MÜXALİFƏTİN BİRLİYİ

	25 may 2012


Onlayn ictimai-siyasi qəzet

Şahvələd ÇOBANOĞLU

MÜXALİFƏTİN BİRLİYİ

Alınmır?

Dünən təsadüfən KXCP sədri Mirmahmud Fəttayevin Müsavat rəhbərliyinə ünvanladığı çıxışı oxudum. Etiraf edim ki, Azərbaycanın indiki çətin və çıxılmaz görünən günlərə gəlməsindən sonra siyasi təşkilatların, liderlərin fəaliyyətinə, çıxış və davranışlarına xüsusi diqqət ayırıram. Mənə maraqlıdır ki, onlar indi nə edir, nə düşünür və nə planlaşdırırlar. İndiyə qədər olanlar heç, bəs bundan sonra nə etmək istəyirlər? Vəziyyətin məsuliyyətini duyub buna uyğun hərəkət etmək istəyirlərmi?

Mirmahmud bəy Arif Hacılının oxumadığım bir açıqlamasına münasibət bildirmişdi. Lakin olduqca sərt və qəzəbli bir cavab idi. Açığı, son dövrlərdə bu partiyadan olan adamların, yaxud elə Mirmahmud bəyin hətta hakimiyyət haqqında belə sərt danışdığını görməmişdim. Təbii ki, məyus olmalı, təəccüblənməli idim. Deməli, bizim müxalifət hələ də nə baş verdiyinin fərqində deyil, onlar bir araya gəlib bu ölkəni xilas etmək haqqında düşünmək əvəzinə yenə də bir-biri ilə didişmək yolundadır.
Xatırladım ki, Mirmahmud bəyə siyasi fəaliyyətinin bu günündən baxıb, onun rəhbərlik etdiyi təşkilatın indi o qədər də populyar olmadığını düşünüb bu olaya diqqət ayırmamaq mümkün idi. Amma unutmayın, bu adam vaxtilə parlamentdəki çıxışları (İbrahim İbrahimli ilə birgə), dirəniş və mövqeyi ilə siyasi əfsanəyə çevrilmişdi. Elə indi də çox şey edə bilər. Bəs nə üçün belə deyil?
Məni maraq götürdü. Həmin yazıdan da bəlli olurdu ki, Arif Hacılı öz çıxışında Mirmahmud bəyi və onun təşkilatını nədəsə ittiham etməyib. Tapıb onun çıxışını da oxudum. Və gözümdə ağlıma gəlməyən bir mənzərə canlandı.
Bilirsiniz ki, müxalifətin birləşməsi ideyası indi çox populyardır, demokratik ictimaiyyət bu birliyin yaranmasına böyük ümid bəsləyir. Əsas müxalifət təşkilatlarının seçkiləri boykot etməsindən sonra isə bu birliyin alınması real görünürdü. Boykotçular indi Müxalifətin Əməkdaşlıq Mərkəzində birləşib və daha gerçək birlik üçün danışıqlar aparır. Burada isə işlər, sən demə, heç də yaxşı deyilmiş.
Son çıxışlardan belə görünür ki, Müsavat rəhbərliyi birliyə razı olmur. Çıxışlardan aydınca görünür. Daha doğrusu, Müsavat daha geniş tərkibli birlik tələb edir. Onların fikrincə, KXCP, ADP kimi təşkilatlar da bu birliyə qoşulmazsa, birlik istənilən effekti verməyəcək. Halbuki ADP-nin ciddi mövqe dəyişikliyi, KXCP-nin boykotu dəstəkləmədiyi onlara da gizli deyil. İndi isə bəlli olur ki, KXCP nəinki müxalifətin birliyini istəmir, hətta Müsavata qarşı çox kəskin münasibətdədir. Mirmahmud bəy də ona görə qəzəblənib ki, Müsavat bir daha onların adından istifadə etməsin, çünki onların bu birliyə gəlmək fikri yoxdur.
Söhbət ondan gedir ki, təsadüfən diqqət ayırdığım bir açıqlamanın izi ilə gedərək müxalifətin birləşmək cəhdlərinin yenə də əngəllərlə üzləşdiyini müəyyən etdim. Demokratik qüvvələrin birliyini əvvəllər başqaları pozub. Belə çıxır ki, indi də bunu Müsavat əngəlləyir. Yanılmaq istərdim, amma təəssüf ki, belə görünür.
Bəlkə başqa əngəllər də var?..

***

Son illərdə demokratik proseslərə ən böyük ziyanı partiya maraqları vurub. Elə partiyalara da böyük ziyan partiya maraqlarından dəyib. Ona görə də xalqın narazılığı artdığı halda partiyalar kiçilib. Yeganə olmasa da bir səbəb də budur.

829 dəfə baxılıb