hüquqsuz olduğunu demək özü çox yanlışdır. Həmin fikri məcazi mənada başa düşməliyik. Azərbaycandan kimsə xaricə gedən zəncilərlə söhbətdə elə belə də söyləyib: zənci siz deyilsiniz, zənci bizik.
Yazıçı-dramaturq Rüstəm İbrahimbəyov bugünlərdə bizim qara həyatdan söhbət açmışdı. Aləm qopdu. Rüstəm bəyin üstünə elə düşdülər ki, sanki adam zəncidir. Söhbət indi o yerə gəlib çıxıb ki, o, buna heyvan deyir, bu da ona. Bu da bizim ağ prezidentimizin dövrü.
Bu dövrün özəlliyi ondadır ki, keçmişlərdən prezidentin dostu kimi tanınan Anar Məmmədxanlı da Rüstəm İbrahimbəyovu müdafiə edib. Əsl qara həyat buna deyərlər. Bəzi adamlar həm Rüstəm İbrahimbəyovu haqlı sayır, həm də prezidenti tərifləyir. Mən qafası bütləşmiş adamların Rüstəm İbrahimbəyova hücumunu anlayıram, burada onların məntiqi aydındır. Onlar deyir ki, yox, bizim ölkədə deyilən ayıbların heç biri yoxdur.
Amma Anar Məmmədxanlını başa düşmək olmur. Rüstəm bəyin söylədiklərinin hamısı siyasi ittihamdır, ağır ittihamlardır, doğru ittihamlardır və prezidentə birbaşa aiddir. Bəs necə ola bilər ki, həm narazısan, həm razı?!
Bizim bilmədiyimiz qara işlər hələ çoxdur.

912 dəfə baxılıb